ಲಸಿಕೆಯನ್ನು ತಯಾರಿಸಲು ಭಾರತದ ಕಂಪನಿಗಳನ್ನು ಬಳಸಿಕೊಳ್ಳಲು ರಷ್ಯಾ ಉತ್ಸುಕವಾಗಿದೆ.

‘ಭಾರತದ ಹಲವು ಕಂಪನಿಗಳ ಜತೆಗೆ ಮಾತುಕತೆ ನಡೆದಿದೆ. ಎರಡು–ಮೂರು ಕಂಪನಿಗಳು ತಯಾರಿಕೆಗೆ ಮುಂದೆ ಬಂದಿವೆ. ರಷ್ಯಾ ಸರ್ಕಾರ ಮತ್ತು ಲಸಿಕೆ ಅಭಿವೃದ್ಧಿ ತಂಡದ ಜತೆಗೆ ಸಂಪರ್ಕದಲ್ಲಿವೆ’ ಎಂದು ನೀತಿ ಆಯೋಗದ ಸದಸ್ಯ ವಿ.ಕೆ. ಪಾಲ್‌ ಹೇಳಿದ್ದಾರೆ. ಭಾರತದಲ್ಲಿ ಲಸಿಕೆ ತಯಾರಿಕೆಯ ಚರ್ಚೆಯು ಎರಡೂ ದೇಶಗಳಿಗೂ ಅನುಕೂಲಕರ ರೀತಿಯಲ್ಲಿ ನಡೆಯುತ್ತಿದೆ ಎಂದು ಅವರು ತಿಳಿಸಿದ್ದಾರೆ.

ಈ ಲಸಿಕೆಯನ್ನು ದೊಡ್ಡ ಪ್ರಮಾಣದಲ್ಲಿ ತಯಾರಿಸುವುದು ಭಾರತಕ್ಕೆ ಸಾಧ್ಯವಿದೆ. ಇದು ಭಾರತ ಮತ್ತು ರಷ್ಯಾಕ್ಕೆ ಒಳ್ಳೆಯದು. ತಯಾರಿಸಲಾದ ಲಸಿಕೆಯಲ್ಲಿ ಒಂದಷ್ಟು ಭಾಗವನ್ನು ಜಗತ್ತಿನ ಇತರ ದೇಶಗಳಿಗೂ ಪೂರೈಸಬಹುದು ಎಂದು ಅವರು ಹೇಳಿದ್ದಾರೆ.

ಲಸಿಕೆಗೆ ಸಂಬಂಧಿಸಿದ ದತ್ತಾಂಶಗಳನ್ನು ಭಾರತದ ವಿಜ್ಞಾನಿಗಳು ಪರಿಶೀಲಿಸಿದ್ದಾರೆ. ಅಗತ್ಯ ಬಿದ್ದರೆ ಮೂರನೇ ಹಂತದ ಪ್ರಯೋಗಗಳನ್ನೂ ನಡೆಸಲಾಗುವುದು ಎಂದು ಅವರು ಮಾಹಿತಿ ನೀಡಿದ್ದಾರೆ.

ಈ ಲಸಿಕೆ ಅಭಿವೃದ್ಧಿಗೆ ರಷ್ಯಾವು ತುರ್ತು ಅನುಮೋದನೆಗಳನ್ನು ನೀಡಿದೆ. ಲಸಿಕೆ ಅಭಿವೃದ್ಧಿ ಪ್ರಕ್ರಿಯೆಯನ್ನು ತರಾತುರಿಯಲ್ಲಿ ನಡೆಸಿದೆ ಎಂದು ಬೇರೆ ದೇಶಗಳು ಟೀಕಿಸಿದ್ದವು. ಆದರೆ, ದಿ ಲ್ಯಾನ್ಸೆಟ್‌ ನಿಯತಕಾಲಿಕದಲ್ಲಿ ಲಸಿಕೆಯ ಪೂರ್ವಭಾವಿ ಪ್ರಯೋಗದ ಫಲಿತಾಂಶದ ಬಗ್ಗೆ ಪ್ರಬಂಧ ಪ್ರಕಟವಾಗಿದೆ. ಲಸಿಕೆ ಪಡೆದುಕೊಂಡವರಲ್ಲಿ 42 ದಿನಗಳಲ್ಲಿ ಯಾವುದೇ ಸಮಸ್ಯೆಗಳು ಕಾಣಿಸಿಕೊಂಡಿಲ್ಲ. ಲಸಿಕೆ ಪಡೆದು 21 ದಿನಗಳಲ್ಲಿ ಪ್ರತಿರೋಧ ಶಕ್ತಿಯೂ ರೂಪುಗೊಂಡಿದೆ ಎಂದು ಈ ಪ್ರಬಂಧದಲ್ಲಿ ಹೇಳಲಾಗಿದೆ. ಹಾಗಾಗಿ, ಈ ಲಸಿಕೆಯು ಭರವಸೆ ಮೂಡಿಸಿದೆ.