ರಾಜ್ಯದ ಗಡಿಯಲ್ಲಿ ಕೇರಳದ ತ್ಯಾಜ್ಯನಿಯಂತ್ರಣಕ್ಕೆ ಬೇಕು ಕಟ್ಟುನಿಟ್ಟಿನ ಕ್ರಮ

ಅಪಾಯಕಾರಿ ತ್ಯಾಜ್ಯವನ್ನು ಕೇರಳದಿಂದ ಕದ್ದುಮುಚ್ಚಿ ತಂದು ಕರ್ನಾಟಕದಗಡಿಗ್ರಾಮಗಳ ವ್ಯಾಪ್ತಿಯಲ್ಲಿ ಸುರಿಯುವ ಪರಿಪಾಟ ಇದ್ದುದನ್ನು ಕೇರಳ ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿಯೇ ಈಗ ಒಪ್ಪಿಕೊಂಡಿದೆ. ಇಂತಹ ಕುಕೃತ್ಯಗಳನ್ನು ನಿಯಂತ್ರಣಕ್ಕೆ ತರಲು ತಕ್ಷಣ ಕ್ರಮ ಜರುಗಿಸುವುದಾಗಿಯೂ ಅದು ಭರವಸೆ ನೀಡಿದೆ. ಕೇರಳದ ಈ ವಿಷಕಾರಿ ವೈದ್ಯಕೀಯ ತ್ಯಾಜ್ಯವು ರಾಜ್ಯದ ಪರಿಸರವನ್ನು ಮಲಿನಗೊಳಿಸುತ್ತಿದೆ ಎಂಬ ದೂರುಗಳು ವ್ಯಾಪಕವಾಗಿರುವ ಸಂದರ್ಭದಲ್ಲೇ ಈ ವಿದ್ಯಮಾನ ನಡೆದಿದೆ. ರಾಜ್ಯದ ಹಲವು ಅರಣ್ಯ ಪ್ರದೇಶಗಳು ಹಾಗೂ ಗಡಿ ಗ್ರಾಮಗಳನ್ನೇ ತಿಪ್ಪೆಗುಂಡಿ ಮಾಡಿಕೊಂಡ ಕೇರಳ ರಾಜ್ಯದವರು, ಅಲ್ಲಿ ವಿಷಕಾರಿ ತ್ಯಾಜ್ಯವನ್ನು ರಾತ್ರೋರಾತ್ರಿ ತಂದು ಸುರಿಯುತ್ತಿದ್ದುದು ಗುಟ್ಟಿನ ಸಂಗತಿಯಾಗಿ ಏನೂ ಉಳಿದಿರಲಿಲ್ಲ. ಅತ್ತ ‘ಸ್ವಚ್ಛ ಕೇರಳ’ ಪರಿಕಲ್ಪನೆ ಬಲಗೊಳ್ಳುತ್ತಿದ್ದಂತೆಯೇ ಆ ರಾಜ್ಯದ ಕಸವನ್ನು ಇತ್ತ ಕರ್ನಾಟಕದ ಗಡಿಯಲ್ಲಿ ತಂದು ಸುರಿಯುವ ದೊಡ್ಡ ಮಾಫಿಯಾ ತಲೆಎತ್ತಿದೆ. ಕರ್ನಾಟಕದ ಹಲವರು ತಮ್ಮ ಜಮೀನನ್ನೇ ಕಸ ಸುರಿಯಲು ಗುತ್ತಿಗೆಗೆ ನೀಡುವ ಮೂಲಕ ಈ ಕೃತ್ಯಕ್ಕೆ ಸಹಕರಿಸುತ್ತಿರುವ ಕುರಿತು ದೂರುಗಳಿವೆ. ಹಾಗೆಯೇ ಚಾಮರಾಜನಗರ ಜಿಲ್ಲಾ ಭಾಗದ ಚೆಕ್‌ಪೋಸ್ಟ್‌ಗಳಲ್ಲಿ ಸಡಿಲಗೊಂಡಿರುವ ತಪಾಸಣಾ ವ್ಯವಸ್ಥೆಯಿಂದ ಸಮಸ್ಯೆ ಬಿಗಡಾಯಿಸಿದೆ ಎಂದೂ ಹೇಳಲಾಗಿದೆ. ರಾಜ್ಯದ ಪರಿಸರಕ್ಕೆ ವಿಷ ಉಣಿಸುವ ಈ ಕಾನೂನುಬಾಹಿರ ಚಟುವಟಿಕೆಗಳ ವಿರುದ್ಧ ಮೈಸೂರು ಜಿಲ್ಲೆಯ ವಿವಿಧ ಪೊಲೀಸ್ ಠಾಣೆಗಳಲ್ಲಿ ಈಗಾಗಲೇ ಆರು ಪ್ರಕರಣಗಳು ದಾಖಲಾಗಿವೆ. ಅಲ್ಲದೆ, ನಂಜನಗೂಡಿನ ಕೈಗಾರಿಕಾ ಪ್ರದೇಶದಲ್ಲಿ ಕೇರಳದಿಂದ ತಂದ ತ್ಯಾಜ್ಯವನ್ನು ಸುರಿಯುತ್ತಿದ್ದ ಇಬ್ಬರು ವ್ಯಕ್ತಿಗಳನ್ನು ಇತ್ತೀಚೆಗಷ್ಟೇ ಬಂಧಿಸಲಾಗಿದೆ. ಗಡಿಭಾಗದಲ್ಲಿ ಸುರಿದ ವಿಷಕಾರಿ ವೈದ್ಯಕೀಯ, ಜೈವಿಕ ಹಾಗೂ ಪ್ಲಾಸ್ಟಿಕ್‌ ತ್ಯಾಜ್ಯದಿಂದ ರಾಜ್ಯದ ಅರಣ್ಯ ಪ್ರದೇಶದ ಪರಿಸರ ಹಾಳಾಗುತ್ತಿದ್ದು, ಗಡಿಗ್ರಾಮಗಳಲ್ಲಿ ಕಾಯಿಲೆಪೀಡಿತರ ಸಂಖ್ಯೆಯೂ ಹೆಚ್ಚುತ್ತಿದೆ ಎಂದು ಆರೋಗ್ಯ ಇಲಾಖೆಯ ದಾಖಲೆಗಳೇ ಹೇಳುತ್ತಿವೆ.