‘ಸೆಹ್ವಾಗ್ ರೀತಿ ಸ್ಫೋಟಕ ಬ್ಯಾಟ್ಸ್ಮನ್ ಅಲ್ಲದಿದ್ದರೂ, ಮಯಂಕ್‌ಗೆ ಸ್ಪಷ್ಟತೆ ಇದೆ’
ಅಕ್ಷರ ಗಾತ್ರ :ಆ |ಆ |ಆ
ನವದೆಹಲಿ: ಮಾಜಿ ಕ್ರಿಕೆಟಿಗ ವೀರೇಂದ್ರ ಸೆಹ್ವಾಗ್ ಅಥವಾ ಆಸ್ಟ್ರೇಲಿಯಾದ ಡೇವಿಡ್ ವಾರ್ನರ್‌ ಅವರಂತೆ ಸ್ಫೋಟಕ ಬ್ಯಾಟಿಂಗ್‌ ನಡೆಸದಿದ್ದರೂ, ಆಟದ ಬಗ್ಗೆ ಹೊಂದಿರುವ ಸ್ಪಷ್ಟತೆಯೇ ಮಯಂಕ್ ಅಗರವಾಲ್‌ ಅವರ ದೊಡ್ಡ ಶಕ್ತಿ ಎಂದು ಮಾಜಿ ಆಟಗಾರ ಗೌತಮ್‌ ಗಂಭೀರ್‌ ಹೇಳಿದ್ದಾರೆ. ಮಾತ್ರವಲ್ಲದೆ ನ್ಯೂಜಿಲೆಂಡ್‌ ವಿರುದ್ಧದ ಎರಡು ಪ‍ಂದ್ಯಗಳ ಟೆಸ್ಟ್ ಸರಣಿಯಲ್ಲಿ ಮಯಂಕ್ ಮಿಂಚಲಿದ್ದಾರೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
‘ನಾನು ಮಯಂಕ್‌ರಲ್ಲಿ ಅಪಾರ ವಿಶ್ವಾಸ ಇಟ್ಟಿದ್ದೇನೆ. ಆತ ಪ್ರತಿಭಾಶಾಲಿ ಆಟಗಾರನಾಗಿರದೇ ಇರಬಹುದು. ಆದರೆ, ಸಂಘಟನಾತ್ಮಕವಾಗಿ ಆಡುತ್ತಾನೆ. ವಿರೇಂದ್ರ ಸೆಹ್ವಾಗ್ ಅಥವಾ ಡೇವಿಡ್ ವಾರ್ಡರ್‌ ಅವರು ಬೌಲರ್‌ಗಳಲ್ಲಿ ಭಯ ಮೂಡಿಸುವಂತೆ, ಮಯಂಕ್ ಆಡುವುದಿಲ್ಲ. ಆದರೆ, ಆರಂಭಿಕ ಬ್ಯಾಟ್ಸ್ಮನ್ ಆಗಿ ಮಯಂಕ್‌ಗೆ ಸ್ಪಷ್ಟತೆ ಇದೆ’ ಎಂದು ಪತ್ರಿಕೆಯೊಂದಕ್ಕೆ ಬರೆದಿರುವ ಲೇಖನದಲ್ಲಿ ತಿಳಿಸಿದ್ದಾರೆ.
ಕಳೆದ ಸರಣಿಗಳಲ್ಲಿ ಭಾರತ ಪರ ಮಯಂಕ್ ಅವರೊಟ್ಟಿಗೆ ಇನಿಂಗ್ಸ್‌ ಆರಂಭಿಸಿದ್ದ ರೋಹಿತ್‌ ಶರ್ಮಾ ಗಾಯಾಳಾಗಿದ್ದು ವಿಶ್ರಾಂತಿಯಲ್ಲಿದ್ದಾರೆ. ಹೀಗಾಗಿ ಈ ಸರಣಿಯಲ್ಲಿ ಮಯಂಕ್ ಜೊತೆಗೆ ಇನಿಂಗ್ಸ್‌ ಆರಂಭಿಸುವವರು ಯಾರು ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. ರೋಹಿತ್‌ ಸ್ಥಾನಕ್ಕಾಗಿ ಪೃಥ್ವಿ ಶಾ ಮತ್ತು ಶುಭಮನ್‌ ಗಿಲ್ ಸ್ಪರ್ಧೆಯಲ್ಲಿದ್ದಾರೆ.
ಈ ಬಗ್ಗೆಯೂ ಬರೆದಿರುವ ಗಂಭೀರ್‌, ‘ನಾವು ಭಾರತ ಪರ ಹೊಸ ಆರಂಭಿಕ ಜೋಡಿಯನ್ನು ಕಾಣಲಿದ್ದೇವೆ. ಪೃಥ್ವಿ ಶಾ ಇಲ್ಲವೇ ಶುಭಮನ್‌ ಗಿಲ್ ಇಬ್ಬರೂ ಅವಕಾಶವನ್ನು ಹೇಗೆ ಬಳಸಿಕೊಳ್ಳಲಿದ್ದಾರೆ ಎಂಬುದು ಕುತೂಹಲಕಾರಿಯಾಗಿದೆ’ ಎಂದಿದ್ದಾರೆ.
ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.
ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.
ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.
