ಬೆಂಗಳೂರು: ಸರ್ಕಾರಿ ಕೋಟಾದಡಿ ಖಾಸಗಿ ಆಸ್ಪತ್ರೆಗಳಿಗೆ ದಾಖಲಾಗುವ ಕೋವಿಡ್ ರೋಗಿಗಳ ಚಿಕಿತ್ಸಾ ದರದಲ್ಲಿ ಹೆಚ್ಚಳ ಮಾಡಿ ರಾಜ್ಯ ಸರ್ಕಾರ ಗುರುವಾರ ಆದೇಶ ಹೊರಡಿಸಿದೆ.
ಜನರಲ್ ವಾರ್ಡ್ನ ಪ್ರತಿದಿನದ ಚಿಕಿತ್ಸಾ ವೆಚ್ಚ ಈ ಹಿಂದೆ ₹ 5,200 ಇದ್ದು, ಅದನ್ನೇ ಮುಂದುವರಿಸಲಾಗಿದೆ. ಎಚ್ಡಿಯು ವಾರ್ಡ್ನ ಪ್ರತಿ ದಿನದ ದರವನ್ನು ₹ 7,000ದಿಂದ ₹ 8,000ಕ್ಕೆ ಹೆಚ್ಚಿಸಲಾಗಿದೆ.
ವೆಂಟಿಲೇಟರ್ ರಹಿತ ತೀವ್ರ ನಿಗಾ ಘಟಕದ ವೆಚ್ಚವನ್ನು ₹ 8,500ದಿಂದ ₹ 9000ಕ್ಕೆ ಮತ್ತು ವೆಂಟಿಲೇಟರ್ ಸಹಿತ ತೀವ್ರ ನಿಗಾ ಘಟಕದ ಚಿಕಿತ್ಸಾ ವೆಚ್ಚವನ್ನು ₹ 10,000ದಿಂದ ₹ 11,500ಕ್ಕೆ ಏರಿಕೆ ಮಾಡಲಾಗಿದೆ.
‘ಪರಿಷ್ಕೃತ ದರವು ಪಿಪಿಇ ಕಿಟ್ ಹಾಗೂ ಪರಿಕರಗಳನ್ನು ಒಳಗೊಂಡಿರುತ್ತದೆ. ಸಾರ್ವಜನಿಕ ಆರೋಗ್ಯ ಪ್ರಾಧಿಕಾರದಿಂದ ಶಿಫಾರಸುಗೊಂಡಿರುವ ಕೋವಿಡ್ ರೋಗಿಗಳ ಚಿಕಿತ್ಸೆಗೆ ಈ ದರವನ್ನೇ ವಿಧಿಸಬೇಕು’ ಎಂದು ಮುಖ್ಯ ಕಾರ್ಯದರ್ಶಿ ಪಿ. ರವಿಕುಮಾರ್ ಅವರು ಆದೇಶದಲ್ಲಿ ತಿಳಿಸಿದ್ದಾರೆ.