ಜಗದೀಶ ಶೆಟ್ಟರ್‌ ಮತ್ತೆ ಬಿಜೆಪಿ ಸೇರಿದ್ದು ಯಾಕೆ?

ವಿಧಾನಸಭೆ ಚುನಾವಣೆಯಲ್ಲಿ ಹುಬ್ಬಳ್ಳಿ– ಧಾರವಾಡ ಸೆಂಟ್ರಲ್‌ ಕ್ಷೇತ್ರದ ಟಿಕೆಟ್‌ ಆಕಾಂಕ್ಷಿಯಾಗಿದ್ದ ಶೆಟ್ಟರ್‌ ಅವರಿಗೆ ಬಿಜೆಪಿ ಟಿಕೆಟ್‌ ನಿರಾಕರಿಸಿತು. ಇದರಿಂದ ಸಿಟ್ಟಿಗೆದ್ದ ಅವರು, ‘ಬಿಜೆಪಿಯಲ್ಲಿ ಲಿಂಗಾಯತರ ಕಡೆಗಣನೆ ಆಗುತ್ತಿದೆ’ ಎಂದು ಕಿಡಿಕಾರಿದ್ದರು. ಪಕ್ಷ ತೊರೆದು, ಕಾಂಗ್ರೆಸ್‌ನಿಂದ ಚುನಾವಣಾ ಕಣಕ್ಕಿಳಿದರು. ಪರಾಭವಗೊಂಡರೂ ವಿಧಾನ ಪರಿಷತ್‌ ಸದಸ್ಯರಾಗುವಲ್ಲಿ ಸಫಲರಾದರು.

ತಮಗೆ ಟಿಕೆಟ್‌ ತಪ್ಪಿಸಿದ್ದನ್ನೇ ಗುರಿಯಾಗಿಸಿಕೊಂಡು ಶೆಟ್ಟರ್ ಸಭೆ, ಸಮಾರಂಭಗಳಲ್ಲಿ ಬಿಜೆಪಿ ವಿರುದ್ಧ ‘ಲಿಂಗಾಯತ ವಿರೋಧಿ ಪಕ್ಷ’ ಎಂದು ಬಿಂಬಿಸಲು ಪ್ರಯತ್ನಿಸಿದರು. ಇದಕ್ಕೆ ಕೆಲ ಲಿಂಗಾಯತ ಮುಖಂಡರು, ಮಠಾಧೀಶರು ಧ್ವನಿಗೂಡಿಸಿದರು. ವಿಧಾನಸಭೆ ಚುನಾವಣೆಯಲ್ಲಿ ಉತ್ತರ ಕರ್ನಾಟಕದ ಭಾಗದಲ್ಲಿ ಇದು ಪರಿಣಾಮ ಬೀರಿತು. ಬಿಜೆಪಿ ಹಲವೆಡೆ ಪರಾಭವಗೊಂಡಿತು.

‘ವಿಧಾನಸಭೆಯಲ್ಲಿ ಉಂಟಾದ ಪರಿಸ್ಥಿತಿ ಲೋಕಸಭೆಯಲ್ಲಿ ಪುನರಾವರ್ತನೆ ಆಗದಿರಲಿ ಎಂಬ ಉದ್ದೇಶದಿಂದ ಶೆಟ್ಟರ್‌ ಅವರನ್ನು ಮತ್ತೆ ಪಕ್ಷಕ್ಕೆ ಸೇರಿಸಿಕೊಂಡಿದೆ. ಲೋಕಸಭೆ ಚುನಾವಣೆಯಲ್ಲಿ ವಿಶೇಷವಾಗಿ ಉತ್ತರ ಕರ್ನಾಟಕ ಭಾಗದಲ್ಲಿ ಹೆಚ್ಚು ಸ್ಥಾನ ಗೆಲ್ಲಲು ಸಹಕಾರಿಯಾಗಲಿದೆ’ ಎಂದು ಪಕ್ಷದ ಮುಖಂಡರೊಬ್ಬರು ತಿಳಿಸಿದರು.

ಒಗ್ಗದ ಕಾಂಗ್ರೆಸ್‌ ವಾತಾವರಣ

ಜನಸಂಘದ ಶಿಸ್ತನ್ನು ಮೈಗೂಡಿಸಿಕೊಂಡಿದ್ದ ಶೆಟ್ಟರ್‌ ಅವರಿಗೆ ಕಾಂಗ್ರೆಸ್‌ ವಾತಾವರಣ ಹಿಡಿಸಲಿಲ್ಲ. ಸಮಯ ಪಾಲನೆ, ಶಿಸ್ತು ಬದ್ಧ ಕಾರ್ಯನಿರ್ವಹಣೆ ಹೇಗಿರಬೇಕೆಂದು ಅವರು ಸಭೆಯೊಂದರಲ್ಲಿ ಕಾಂಗ್ರೆಸ್‌ ಕಾರ್ಯಕರ್ತರಿಗೆ ಚಾಟಿ ಬೀಸಿದ್ದರು. ಇದಕ್ಕೆ ಕಾರ್ಯಕರ್ತರು ಆಕ್ಷೇಪಿಸಿದ್ದರು. ‘ಶೆಟ್ಟರ್‌ ಜೊತೆ ಬಂದಿದ್ದ ಮುಖಂಡರಾದ ನಾಗೇಶ ಕಲಬುರ್ಗಿ ಹಾಗೂ ಮಲ್ಲಿಕಾರ್ಜುನ ಸಾಹುಕಾರ್‌ ಅವರನ್ನು ಕೂಡ ಕಾರ್ಯಕರ್ತರು ಕಡೆಗಣಿಸುತ್ತಿದ್ದರು’ ಎಂಬ ಮಾತುಗಳೂ ಇವೆ.

ಬೆಳಗಾವಿ ಟಿಕೆಟ್‌

ಬೆಳಗಾವಿ ಬಿಜೆಪಿ ಸಂಸದೆ ಮಂಗಲಾ ಅಂಗಡಿ ಈ ಸಲ ಸ್ಪರ್ಧೆಯಿಂದ ಹಿಂದಕ್ಕೆ ಸರಿಯುವ ಸಾಧ್ಯತೆ ಹೆಚ್ಚಿದೆ. ಈ ಕ್ಷೇತ್ರದಿಂದ ಸ್ಪರ್ಧಿಸಲು ಜಗದೀಶ ಶೆಟ್ಟರ್‌ ಅಥವಾ ಅವರ ಸೊಸೆ (ಮಂಗಲಾ ಅಂಗಡಿ ಅವರ ಪುತ್ರಿ) ಅವರಿಗೆ ಟಿಕೆಟ್‌ ನೀಡುವ ಸಾಧ್ಯತೆ ಇದೆ ಎಂದು ಹೇಳಲಾಗುತ್ತಿದೆ.

‘ಸಚಿವ ಸ್ಥಾನ ಸಿಗಲಿಲ್ಲ’

ಜಗದೀಶ ಶೆಟ್ಟರ್‌ ಅವರಿಗೆ ಸಚಿವ ಸ್ಥಾನ ನೀಡಬೇಕೆಂದು ಅಲ್ಲಲ್ಲಿ ಕೆಲ ಮುಖಂಡರು ಒತ್ತಾಯಿಸಿದರೂ ಸ್ಪಂದನೆ ಸಿಕ್ಕಿರಲಿಲ್ಲ. ಶೆಟ್ಟರ್‌ ಬಿಜೆಪಿ ತೊರೆದಾಗ ಅವರಿಗೆ ಪ್ರಮುಖ ಮುಖಂಡರು ಅಥವಾ  ಮಹಾನಗರ ಪಾಲಿಕೆಯ ಸದಸ್ಯರು ಜೊತೆಯಾಗಲಿಲ್ಲ. ಇದರಿಂದ ಅವರಿಗೆ ಭ್ರಮನಿರಸನವಾಯಿತು. ಕಾಂಗ್ರೆಸ್‌ ತೊರೆಯಲು ಅವರಿಗೆ ಇವೆಲ್ಲ ಕಾರಣವಾಗಿರಬಹುದು ಎನ್ನಲಾಗುತ್ತಿದೆ.