ನೆಗೆಟಿವ್‌ ಬಂದರೂ ಸೋಂಕಿರುವ ಸಾಧ್ಯತೆ

ಈಗಿರುವ ಮಾರ್ಗಸೂಚಿ ಪ್ರಕಾರ, ಸೋಂಕಿನ ಲಕ್ಷಣಗಳಿಲ್ಲದ, ಕಡಿಮೆ ಲಕ್ಷಣ ಹೊಂದಿರುವ, ಕೆಲವು ಲಕ್ಷಣ ಹೊಂದಿರುವ ಮತ್ತು ಗಂಭೀರ ಲಕ್ಷಣ ಹೊಂದಿರುವವರು ಎಂದು ನಾಲ್ಕು ಗುಂಪಾಗಿ ವಿಭಾಗಿಸಿ ಚಿಕಿತ್ಸೆ ನೀಡಲಾಗುತ್ತಿದೆ. ಶ್ವಾಸಕೋಶ ಸಂಬಂಧಿ ಕಾಯಿಲೆಯಿಂದ ಬಳಲುತ್ತಿರುವವರು ಆರ್‌ಟಿ–ಪಿಸಿಆರ್‌ ಪರೀಕ್ಷೆಗೊಳಪಟ್ಟಾಗ ನೆಗೆಟಿವ್ ಎಂದು ವರದಿ ಬಂದಿದ್ದರೂ, ಸಿಟಿ ಸ್ಕ್ಯಾನ್‌ಗೆ ಒಳಪಟ್ಟಾಗ, ಗಂಭೀರ ಸ್ವರೂಪದ ಸೋಂಕಿನ ಲಕ್ಷಣಗಳು ಹೊಂದಿರುವುದು ಪತ್ತೆಯಾಗಿದೆ. ಆದರೆ, ಒಟ್ಟು ಸೋಂಕಿತರಲ್ಲಿ ಇಂತಹ ಪ್ರಕರಣಗಳ ಶೇ 5ಕ್ಕಿಂತ ಕಡಿಮೆ ಎಂದು ವೈದ್ಯರು ಹೇಳುತ್ತಾರೆ.

ಕೋವಿಡ್‌ ಪರೀಕ್ಷೆಯ ರಾಜ್ಯ ನೋಡಲ್ ಅಧಿಕಾರಿ, ಜಯದೇವ ಆಸ್ಪತ್ರೆಯ ಡಾ. ಸಿ.ಎನ್. ಮಂಜುನಾಥ್, ‘ಜಯದೇವ ಆಸ್ಪತ್ರೆಯಲ್ಲಿ ಕೆಲಸ ಮಾಡುವ ಇಬ್ಬರು ಶುಶ್ರೂಷಕರು ಆರ್‌ಟಿ–ಪಿಸಿಆರ್ ಪರೀಕ್ಷೆಗೆ ಒಳಪಟ್ಟಿದ್ದರು. ನೆಗೆಟಿವ್ ಎಂದು ವರದಿ ಬಂದಿತ್ತು. ಆದರೆ, ಅವರು ಸಿಟಿ ಸ್ಕ್ಯಾನ್‌ಗೆ ಒಳಪಟ್ಟಿದ್ದಾಗ, ಕೋವಿಡ್ ಸೋಂಕಿನ ಲಕ್ಷಣಗಳು ಕಂಡು ಬಂದಿವೆ’ ಎಂದರು.

‘ಶುಶ್ರೂಷಕರಿಗೆ ರೆಮ್ಡಿಸಿವಿರ್‌ ಇಂಜೆಕ್ಷನ್‌ ನೀಡಲಾಯಿತು. ನಂತರ ಅವರಿಗೆ ಮೂರನೇ ಬಾರಿ ಆರ್‌ಟಿ–ಪಿಸಿಆರ್ ಪರೀಕ್ಷೆಗೆ ಒಳಪಡಿಸಿದಾಗ ಕೋವಿಡ್‌ ಪಾಸಿಟಿವ್ ಎಂದು ವರದಿ ಬಂದಿತು’ ಎಂದು ಅವರು ಹೇಳಿದರು.

‘ಕಳೆದ ಮಾರ್ಚ್‌ನಿಂದಲೂ ಇಂಥದ್ದೊಂದು ಚರ್ಚೆ ಚಾಲ್ತಿಯಲ್ಲಿದೆ. ಮೊದಲ ಬಾರಿ ಗಂಟಲ ದ್ರವ ಮಾದರಿ ನೀಡಿದಾಗ ರೋಗಿಯ ವರದಿ ನೆಗೆಟಿವ್‌ ಬಂದಿರಬಹುದು. ಅದೇ ರೋಗಿಯು ಉಸಿರಾಟದ ಸಮಸ್ಯೆಯಿಂದ ಬಳಲುತ್ತಿರುವಾಗ ಪರೀಕ್ಷೆ ನಡೆಸಿದರೆ ಪಾಸಿಟಿವ್ ಬರಬಹುದು. ಇಂತಹ ಸಂದರ್ಭ
ದಲ್ಲಿ ಎಕ್ಸ್‌ರೇ ತೆಗೆಸುವ ಅಥವಾ ಸಿಟಿ ಸ್ಕ್ಯಾನ್‌ಗೆ ಒಳಪಡಿಸುವ ಅಗತ್ಯವಿದೆ’ ಎಂದು ಡಾ. ತ್ರಿಲೋಕ್‌ ಚಂದ್ರ ಹೇಳುತ್ತಾರೆ.