ಭಾನುವಾರ, 14 ಏಪ್ರಿಲ್ 2024
×
ADVERTISEMENT
ಈ ಕ್ಷಣ :
ADVERTISEMENT
ADVERTISEMENT

ಸ್ಪಂದನ ಅಂಕಣ: ಗರ್ಭಿಣಿಯರ ರಕ್ತಹೀನತೆ: ನಿರ್ಲಕ್ಷ್ಯ ಸಲ್ಲದು

Published 30 ಮಾರ್ಚ್ 2024, 0:16 IST
Last Updated 30 ಮಾರ್ಚ್ 2024, 0:16 IST
ಅಕ್ಷರ ಗಾತ್ರ

ಮದುವೆಯಾಗಿ ಮೂರು ವರ್ಷಗಳಾಗಿವೆ. ಮೊದಲನೇ ಬಾರಿ ಗರ್ಭ ಧರಿಸಿದ್ದೇನೆ. ಈಗ ನಾಲ್ಕನೇ ತಿಂಗಳು. ವೈದ್ಯರು ರಕ್ತಹೀನತೆ ಇದೆ ಎಂದಿದ್ದಾರೆ. ಹಿಮೋಗ್ಲೋಬಿನ್‌ ಪ್ರಮಾಣ 8.9 ಇದೆ ಎಂದು ವೈದ್ಯರು ಮಾತ್ರೆ ಬರೆದುಕೊಟ್ಟಿದ್ದಾರೆ. ಸರಿಯಾಗದಿದ್ದರೆ ಇಂಜೆಕ್ಷನ್‌ ಅಥವಾ ರಕ್ತ ನೀಡಬೇಕು ಎಂದು ತಿಳಿಸಿದ್ದಾರೆ. ಏನು ಮಾಡಬೇಕು ತಿಳಿಸಿ.

ರಂಜಿತಾ, 29 ವರ್ಷ.

ನಿಮಗಿರುವುದು ರಕ್ತಹೀನತೆಯ ಸಮಸ್ಯೆ. ಇದು

ಶೇ 60ರಿಂದ 70 ಗರ್ಭಿಣಿಯರನ್ನು ಕಾಡುವ ಸಮಸ್ಯೆ. ನಿರ್ಲಕ್ಷ್ಯಿಸಿದರೆ ತಾಯಿ ಮತ್ತು ಮಗುವಿಗೆ ತೊಂದರೆಯಾಗಬಹುದು. ಇದು ಮಧ್ಯಮತರದ ರಕ್ತಹೀನತೆ. ಗರ್ಭಧಾರಣೆಯಲ್ಲಿ ಕೆಂಪುರಕ್ತಕಣಗಳು ಹೆಚ್ಚಾಗುವುದಿಲ್ಲ. ಸಹಜವಾಗಿಯೇ ರಕ್ತಹೀನತೆ ಉಂಟಾಗುತ್ತದೆ. ಸರಿಯಾದ ಸಮಯದಲ್ಲಿ ಚಿಕಿತ್ಸೆ ತೆಗೆದುಕೊಳ್ಳಿ. ರಕ್ತಹೀನತೆಗೆ ಆನುವಂಶೀಯ ಕಾಯಿಲೆಗಳಾದ ಥಲೆಸೇಮಿಯಾ ಹಾಗೂ ಸಿಕ್ಕಲ್‌ಸೆಲ್‌ ಕಾಯಿಲೆಗಳು ಅಪರೂಪಕ್ಕೆ ಕಾರಣವಾಗಬಹುದಾದರೂ ಕಬ್ಬಿಣಾಂಶದ ಕೊರತೆಯೇ ಪ್ರಮುಖ ಕಾರಣವಾಗಿರುತ್ತದೆ. ಶರೀರದ ಯಾವುದೇ ಭಾಗದಲ್ಲಿ ರಕ್ತಸ್ರಾವವಾಗುತ್ತಿದ್ದಲ್ಲಿ ರಕ್ತಹೀನತೆ ಉಂಟಾಗಬಹುದು. ಮೂಲವ್ಯಾಧಿ ಸಮಸ್ಯೆ, ಮಲೇರಿಯಾ, ಡೆಂಗಿಯಿಯಂದ ಬಳಲುವುದು, ಕರುಳಿನಲ್ಲಿ ಜಂತುಹುಳುಗಳ ಬಾಧೆ, ಕರುಳಿನಲ್ಲಿ ಪೌಷ್ಠಿಕಾಂಶಗಳ ಹೀರುವಿಕೆಯಾಗದೇ ಇರುವುದರಿಂದಲೂ ಈ ಸಮಸ್ಯೆ ಉಂಟಾಗಬಹುದು.

