ಶುಕ್ರವಾರ, ಆಗಸ್ಟ್ 7, 2020
24 °C

ಅಸ್ಸಾಂನ ಕಾಜಿರಂಗದಲ್ಲಿ ಕಂಡ ‘ಚಿನ್ನದ ಹುಲಿ’!

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಗುವಾಹಟಿ: ಅಸ್ಸಾಂನ ಕಾಜಿರಂಗ ರಾಷ್ಟ್ರೀಯ ಉದ್ಯಾನದ ‘ಚಿನ್ನದ ಹುಲಿ’ (ಗೋಲ್ಡನ್ ಟೈಗರ್) ಚಿತ್ರವನ್ನು ಭಾರತೀಯ ಅರಣ್ಯ ಸೇವೆಯ ಅಧಿಕಾರಿ ಪ್ರವೀಣ್ ಕಸ್ವಾನ್ ಅವರು ಹಂಚಿಕೊಂಡ ಬಳಿಕ ಈ ಚಿತ್ರ ಸಾಮಾಜಿಕ ಮಾಧ್ಯಮಗಳಲ್ಲಿ ಶನಿವಾರದಿಂದ ವೈರಲ್ ಆಗಿದೆ.

‘ಒಂದಲ್ಲ, ಉದ್ಯಾನದ ಮೂರು ಹುಲಿಗಳು ಚಿನ್ನದ ಬಣ್ಣದಿಂದ ಕೂಡಿರುವುದು ಕಂಡುಬಂದಿದೆ. ಚಿನ್ನದ ಬಣ್ಣದ ಹುಲಿ ಕಾಣಿಸಿರುವುದು ಸಂಭ್ರಮದ ವಿಚಾರ ಅಲ್ಲ, ಇದು ಹುಲಿ ಸಂತತಿಯ ಭವಿಷ್ಯ ಮಸುಕಾಗಿದೆ ಎಂಬುದರ ಸಂಕೇತ’ ಎಂದು ಅಧಿಕಾರಿಗಳು ‘ಪ್ರಜಾವಾಣಿ’ಗೆ ತಿಳಿಸಿದ್ದಾರೆ. 

‘ಕಾಡಿನ ಹುಲಿಗಳ ಅಸಾಮಾನ್ಯ ಬಣ್ಣ ವಿರೂಪಕ್ಕೆ ಚಿನ್ನದ ಹುಲಿ ಒಂದು ಉದಾಹರಣೆ. ನಿಕಟ ಸಂಬಂಧಿ ಹುಲಿಗಳ ಮಿಲನದಿಂದಾದ ಸಂತಾನೋತ್ಪತ್ತಿಯಿಂದ ಹೀಗಾಗಿರಬಹುದು. ಹುಲಿಗಳ ಆವಾಸಸ್ಥಾನ ನಾಶ ಅಥವಾ ಪರಸ್ಪರ ಸಂಪರ್ಕ ಕಡಿತ ಇದಕ್ಕೆ ಕೆಲವು ಕಾರಣಗಳು. ಇರುವ ಸಂಖ್ಯೆಯಲ್ಲೇ ಸಂತಾನೋತ್ಪತ್ತಿ ನಡೆಯುವುದರಿಂದ ವಂಶವಾಹಿನಿಯಲ್ಲಿ ಈ ರೀತಿಯ ಬದಲಾವಣೆಗಳು ಕಂಡುಬರುತ್ತವೆ’ ಎಂದು ಕಾಜಿರಂಗ ಹುಲಿ ರಕ್ಷಿತಾರಣ್ಯದ ಸಂಶೋಧಕ ಅಧಿಕಾರಿ ರಾಬಿನ್ ಶರ್ಮಾ ತಿಳಿಸಿದ್ದಾರೆ.

ನಿಕಟ ಸಂಬಂಧದಲ್ಲಿಯೇ ಹೆಚ್ಚಿನ ಸಂತಾನೋತ್ಪತ್ತಿ ನಡೆಯುತ್ತಿರುವುದು ಅರಣ್ಯದಲ್ಲಿ ಹುಲಿಯ ಸಂತಾನ ಕಡಿಮೆಯಾಗುತ್ತಿದೆ ಎಂಬುದಕ್ಕೆ ಸೂಚನೆ. ಹಾಗಾಗಿ ಇದು ಕಳವಳಕಾರಿ ಎಂದು ಅವರು ಹೇಳಿದ್ದಾರೆ. 

ಹಳದಿ ಮಿಶ್ರಿತ ಚರ್ಮ, ಕಪ್ಪು ಪಟ್ಟೆಗಳು, ಹೊಟ್ಟೆಯ ಭಾಗದಲ್ಲಿ ಬಿಳಿ ಪಟ್ಟೆಗಳು ಕಂಡುಬಂದಿವೆ. 2014ರಲ್ಲಿ ಕ್ಯಾಮರಾದಲ್ಲಿ ಈ ರೀತಿಯ ಹುಲಿಗಳು ಮೊದಲಿಗೆ ಸೆರೆಯಾಗಿದ್ದವು. ಪ್ರತೀ ವರ್ಷ ಇವು ಕ್ಯಾಮರಾ ಕಣ್ಣಿಗೆ ಸಿಗುತ್ತಿವೆ. ಮುಂಬೈ ಮೂಲದ ಛಾಯಾಗ್ರಾಹಕ ಮಯೂರೇಶ್ ಹೆಂದ್ರೆ ಅವರು ಈ ಚಿತ್ರ ಸೆರೆ ಹಿಡಿದಿದ್ದಾರೆ. 

ಹುಲಿಯ ಈ ಬಣ್ಣ ಮುಂದಿನ ಸಂತಾನಕ್ಕೆ ವರ್ಗಾವಣೆಯಾಗುತ್ತದೆಯೋ, ಇಲ್ಲವೋ ಎಂಬ ಬಗ್ಗೆ ಸಂಶೋಧನೆ ಆಗಬೇಕಿದೆ ಎಂದು ವನ್ಯಜೀವಿ ಜೀವಶಾಸ್ತ್ರಜ್ಞ ಕಮಲ್ ಆಜಾದ್ ಅಭಿಪ್ರಾಯಪಟ್ಟಿದ್ದಾರೆ. 

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು