ಸಿಮಿಲಿಪಾಲ್‌ನಲ್ಲಿ ಮಾತ್ರವೇ ಕಂಡುಬರುವ ಅಪರೂಪದ ವರ್ಗ - ಕರಿಬಣ್ಣದ ಹುಲಿಗಳು

ಸಿಮಿಲಿಪಾಲ್

• ಒಡಿಶಾದ ಸಿಮಿಲಿಪಾಲ್ ಬೆಟ್ಟಗಳು ಅಲ್ಲಿನ ಆದಿವಾಸಿ ಸಮುದಾಯಗಳು ಮತ್ತು ಹುಲಿಗಳೆರಡಕ್ಕೂ ಬಹುಮುಖ್ಯವಾದ ಜೀವಾಧಾರಕ ವ್ಯವಸ್ಥೆಯಾಗಿದೆ. ಒಡಿಶಾದ ಮಯೂರ್‌ಭಂಜ್ ಜಿಲ್ಲೆಯ ಮಧ್ಯಭಾಗದಲ್ಲಿರುವ ಸಿಮಿಲಿಪಾಲ್‌ನ ಬೆಟ್ಟಗಳು, ಅರಣ್ಯಗಳು, ನದಿಗಳು ಮತ್ತು ವನ್ಯಜೀವಿಗಳು ಈ ಪ್ರದೇಶದಲ್ಲಿ ಕಂಡುಬರುತ್ತವೆ. ರಾಷ್ಟ್ರೀಯ ಉದ್ಯಾನ ಮತ್ತು ಹುಲಿ ಸಂರಕ್ಷಣಾ ಮೀಸಲು ಅರಣ್ಯವಾಗಿರುವ ಸಿಮಿಲಿಪಾಲ್ ತನ್ನ ಹೆಸರನ್ನು ಇಲ್ಲಿ ಹೇರಳವಾಗಿ ಬೆಳೆಯುವ ಸಿಮುಲ್ (red silk cotton) ಎಂದು ಕರೆಯಲಾಗುವ ಮರಗಳಿಂದ ಪಡೆದುಕೊಂಡಿದೆ. ಕೋಲ್ಹಾ, ಸಂತಾಲ್, ಭೂಮಿಜ, ಗೊಂಡ್ ಮತ್ತು ಹೋ ಮುಂತಾದ ವಿವಿಧ ಬುಡಕಟ್ಟುಗಳ ಜನರು ಸಿಮಿಲಿಪಾಲ್ ಮತ್ತು ಸುತ್ತಮುತ್ತಲಿನ ಭೂಪ್ರದೇಶಗಳಲ್ಲಿ ವಾಸವಾಗಿದ್ದಾರೆ. ಹೆಚ್ಚುವರಿಯಾಗಿ, ವಿಶೇಷವಾಗಿ ಅಪಾಯ ಎದುರಿಸುತ್ತಿರುವ ಬುಡಕಟ್ಟು ಗುಂಪುಗಳಿಗೆ ಸೇರಿದ ಖಡಿಯಾ, ಮಾಂಕಿಡಿಯಾ ಮತ್ತು ಲೋಧಾಗಳು ಕೂಡಾ ಇದೇ ಪ್ರದೇಶದಲ್ಲಿ ವಾಸಿಸುತ್ತಿದ್ದು, ಬಹುತೇಕ ಅರಣ್ಯಾಧಾರಿತ ಜೀವನೋಪಾಯಗಳನ್ನು ಅವಲಂಬಿಸಿದ್ದಾರೆ.

• ಈ ರಕ್ಷಿತ ಪ್ರದೇಶವು 2009ರಿಂದ ಯುನೆಸ್ಕೋ ವಿಶ್ವ ಜೈವಿಕ ವಲಯಗಳ ಮೀಸಲು ನೆಟ್ವರ್ಕ್‌ನ (UNESCO World Network of Biosphere Reserves) ಭಾಗವಾಗಿದೆ.

