ಏಕದಿನ ಕ್ರಿಕೆಟ್ | ವೇಗವಾಗಿ ನೂರು ವಿಕೆಟ್: ಹರ್ಭಜನ್ ದಾಖಲೆ ಮುರಿದ ಕುಲದೀಪ್
ಅಕ್ಷರ ಗಾತ್ರ :ಆ |ಆ |ಆ
ರಾಜ್‌ಕೋಟ್‌: ಚೈನಾಮನ್‌ ಶೈಲಿಯ ಬೌಲರ್ ಕುಲದೀಪ್ ಯಾದವ್‌ ಏಕದಿನ ಕ್ರಿಕೆಟ್‌ನಲ್ಲಿ ಭಾರತ ಪರ ವೇಗವಾಗಿ 100 ವಿಕೆಟ್ ಪಡೆದ ಸ್ಪಿನ್ನರ್‌ ಹಾಗೂ ಮೂರನೇ ಬೌಲರ್ ಎನಿಸಿದರು. ಆಸ್ಟ್ರೇಲಿಯಾ ವಿರುದ್ಧದ ಸರಣಿಯ ಎರಡನೇ ಪಂದ್ಯದ ವೇಳೆ ಈ ಸಾಧನೆ ಮಾಡಿದರು.
ಶತಕದ ಹೊಸ್ತಿಲಲ್ಲಿದ್ದ ಸ್ಟೀವ್‌ ಸ್ಮಿತ್ (98) ಯಾದವ್‌ಗೆ ನೂರನೇ ಬಲಿಯಾದರು. ಆ ಮೂಲಕ ಯಾದವ್‌ ತಮ್ಮ 58ನೇ ಪಂದ್ಯದಲ್ಲಿ ನೂರು ವಿಕೆಟ್ ಸಾಧನೆ ಮಾಡಿ ಸಂಭ್ರಮಿಸಿದರು. ಇದರೊಂದಿಗೆ ಹರ್ಭಜನ್ ಸಿಂಗ್‌ ಹೆಸರಿನಲ್ಲಿದ್ದ ದಾಖಲೆಯನ್ನು ತಮ್ಮ ಹೆಸರಿಗೆ ಬರೆದುಕೊಂಡರು. ಹರ್ಭಜನ್ ಈ ಸಾಧನೆ ಮಾಡಲು 76 ಪಂದ್ಯಗಳನ್ನು ತೆಗೆದುಕೊಂಡಿದ್ದರು.
Two wickets in quick succession for India!
— ICC (@ICC) January 17, 2020
Alex Carey becomes Kuldeep Yadav's 100th ODI victim and two balls later, the spinner dismisses Steve Smith for 98 🤯#INDvAUS pic.twitter.com/KMyQdTqkus
ಮೊಹಮದ್‌ ಶಮಿ ಭಾರತ ಪರ ವೇಗವಾಗಿ 100 ವಿಕೆಟ್ ಪಡೆದ ಬೌಲರ್ ಎನಿಸಿದ್ದಾರೆ. ಇದಕ್ಕಾಗಿ ಅವರು 56ನೇ ಇನಿಂಗ್ಸ್‌ ತೆಗೆದುಕೊಂಡಿದ್ದರು. ಎರಡನೇ ಸ್ಥಾನದಲ್ಲಿ ಜಸ್‌ಪ್ರೀತ್‌ ಬೂಮ್ರಾ (57) ಇದ್ದಾರೆ.
54 ಇನಿಂಗ್ಸ್‌ಗಳಲ್ಲೇ ಈ ಸಾಧನೆ ಮಾಡಿರುವ ಅಫ್ಗಾನಿಸ್ತಾನದ ರಶೀದ್‌ ಖಾನ್‌ ವಿಶ್ವ ಬೌಲರ್‌ಗಳ ಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿದ್ದಾರೆ. ಆಸ್ಟ್ರೇಲಿಯಾದ ಮಿಚೇಲ್‌ ಸ್ಟಾರ್ಕ್‌ (52) ಎರಡನೇ ಸ್ಥಾನದಲ್ಲಿದ್ದಾರೆ.
ಸರಣಿ ಸಮಬಲ
ಮೊದಲ ಪಂದ್ಯದಲ್ಲಿ ಹತ್ತು ವಿಕೆಟ್ ಗೆಲುವು ಸಾಧಿಸಿ ಸರಣಿ ಗೆಲುವಿನ ವಿಶ್ವಾಸದಲ್ಲಿದ್ದ ಆಸ್ಟ್ರೇಲಿಯಾಗೆ ಭಾರತ ತಿರುಗೇಟು ನೀಡಿದೆ.
ಟಾಸ್‌ ಗೆದ್ದರೂ ಭಾರತಕ್ಕೆ ಬ್ಯಾಟಿಂಗ್‌ ಬಿಟ್ಟುಕೊಟ್ಟ ನಾಯಕ ಆ‌್ಯರನ್‌ ಫಿಂಚ್‌ ನಿರ್ಧಾರವನ್ನು ತಲೆಕೆಳಗಾಗಿಸಿದ ವಿರಾಟ್‌ ಕೊಹ್ಲಿ ಪಡೆಯ ಬ್ಯಾಟ್ಸ್‌ಮನ್‌ಗಳು ನಿಗದಿತ 50 ಓವರ್‌ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 340 ರನ್ ಗಳಿಸಿದರು. ಆರಂಭಿಕ ಶಿಖರ್‌ ಧವನ್‌ (94), ಕೊಹ್ಲಿ (78) ಹಾಗೂ ಕನ್ನಡಿಗ ಕೆ.ಎಲ್‌. ರಾಹುಲ್‌ (80) ಅರ್ಧಶತಕ ಗಳಿಸಿ ಮಿಂಚಿದರು.
ಇದನ್ನೂ ಓದಿ: ರಾಹುಲ್‌ ಅಬ್ಬರ, ಪಾಂಡೆ ಅದ್ಭುತ ಕ್ಯಾಚ್: ಭಾರತಕ್ಕೆ 36 ರನ್ ಜಯ
ಈ ಮೊತ್ತ ಬನ್ನಟ್ಟಿದ ಆಸಿಸ್‌ 49.1ನೇ ಓವರ್‌ನಲ್ಲಿ 304 ರನ್ ಗಳಿಸಿ ಆಲೌಟ್‌ ಆಯಿತು. ಹೀಗಾಗಿ ಮೂರು ಪಂದ್ಯಗಳ ಸರಣಿಯು 1–1ರಲ್ಲಿ ಸಮಬಲವಾಗಿದ್ದು ಭಾನುವಾರ (ಜ.19) ಬೆಂಗಳೂರಿನಲ್ಲಿ ನಡೆಯಲಿರುವ ಅಂತಿಮ ಪಂದ್ಯವು ಕುತೂಹಲ ಕೆರಳಿಸಿದೆ.
ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.
ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.
ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.
