ಬುಧವಾರ, ಸೆಪ್ಟೆಂಬರ್ 23, 2020
27 °C

IPL ಪ್ರಾಯೋಜಕತ್ವ: ಹಿಂದೆ ಸರಿದ ಚೀನಾ ಕಂಪನಿ ವಿವೊ?

ಏಜೆನ್ಸೀಸ್‌ Updated:

ಅಕ್ಷರ ಗಾತ್ರ : | |

ಐಪಿಎಲ್‌ ಟ್ರೋಫಿ

ನವದೆಹಲಿ: ಚೀನಾ ಮೂಲದ ವಿವೊ ಮೊಬೈಲ್ ಕಂಪನಿಯು ಇಂಡಿಯನ್ ಪ್ರೀಮಿಯರ್ ಲೀಗ್‌ (ಐಪಿಎಲ್‌) ಟಿ20 ಕ್ರಿಕೆಟ್‌ ಟೂರ್ನಿಯ ಪ್ರಾಯೋಜಕತ್ವದಿಂದ ಹಿಂದೆ ಸರಿಯಲು ಯೋಚಿಸುತ್ತಿದೆ.

ಯುಎಇಯಲ್ಲಿ ಐಪಿಎಲ್‌ನ 13ನೇ ಆವೃತ್ತಿಯ ಟೂರ್ನಿಯನ್ನು ನಡೆಸಲು ಬಿಸಿಸಿಐ ಸಿದ್ಧತೆ ಮಾಡಿಕೊಳ್ಳುತ್ತಿದೆ. ಚೀನಾ ಮತ್ತು ಭಾರತದ ಸೈನಿಕರ ನಡುವೆ ಈಚೆಗೆ ನಡೆದ ಸಂಘರ್ಷದ ನಂತರ ಚೀನಾ ಉತ್ಪನ್ನಗಳನ್ನು ಬಹಿಷ್ಕರಿಸಬೇಕು ಎಂಬ ಅಭಿಯಾನಗಳು ನಡೆಯುತ್ತಿವೆ. ಚೀನಾದ ಆ್ಯಪ್‌ಗಳನ್ನೂ ಕೇಂದ್ರ ಸರ್ಕಾರವು ನಿಷೇಧಿಸಿದೆ. ಇದ ರಿಂದಾಗಿ ಐಪಿಎಲ್ ಪ್ರಾಯೋಜಕತ್ವವನ್ನು ಬಿಸಿಸಿಐ ಕೈಬಿಡಬೇಕು ಎಂಬ ಆಗ್ರಹಗಳು ಹೆಚ್ಚಿದ್ದವು. ಆದರೆ ಈಚೆಗೆ ನಡೆದಿದ್ದ ಐಪಿಎಲ್ ಆಡಳಿತ ಸಮಿತಿ ಸಭೆಯಲ್ಲಿ ವಿವೊ ಕಂಪನಿಯ ಪ್ರಾಯೋಜಕತ್ವ ಮುಂದುವರಿಸಲು ನಿರ್ಧರಿಸಲಾಗಿತ್ತು. ಅದಕ್ಕಾಗಿ ಬಹಳಷ್ಟು ಪ್ರತಿಭಟನೆಗಳು ವ್ಯಕ್ತವಾಗಿದ್ದವು.  ಇದರಿಂದಾಗಿ ವಿವೊ ಕಂಪನಿಯೇ ‘ಪರಸ್ಪರ ಸಮ್ಮತಿ’ಯೊಂದಿಗೆ ಒಪ್ಪಂದವನ್ನು ಕೈಬಿಡಲು ಯೋಚಿಸಿದೆ.

‘ಬಿಸಿಸಿಐ ಪದಾಧಿಕಾರಿಗಳು (ಅಧ್ಯಕ್ಷ ಸೌರವ್ ಗಂಗೂಲಿ ಮತ್ತು ಕಾರ್ಯದರ್ಶಿ ಜಯ್ ಶಾ) ಮತ್ತು ಕಂಪೆನಿಯ ಪ್ರತಿನಿಧಿಗಳ ಚರ್ಚೆ ನಡೆಯುತ್ತಿದೆ. ಒಂದು ವರ್ಷದ ಮಟ್ಟಿಗೆ ವಿವೊ ಕಂಪೆನಿಯು ಟೈಟಲ್‌ ಪ್ರಾಯೋಜಕತ್ವ ನೀಡದಿರುವ ಸಾಧ್ಯತೆ ದಟ್ಟವಾಗಿದೆ‘ ಎಂದು ಮಂಡಳಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ವಿವೊ ಕಂಪನಿಯೊಂದಿಗೆ ಐದು ವರ್ಷಗಳ ಒಪ್ಪಂದ ಇದೆ. 2022ರಲ್ಲಿ ಅದು ಮುಕ್ತಾಯವಾಗಲಿದೆ. ಪ್ರತಿ ವರ್ಷವೂ ₹440 ಕೋಟಿಯನ್ನು ಬಿಸಿಸಿಐಗೆ ಕಂಪೆನಿಯು ನೀಡುತ್ತಿದೆ.

‘ಈ ಹಿಂದೆ ಕೆಲವು ಫ್ರ್ಯಾಂಚೈಸ್‌ಗಳು  ಒಪ್ಪಂದ ನಿಯಮ ಉಲ್ಲಂಘಿಸಿದ್ದಾಗ ಬ್ಯಾಂಕ್ ಗ್ಯಾರಂಟಿಯನ್ನು ನಗದೀಕರಣ ಮಾಡಿಕೊಳ್ಳಲಾಗಿತ್ತು. ಆದರೆ ವಿವೊ ಪ್ರಕರಣದಲ್ಲಿ ಆ ರೀತಿಯಾಗುವುದಿಲ್ಲ. ಪರಸ್ಪರ ಹೊಂದಾಣಿಕೆಯೊಂದಿಗೆ ಬೇರ್ಪಡಲು ನೋಡುತ್ತಿದ್ದೇವೆ‘ ಎಂದು ಮೂಲಗಳು ತಿಳಿಸಿವೆ.

‘ಈ ಸಂದರ್ಭದಲ್ಲಿ ಒಂದೆ ರಡು ಭಾರತೀಯ ಮೂಲದ ಕಂಪನಿಗಳೊಂದಿಗೆ ಪ್ರಾಯೋಜಕತ್ವದ ಮಾತುಕತೆ ನಡೆಯುತ್ತಿದೆ.  ಆದರೆ ಸದ್ಯದ ಆರ್ಥಿಕ ಪರಿಸ್ಥಿತಿಯಲ್ಲಿ ₹440 ಕೋಟಿಗೆ ಸಮನಾದ ಮೊತ್ತ ವನ್ನು ಪಡೆಯುವುದು ಸಾಧ್ಯವಾಗಲಿಕ್ಕಿಲ್ಲ. ಪ್ರಯತ್ನ ಜಾರಿಯಲ್ಲಿದೆ. ಒಂದೊಮ್ಮೆ ವಿವೊ ಹಿಂದೆ ಸರಿಯುವುದು ಖಚಿತವಾದರೆ ಮುಂದಿನ ಹೆಜ್ಜೆ ಇಡುತ್ತೇವೆ’ ಎಂದು ಪದಾಧಿಕಾರಿಯೊಬ್ಬರು ತಿಳಿಸಿದರು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು