ನವದೆಹಲಿ: ಬ್ರಹ್ಮಾಂಡವನ್ನು ಇನ್ನಷ್ಟು ಆಳವಾಗಿ ಅರಿತುಕೊಳ್ಳುವ ಯುತ್ನವಾಗಿ ಎರಡು ಭೂಖಂಡಗಳನ್ನು ನೆಲೆಯಾಗಿಸಿ ಜಗತ್ತಿನತ್ತ ದೃಷ್ಟಿ ಹರಿಸಲಿರುವ ಬೃಹತ್‌ ಟೆಲಿಸ್ಕೋಪ್‌ ಯೋಜನೆ ಕಾರ್ಯಗತಕ್ಕಾಗಿ ಭಾರತ ₹1,250 ಕೋಟಿ ನೆರವು ನೀಡಲಿದೆ.
ವಿಶ್ವದ ಬೃಹತ್‌ ರೇಡಿಯೊ ಟೆಲಿಸ್ಕೋಪ್‌ ಎನ್ನಲಾದ ಸ್ಕ್ವೈರ್ ಕಿಲೋಮೀಟರ್ ಆ್ಯರೆ (ಎಸ್‌ಕೆಎ) ಯೋಜನೆಗೆ ನೆರವು ನೀಡುವ ಪ್ರಸ್ತಾವಕ್ಕೆ ಕೇಂದ್ರ ಸಚಿವ ಸಂಪುಟವು ಅನುಮೋದನೆ ನೀಡಿದೆ.
ಆಸ್ಟ್ರೇಲಿಯಾದ ಪರ್ತ್ ಮತ್ತು ದಕ್ಷಿಣ ಆಫ್ರಿಕಾದ ಕೇಪ್‌ ಟೌನ್‌ ಸಮೀಪ ಈ ಬೃಹತ್‌ ಟೆಲಿಸ್ಕೋಪ್‌ ನೆಲೆ ಹೊಂದಲಿದ್ದು, ಕಾರ್ಯನಿರ್ವಹಿಸಲಿದೆ.
ಅತ್ಯಾಧುನಿಕ ತಂತ್ರಜ್ಞಾನ, ಕ್ಷಿಪ್ರವಾಗಿ ಕಾರ್ಯನಿರ್ವಹಿಸಲಿರುವ ಜಗತ್ತಿನ ಸೂಪರ್‌ ಕಂಪ್ಯೂಟರ್‌ಗಳನ್ನು ಈ ಯೋಜನೆಗೆ ಬಳಸಲಾಗುತ್ತಿದೆ. ಇದು, ಜಗತ್ತನ್ನು ಆಳವಾಗಿ, ವಿವರವಾಗಿ ಅರಿತುಕೊಳ್ಳುವ ಕಾರ್ಯಕ್ಕೆ ಹೊಸ ದೃಷ್ಟಿಕೋನ ನೀಡಲಿದೆ ಎನ್ನಲಾಗಿದೆ. ಕಪ್ಪುರಂಧ್ರದ ನಿಗೂಢತೆ, ಗುರುತ್ವಾಕರ್ಷಣ ಅಲೆಗಳ ಚಲನೆ ಅರಿಯುವುದು ಸೇರಿದಂತೆ ಹಲವು ಮಹತ್ವದ ಉದ್ದೇಶಗಳ ಗುರಿ ಸಾಧನೆ ಈ ಯೋಜನೆಯ ಹಿಂದಿದೆ.
ಭಾರತ ಸೇರಿ 10ಕ್ಕೂ ಹೆಚ್ಚು ರಾಷ್ಟ್ರಗಳು ಈ ಯೋಜನೆಯಲ್ಲಿ ಭಾಗಿಯಾಗಿವೆ. ಈ ಕುರಿತ ಹೇಳಿಕೆಯಲ್ಲಿ ಅಣುಶಕ್ತಿ ಇಲಾಖೆಯು, ‘ಎಸ್‌ಕೆಯ ಅಂತರರಾಷ್ಟ್ರೀಯ ಮೆಗಾ ವಿಜ್ಞಾನ ಯೋಜನೆಗೆ ₹ 1,250 ಕೋಟಿ ಒದಗಿಸುವ ಮೂಲಕ ಭಾರತ ಭಾಗಿಯಾಗಲಿದೆ’ ಎಂದು ತಿಳಿಸಿದೆ.
ಎನ್‌ಸಿಆರ್‌ಎ ಮತ್ತು ಬೆಂಗಳೂರಿನ ರಾಮನ್ ಸಂಶೋಧನಾ ಸಂಸ್ಥೆಯ ವಿಜ್ಞಾನಿಗಳ ನೇತೃತ್ವದಲ್ಲಿ ಭಾರತೀಯ ರೇಡಿಯೊ ಖಗೋಳತಜ್ಞರು, ಯೋಜನೆ ರೂಪಿಸುವ, ವಿನ್ಯಾಸ ಮತ್ತು ಕಾರ್ಯಗತಗೊಳಿಸುವ ಆರಂಭಿಕ ಹಂತದ ಪ್ರಕ್ರಿಯೆಗಳಲ್ಲಿ ಭಾಗಿಯಾಗಿದ್ದಾರೆ.