• ಸಿಮಿಲಿಪಾಲ್ ಪ್ರದೇಶವು ವೈವಿಧ್ಯಮಯ ಸಸ್ಯ ಮತ್ತು ಪ್ರಾಣಿ ಸಂಪತ್ತಿನ ಆಗರವಾಗಿದೆ. ಇದು ಭಾರತದ ಎರಡು ಜೀವವೈವಿಧ್ಯ ಸೂಕ್ಷ್ಮತಾಣಗಳಾದ ಈಶಾನ್ಯದ ಸಬ್ ಹಿಮಾಲಯನ್ ಮತ್ತು ದಕ್ಷಿಣದ ಪಶ್ಚಿಮ ಘಟ್ಟ ಪ್ರದೇಶಗಳ ನಡುವಿನ ಕೊಂಡಿಯಾಗಿದೆ. ಈ ಪ್ರದೇಶವು ಭಾರತದ ಹೂ ಬಿಡುವ ಸಸ್ಯಗಳಲ್ಲಿ 7 ಶೇಕಡಾ, ಆರ್ಕಿಡ್‌ಗಳಲ್ಲಿ 8 ಶೇಕಡಾ, ಸರೀಸೃಪಗಳಲ್ಲಿ 7 ಶೇಕಡಾ, ಪಕ್ಷಿಗಳಲ್ಲಿ 20 ಶೇಕಡಾ, ಸಸ್ತನಿಗಳಲ್ಲಿ 11 ಶೇಕಡಾದಷ್ಟನ್ನು ಹೊಂದಿದೆ. ಸಿಮಿಲಿಪಾಲ್ ಪ್ರದೇಶದಲ್ಲಿ 1,253ಕ್ಕೂ ಹೆಚ್ಚು ಪ್ರಭೇದಗಳ ಹೂ ಬಿಡುವ ಸಸ್ಯಗಳು, 99 ಪ್ರಭೇದಗಳ ಹೂ ಬಿಡದ ಸಸ್ಯಗಳು, 21 ಪ್ರಭೇದಗಳ ಉಭಯಜೀವಿಗಳು (amphibians ಅಂದರೆ, ನೆಲ ಜಲ ಎರಡರಲ್ಲೂ ವಾಸಿಸುವ ಜೀವಿಗಳು), 62 ಪ್ರಭೇದಗಳ ಸರೀಸೃಪಗಳು (reptiles ಅಂದರೆ, ಹಾವು, ಹಲ್ಲಿ ಜಾತಿಗೆ ಸೇರಿದ ಹರಿದಾಡುವ ಜೀವಿಗಳು), 361ಪ್ರಭೇದಗಳ ಹಕ್ಕಿಗಳು ಮತ್ತು 55 ಪ್ರಭೇದಗಳ ಸಸ್ತನಿಗಳನ್ನು (mammals ಅಂದರೆ, ಮೊಲೆಯೂಡುವ ಪ್ರಾಣಿಗಳು) ಇಲ್ಲಿ ಗುರುತಿಸಲಾಗಿದೆ.

• ಈ ಪ್ರದೇಶವು 104 ಆರ್ಕಿಡ್ ಪ್ರಭೇದಗಳ ನೆಲೆಯಾಗಿದ್ದು ಇವುಗಳಲ್ಲಿ ಕೆಲವು ಅಳಿವಿನಂಚಿನಲ್ಲಿವೆ. 72 ಹಿಮಾಲಯದ ಆರ್ಕಿಡ್ ಪ್ರಭೇದಗಳೂ ಇಲ್ಲಿವೆ. ನೂರಾರು ವಿಧಗಳ ಕೀಟಗಳು, ಜರಿಗಿಡಗಳು (ferns) ಮತ್ತು ಔಷಧೀಯ ಸಸ್ಯಗಳೂ ಇಲ್ಲಿವೆ. ಮಹಾಶೀರ್, ಗೊರವಂಕ (Hornbill), ಔಸಿಂಘ, ಮೌಸ್ ಡಿಯರ್ (ಪುಟ್ಟ ಜಾತಿಯ ಜಿಂಕೆ), ಹೆಬ್ಬಳಿಲು (Giant squirrel), ಹಾರುವ ಅಳಿಲು, ರೂಡಿ ಮಂಗೂಸ್ (ಒಂದು ರೀತಿಯ ಮುಂಗುಸಿ), ಉದ್ದ ಮೂತಿಯ ಮೊಸಳೆ (mugger crocodile) ಮತ್ತು ರೂಫಸ್ ಟೈಲ್ಡ್ ಹೇರ್ (ಒಂದು ಜಾತಿಯ ಮೊಲ) ಮುಂತಾದ ಅಪರೂಪದ, ವಿನಾಶದ ಅಂಚಿನಲ್ಲಿರುವ, ಅಪಾಯಕ್ಕೆ ಒಳಗಾಗಿರುವ ಪ್ರಾಣಿ ಮತ್ತು ಸಸ್ಯ ಪ್ರಭೇದಗಳಿಗೆ ಸಿಮಿಲಿಪಾಲ್ ನೆಲೆಯಾಗಿದೆ. ಅಲ್ಲಿ ಹುಲಿ, ಚಿರತೆ ಮುಂತಾದ ದೊಡ್ಡ ಗಾತ್ರದ ಮಾಂಸಾಹಾರಿ ಪ್ರಾಣಿಗಳಲ್ಲದೇ ಆನೆ, ಕಾಡುಕೋಣ (Indian Gaur) ಮುಂತಾದ ಭಾರೀ ಗಾತ್ರದ ಸಸ್ಯಾಹಾರಿ ಪ್ರಾಣಿಗಳೂ ಇವೆ.

