ಮೌಂಟ್ ಮಾಂಗನೂಯಿ: ಟೆಸ್ಟ್ ತಂಡದ ಹೊಸ ನಾಯಕ ಮೊಹಮ್ಮದ್ ರಿಜ್ವಾನ್ ಒತ್ತಡ ಮೀರಿ ನಿಲ್ಲುವಲ್ಲಿ ಯಶಸ್ವಿಯಾದರು. ಫಹೀಂ ಆಶ್ರಫ್ ಜೊತೆ ಅವರು ತೋರಿದ ಶತಕದ ಜೊತೆಯಾಟದ ನೆರವಿನಿಂದ ಪಾಕಿಸ್ತಾನ ಆತಿಥೇಯ ನ್ಯೂಜಿಲೆಂಡ್ ಎದುರಿನ ಮೊದಲ ಟೆಸ್ಟ್ ಪಂದ್ಯದಲ್ಲಿ ಫಾಲೊಆನ್ನಿಂದ ತಪ್ಪಿಸಿಕೊಂಡಿತು.
ಅಗ್ರ ಕ್ರಮಾಂಕದ ಬ್ಯಾಟ್ಸ್ಮನ್ಗಳು ವೈಫಲ್ಯ ಕಂಡ ಮೊದಲ ಇನಿಂಗ್ಸ್ನಲ್ಲಿ ಪಾಕಿಸ್ತಾನ 200 ರನ್ಗಳ ಗಡಿ ದಾಟುವುದೇ ಸಂದೇಹವಾಗಿತ್ತು. ಆದರೆ ರಿಜ್ವಾನ್ ಮತ್ತು ಫಹೀಮ್ ಅಮೋಘ ಆಟವಾಡಿದರು. ಮೂರನೇ ದಿನದಾಟದ ಕೊನೆಯ ಓವರ್ನಲ್ಲಿ ತಂಡದ ಕೊನೆಯ ವಿಕೆಟ್ ಉರುಳಿತು. ಅಷ್ಟರಲ್ಲಿ ತಂಡ 239 ರನ್ ಕಲೆ ಹಾಕಿತ್ತು.
32 ರನ್ಗಳಿಗೆ ನಾಲ್ಕು ವಿಕೆಟ್ ಕಳೆದುಕೊಂಡಿದ್ದ ತಂಡ 52ಕ್ಕೆ5 ಎಂಬ ಸ್ಥಿತಿಯಲ್ಲಿದ್ದ ಸಂದರ್ಭದಲ್ಲಿ ರಿಜ್ವಾನ್ ಕ್ರೀಸ್ಗೆ ಬಂದಿದ್ದರು. ನಂತರ ಅವರಿಗೆ ಫಹೀಂ ಜೊತೆಯಾದರು. 30 ಓವರ್ಗಳ ಕಾಲ ಬ್ಯಾಟಿಂಗ್ ಮಾಡಿದ ಇವರಿಬ್ಬರು ಏಳನೇ ವಿಕೆಟ್ಗೆ 106 ರನ್ ಸೇರಿಸಿದರು.