ಲಂಡನ್: ಕೆಲವು ಬ್ಯಾಕ್ಟೀರಿಯಾಗಳು ವಾತಾವರಣದ ದೂಳಿನ ಕಣಗಳ ಮೂಲಕ ಒಂದು ಖಂಡದಿಂದ ಇನ್ನೊಂದು ಖಂಡಕ್ಕೆ ಸಂಚರಿಸುವ ಸಾಧ್ಯತೆ ಇದೆ ಎಂದು ಹೊಸ ಅಧ್ಯಯನವೊಂದರಿಂದ ತಿಳಿದುಬಂದಿದೆ.
ಹೀಗೆ ದೂಳಿನ ಕಣದಲ್ಲಿ ಸೇರಿಕೊಂಡು ಪ್ರಯಾಣಿಸುವ ಸೂಕ್ಷ್ಮಾಣುಗಳು ಮನುಷ್ಯರು, ಪ್ರಾಣಿಗಳ ಆರೋಗ್ಯದ ಮೇಲೆ ಅಲ್ಲದೇ ಹವಾಮಾನ ಮತ್ತು ಪರಿಸರ ವ್ಯವಸ್ಥೆಯ ಮೇಲೂ ಪರಿಣಾಮಬೀರಲಿವೆ ಎಂದು ಅಧ್ಯಯನದಲ್ಲಿ ಉಲ್ಲೇಖವಾಗಿದೆ.
ಅಟ್ಮಾಸ್ಪಿಯರಿಕ್ ರಿಸರ್ಚ್ ಜರ್ನಲ್ನಲ್ಲಿ ಈ ಅಧ್ಯಯನ ವರದಿ ಪ್ರಕಟವಾಗಿದೆ. ಇದರಲ್ಲಿ ವಾಯುಮಂಡಲದ ಕಣಗಳ ಮೂಲಕ ಐಬೆರುಲೈಟ್ಸ್ ಎಂದು ಕರೆಯುವ ಸೂಕ್ಷ್ಮಾಣುಜೀವಿಗಳು ಹೇಗೆ ಖಂಡಾಂತರವಾಗಿ ಪ್ರಸಾರವಾಗಲಿವೆ ಎಂಬ ಮಾಹಿತಿಯನ್ನು ಉಲ್ಲೇಖಿಸಲಾಗಿದೆ.
ಸ್ಪೇನ್ನ ಗ್ರಾನಡಾ (ಯುಜಿಆರ್) ವಿಶ್ವವಿದ್ಯಾಲಯವು ಸೇರಿದಂತೆ, ವಿವಿಧ ವಿಜ್ಞಾನಿಗಳ ಪ್ರಕಾರ, ಗಾಳಿಯಲ್ಲಿರುವ ಕಣಗಳನ್ನು ಈ ಬ್ಯಾಕ್ಟೀರಿಯಾಗಳು ಸಾಗಾಟದ ವಾಹನವನ್ನಾಗಿ ಬಳಸಿಕೊಳ್ಳುತ್ತಿವೆ. ಇವು ಖಂಡಾಂತರವಾಗಿ ರೋಗ ಪ್ರಸಾರ ಮಾಡುವ ಅಪಾಯವನ್ನೂ ಉಂಟು ಮಾಡಬಹುದು.