• ಸಿಮಿಲಿಪಾಲ್‌ನ ಹುಲಿಗಳು ಮಧ್ಯ ಭಾರತದ ಹುಲಿಗಳ ವಿಶಿಷ್ಟವಾದ ನಿರ್ದಿಷ್ಟ ಸಂತತಿಯನ್ನು ಪ್ರತಿನಿಧಿಸುತ್ತವೆ. ಆಗಾಗ ಕಂಡುಬರುವ ಕಪ್ಪು ಬಣ್ಣದ ಹುಲಿಗಳು ಈ ಪ್ರದೇಶವನ್ನು ಇನ್ನಷ್ಟು ವಿಶೇಷವನ್ನಾಗಿ ಮಾಡಿದ್ದು, ಇದು ಇಡೀ ಜಗತ್ತಿನಲ್ಲೇ ಇಂತಹ ಹುಲಿಗಳ ಏಕೈಕ ವಾಸಸ್ಥಾನವಾಗಿದೆ.

• ಕೃಷ್ಣವರ್ಣದ ಹುಲಿಗಳು ಬಂಗಾಳ ಹುಲಿಗಳ ಅಪರೂಪದ ವೈವಿಧ್ಯವಾಗಿದ್ದು, ಸಿಮಿಲಿಪಾಲ್‌ನಲ್ಲಿ ಮಾತ್ರ ಕಂಡುಬರುತ್ತವೆ. ಇವು ಒಂದು ಪ್ರಮುಖ ಪ್ರಭೇದದ ಒಳಗೆಯೇ ಇರುವ ವೈವಿಧ್ಯವನ್ನು ತೋರಿಸಿಕೊಡುತ್ತದೆ. ಅವುಗಳ ವಿಶಿಷ್ಟ ರೂಪಲಕ್ಷಣಗಳು ಮತ್ತು ಸಾಂಸ್ಕೃತಿಕ ಮಹತ್ವವು ಅವುಗಳನ್ನು ನೈಸರ್ಗಿಕ ಪ್ರಪಂಚದಲ್ಲಿ ಕುತೂಹಲಕಾರಿ ಮತ್ತು ಸೌಂದರ್ಯ ಹಾಗೂ ನಿಗೂಢತೆಯ ಸಂಕೇತವನ್ನಾಗಿ ಮಾಡಿವೆ. ಹುಲಿಗಳ ವಾಸಸ್ಥಾನಗಳನ್ನು ರಕ್ಷಿಸುವ
  ಮತ್ತು ಹುಲಿಗಳನ್ನು ಉಳಿಸುವ ಗುರಿಹೊಂದಿರುವ ವಿವಿಧ ರೀತಿಯ ಸಂರಕ್ಷಣಾ ಪ್ರಯತ್ನಗಳು ಈ ಕೃಷ್ಣವರ್ಣದ ಅದ್ಭುತವಾದ ಹುಲಿಗಳ ವಂಶವಾಹಿ ವೈವಿಧ್ಯವನ್ನು ಉಳಿಸಿಕೊಳ್ಳುವುದಕ್ಕೂ ನಿರ್ಣಾಯಕ ಅಂಶಗಳಾಗಿವೆ.