ಚುರುಮುರಿ | ರಾಜಕೀಯ ಅಂದ್ರೆ..

‘ರೀ... ನಮ್ ಕಮಲಕ್ಕನ ಎಲೆಕ್ಷನ್ ಏನಾಗಬೋದು? ಗೆಲ್ತಾರ?’ ಮಡದಿ ಕೇಳಿದಳು.

. ‘ಯಾವ ಕಮಲಕ್ಕ? ಕರ್ನಾಟಕ ಆರ್ ಡೆಲ್ಲಿ?’

. ‘ನಿಮ್ತೆಲಿ, ನಾ ಕೇಳಿದ್ದು ಅಮೆರಿಕದ ಕಮಲಕ್ಕ. ಕಮಲಾ ಹ್ಯಾರಿಸ್ ಅಮೆರಿಕದ ಅಧ್ಯಕ್ಷರಾಗ್ತಾರಾ ಅಂತ’.

. ‘ಓ... ಅವರಾ? ಅಲ್ಲಿ ಟ್ರಂಪ್ ಪ್ಲಸ್ ಒನ್ ಬುಲೆಟ್ ಒಂದು ಕಡೆ, ಕಮಲಾ ಪ್ಲಸ್ ಬೈಡನ್ ಪ್ಲಸ್ ಒಬಾಮ ಇನ್ನೊಂದು ಕಡೆ. ರಾಜಕೀಯ ತೂಕ ನಮ್ ಕಡೀಗೇ ಇದೆ. ಗೆದ್ರೂ ಗೆಲ್ಲಬಹುದು’.

. ‘ಕರ್ನಾಟಕದಲ್ಲಿ ನಿಮ್ ಕಮಲಕ್ಕನ ಪಾದಯಾತ್ರೆ ನಡೆಯುತ್ತಾ?’

. ‘ಅದಕ್ಕೆ ತೆನೆಯಕ್ಕ ಅಡ್ಡಿಯಾಗಿದ್ಲು, ಈಗ ಪ್ಯಾಚಪ್ ಆಗೇತಂತೆ...’

. ‘ಯಾಕೆ, ಒಂದಾಗಿದ್ರಲ್ಲ? ಆಗ್ಲೇ ಬಿಟ್ಟೋಯ್ತಾ?’

. ‘ಬಿಟ್ಟೋಗಿಲ್ಲ... ಅದು ‘ವಿಷ’ದ ರಾಜಕೀಯ’.

. ‘ಕಮಲಕ್ಕನ ಪಾದಯಾತ್ರೆ ವಿರುದ್ಧ ಕಮಲ ಪಕ್ಷದೋರೇ ಇನ್ನೊಂದು ಪಾದಯಾತ್ರೆ ಮಾಡ್ತಾರಂತೆ?’

. ‘ಅದು ಭಿನ್ನ ರಾಜಕೀಯ. ಕಮಲೇ ಕಲಹೋತ್ಪತ್ತಿಹಿ...’

. ‘ಕಮಲಕ್ಕ ಪಾದಯಾತ್ರೆ ಮಾಡ್ತಿರೋದು ಬಂಡೇನ ಮುಖ್ಯಮಂತ್ರಿ ಮಾಡಾಕೆ ಅಂತ ವಿಜಯಪುರದ ಹುಲಿ ಹೇಳ್ತಿತ್ತು?’

. ‘ಅದು ಒಳರಾಜಕೀಯ... ಇದ್ರೂ ಇರಬೋದು...’

. ‘ಆಮೇಲೆ ಮೊನ್ನೆ ಬಂಡೆ ಸಾಹೇಬ್ರು ಡೆಲ್ಲೀಲಿ ನಮೋ ಸಾಹೇಬ್ರನ್ನ ಭೆಟ್ಟಿಯಾಗಿ ಖುಷ್ ಖುಷಿಯಾಗಿ ಮಾತಾಡಿದ್ರಂತೆ?’

. ‘ಅದು ಪಕ್ಕಾ ಲೆಕ್ಕಾಚಾರದ ರಾಜಕೀಯ’.

. ‘ಹೇ ಹೋಗ್ರಿ... ನಂಗೆ ತೆಲಿಬುಡ ಅರ್ಥ ಆಗಾವಲ್ದು, ಈ ರಾಜಕೀಯದಲ್ಲಿ ಎಷ್ಟು ನಮೂನಿ ರಾಜಕೀಯ ಅದಾವೆ?’

. ‘ಬಹಳ ಅದಾವೆ. ಒಣ ರಾಜಕೀಯ, ಬಣ ರಾಜಕೀಯ, ಹೆಣ ರಾಜಕೀಯ, ಹಣದ ರಾಜಕೀಯ, ಜಾತಿ ರಾಜಕೀಯ, ದ್ವೇಷ- ಹೊಂದಾಣಿಕೆ ರಾಜಕೀಯ... ಸಾಕಾ ಬೇಕಾ?’

. ‘ಸಾಕು, ಈಗ ಹೇಳ್ರಿ, ಈ ರಾಜಕೀಯ ಅಂದ್ರೇನು?’

. ‘ಅದು ನನಗೆ ಅರ್ಥ ಆದ ಮೇಲೆ ನಿನಗೆ ಹೇಳ್ತೀನಿ, ಹೋಗಿ ಒಂದ್ ಕಪ್ ಕಾಫಿ ಮಾಡ್ಕೊಂಡ್ ಬಾ’.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.