ರಕ್ತಹೀನತೆ ಇದ್ದವರಿಗೆ ಪದೇ ಪದೇ ಸುಸ್ತಿನ ಅನುಭವ, ತಲೆ ತಿರುಗುವುದು, ಸ್ವಲ್ಪ ಕೆಲಸ ಮಾಡಿದರೂ ಏದುಸಿರು ಬರುವುದು, ಎದೆ ಬಡಿದುಕೊಂಡ ಹಾಗೆ ಆಗುವ ಅನುಭವ ಆಗಬಹುದು. ಹಿಮೊಗ್ಲೋಬಿನ್‌ 7 ಗ್ರಾಂಕ್ಕಿಂತ ಕಡಿಮೆ ಇದ್ದರೆ ತೀವ್ರತರದಹ ರಕ್ತಹೀನತೆ ಎಂದೆನಿಸಿಕೊಳ್ಳುತ್ತದೆ. ಆಗ ಕಬ್ಬಿಣಾಂಶದ ಇಂಜೆಕ್ಷನ್‌ ಹಾಕುವುದು ಅಗತ್ಯವಾಗುತ್ತದೆ. ನಿಮಗೆ 9 ಗ್ರಾಂ ಇರುವುದರಿಂದ ಸೂಕ್ತ ಆಹಾರ ಕ್ರಮ ಅನುಸರಿಸಿದರೆ ಸಮಸ್ಯೆ ಸರಿಪಡಿಸಬಹುದು. ಹೆಚ್ಚು ಹಸಿರು ಸೊಪ್ಪು, ತರಕಾರಿಗಳು, ದ್ರಾಕ್ಷಿ, ಅಂಜೂರ, ಖರ್ಜೂರ ಸೇವಿಸಿ. ವೈದ್ಯರು ಕೊಡುವ ಕಬ್ಬಿಣಾಂಶದ ಮಾತ್ರೆ, ಫೋಲಿಕ್‌ ಆ್ಯಸಿಡ್‌ ಮಾತ್ರೆಗಳನ್ನು ನಿಯಮಿತವಾಗಿ ಸೇವಿಸಿದರೆ ರಕ್ತಹೀನತೆ ಸರಿ ಹೋಗುತ್ತದೆ.

ವಿಟಮಿನ್ ‘ಸಿ’ ಯುಕ್ತ (ನೆಲ್ಲಿಕಾಯಿ, ನಿಂಬೆ, ಕಿತ್ತಳೆ ಇತ್ಯಾದಿ) ಆಹಾರ ಜೊತೆಗೆ ಸೇವಿಸುವುದರಿಂದ ಕಬ್ಬಿಣಾಂಶ ಹೀರುವಿಕೆ ಚೆನ್ನಾಗಿ ಆಗುತ್ತದೆ. ಕಬ್ಬಿಣಾಂಶದ ಮಾತ್ರೆಗಳನ್ನ ಹಾಲು, ಕಾಫಿ, ಟೀ ಮತ್ತು ಕ್ಯಾಲ್ಸಿಯಂ ಮಾತ್ರೆಗಳ ಜೊತೆಗೆ ಸೇವಿಸಲೇಬೇಡಿ. ಇದರಿಂದ ಕಬ್ಬಿಣಾಂಶ ಹೀರುವಿಕೆ ಚೆನ್ನಾಗಿ ಆಗುವುದಿಲ್ಲ. ವೈದ್ಯರ ಮೇಲ್ವಿಚಾರಣೆಯಲ್ಲಿ ಸೂಕ್ತಚಿಕಿತ್ಸೆ ತೆಗೆದುಕೊಂಡು ರಕ್ತಹೀನತೆ ಸರಿಪಡಿಸಿಕೊಂಡು ಧೈರ್ಯದಿಂದಿರಿ.

ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.

ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT