ಶುಕ್ರವಾರ, ಫೆಬ್ರವರಿ 21, 2020
18 °C

ಅಂಡರ್-19 ವಿಶ್ವ ಕಪ್ ಕ್ರಿಕೆಟ್: ಗೆದ್ದ ನಂತರ ಉದ್ಧಟತನ ತೋರಿದ ಬಾಂಗ್ಲಾ

ಏಜೆನ್ಸೀಸ್ Updated:

ಅಕ್ಷರ ಗಾತ್ರ : | |

ಪೊಷೆಸ್ಟ್ರೂಮ್‌: ಕ್ರಿಕೆಟ್‌ ಯುವ ವಿಶ್ವಕಪ್‌ ಗೆದ್ದ ವೇಳೆ ಬಾಂಗ್ಲಾ ತಂಡ ಹಾಗೂ ಭಾರತದ ಯುವ ಆಟಗಾರರ ನಡುವೆ ಮಾತಿನ ಚಕಮಕಿ ನಡೆದು ಕೈ ಕೈ ಮಿಲಾಯಿಸುವ ಹಂತಕ್ಕೆ ತಲುಪಿದ ಘಟನೆ ಭಾನುವಾರ ನಡೆದಿದೆ.

ಈ ಘಟನೆ ವಿಶ್ವ ಕ್ರಿಕೆಟ್ ಪ್ರೇಮಿಗಳಲ್ಲಿ ಬೇಸರಕ್ಕೆ ಕಾರಣವಾಗಿದೆ. ಬಾಂಗ್ಲಾ ಯುವ ಆಟಗಾರರು ಭಾರತವನ್ನು ಫೈನಲ್ ನಲ್ಲಿ ಸೋಲಿಸಿದ ನಂತರ ಬಾಂಗ್ಲಾ ಆಟಗಾರನೊಬ್ಬ ಭಾರತೀಯ ಆಟಗಾರನ ಕುರಿತು ಆಡಿದ ಮಾತು ಅಲ್ಲಿದ್ದ ಇತರೆ ಭಾರತೀಯ ಆಟಗಾರರನ್ನು ರೊಚ್ಚಿಗೆಬ್ಬಿಸಿತ್ತು. ಇದರಿಂದಾಗಿ ಆಟಗಾರರ ನಡುವೆ ಮಾತಿನ ಚಕಮಕಿ ಆರಂಭಾಯಿತು.

ಈ ಸಂದರ್ಭದಲ್ಲಿ ಭಾರತ ತಂಡದ ನಾಯಕ ಪ್ರಿಯಂಗರ್ಗ್ ಮಧ್ಯಪ್ರವೇಶಿಸಿದಾಗಲೂ ಬಾಂಗ್ಲಾ ಆಟಗಾರರು ತಮ್ಮ ದರ್ಪ ತೋರಿದರು. ಆಗ ಎರಡೂ ಆಟಗಾರರ ನಡುವೆ ಘರ್ಷಣೆ ನಡೆಯುವ ಹಂತಕ್ಕೆ ತಲುಪಿದೆ. ಕ್ರಿಕೆಟ್ ಚಿತ್ರೀಕರಣ ನಡೆಸುತ್ತಿದ್ದ ಕ್ಯಾಮರಾಗಳು ಪ್ರೇಕ್ಷಕರ ಗ್ಯಾಲರಿಯತ್ತ ತಮ್ಮ ಗಮನ ಹರಿಸಿದ್ದರಿಂದ ಅಲ್ಲಿ ಏನಾಯಿತು ಎಂದು ತಂಡದ ಆಟಗಾರರನ್ನು ಹೊರತುಪಡಿಸಿ ಬೇರಾರಿಗೂ ತಿಳಿಯದಾಯಿತು ಎಂದು ಸುದ್ದಿಸಂಸ್ಥೆಗಳು ವರದಿ ಮಾಡಿವೆ.

ಈ ಘಟನೆ ವಿರುದ್ಧ ಭಾರತ ತಂಡದ ಕೋಚ್ ಪರಸ್ ಮಹಂಬ್ರೇ ಯಾವ ಕ್ರಮಕ್ಕೆ ಮುಂದಾಗಿದ್ದಾರೆ ಎಂಬುದು ಇನ್ನೂ ತಿಳಿದುಬಂದಿಲ್ಲ.

ಪಂದ್ಯ ಆರಂಭವಾದ ನಂತರ ಪ್ರತಿಕ್ಷಣದಲ್ಲೂ ಬಾಂಗ್ಲಾ ಆಟಗಾರರು ಭಾರತೀಯ ಆಟಗಾರರನ್ನು ಕಿಚಾಯಿಸುವುದು, ರೇಗಿಸುವುದು ನಡೆಯುತ್ತಿತ್ತು. ಇದು ಭಾರತ ತಂಡದ ಆಟಗಾರರ ಸಹನೆಯನ್ನು ಕೆಣುಕುವಂತಿತ್ತು. ಪಂದ್ಯದ ಚಿತ್ರೀಕರಣ ನಡೆಸುತ್ತಿದ್ದ ಪ್ರತಿ ಕ್ಯಾಮರಾದಲ್ಲೂ ಇದು ಸೆರೆಯಾಗಿದೆ.

ಒಂದು ಹಂತದಲ್ಲಿ ಬಾಂಗ್ಲಾ ಬೌಲರ್ ಒಬ್ಬ ಭಾರತದ ಬ್ಯಾಟ್ಸ್ ಮನ್‌ಗೆ ಚೆಂಡಿನಿಂದಲೇ ಹೊಡೆಯುವಂತೆ ಎಸೆದ ಎಸೆತ ಮೈದಾನದಲ್ಲಿದ್ದ ಎಲ್ಲಾ ಆಟಗಾರರ ಸಹನೆಯನ್ನು ಕೆಣಕುವಂತಿತ್ತು. ಆ ಸಮಯದಲ್ಲಿ ಭಾರತದ ಬ್ಯಾಟ್ಸ್ ಮನ್ ತಪ್ಪಿಸಿಕೊಳ್ಳದಿದ್ದರೆ ಆತನಿಗೆ ಬಲವಾದ ಹೊಡೆತ ಬಿದ್ದು ಗಾಯವಾಗುವುದಂತೂ ನಿಶ್ಚಿತವಾಗಿತ್ತು. ಈ ಸನ್ನಿವೇಶ ಕೂಡ ಸೆರೆಯಾಗಿದೆ. 

ಬಾಂಗ್ಲಾ ಕ್ಯಾಪ್ಟನ್ ಅಕ್ಬರ್ ಅಲಿ ಟ್ರೋಫಿಯೊಂದಿಗೆ

ಪಂದ್ಯದ ಪ್ರತಿಹಂತದಲ್ಲೂ ಬಾಂಗ್ಲಾ ತಂಡದ ಬೌಲರ್‌ಗಳು ಭಾರತದ ಬ್ಯಾಟ್ಸ್‌ಮನ್‌ಗಳನ್ನು ಕೆಣಕುತ್ತಿದ್ದುದು ಕೂಡ ಭಾರತದ ಬ್ಯಾಟ್ಸ್‌ಮನ್‌ಗಳು ತಮ್ಮ ವೈಯಕ್ತಿಕ ರನ್‌ಗಳನ್ನು ಏರಿಸುವುದರ ಬದಲು ಬಾಂಗ್ಲಾ ಬೌಲರ್‌ಗಳ ವರ್ತನೆಯತ್ತ ಹೆಚ್ಚು ಗಮನ ಹರಿಸಿದ್ದರು. ಇದೂ ಕೂಡ ಭಾರತ ತಂಡ ಹೆಚ್ಚು ಮೊತ್ತ ಪೇರಿಸುವಲ್ಲಿ ವಿಫಲವಾಯಿತು ಎಂದು ಕ್ರಿಕೆಟ್ ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ.

ಪಂದ್ಯದ ಅಂತ್ಯದ ವೇಳೆ ಇಡೀ ಕ್ರೀಡಾಂಗಣದಲ್ಲಿ ವೀಕ್ಷಕರ ಗ್ಯಾಲರಿಯಲ್ಲಿದ್ದ ಬಾಂಗ್ಲಾ ಪ್ರೇಮಿಗಳೂ ಕೂಡ ಭಾರತದೊಂದಿಗೆ ಯಾವುದೋ ಹಳೆಯ ದ್ವೇಷ ಇದೆಯೇನೋ ಎನ್ನುವಷ್ಟರ ಮಟ್ಟಿಗೆ ತಮ್ಮ ವರ್ತನೆ ತೋರುತ್ತಿದ್ದರು. 

ಇದನ್ನೂ ಓದಿ: ಬಾಂಗ್ಲಾಗೆ ಯುವ ವಿಶ್ವಕಪ್‌

ಇಷ್ಟೆಲ್ಲಾ ಘಟನೆಗಳ ಕುರಿತು ಆಟದ ಮುಗಿದ ನಂತರ ಕ್ಯಾಪ್ಟನ್ ಅಕ್ಬರ್ ಆಲಿ ನಮ್ಮ ತಂಡದ ಬೌಲರ್‌ಗಳು ದುರ್ವರ್ತನೆ ತೋರಿದ್ದಾರೆ. ಇದು ದುರದೃಷ್ಟಕರ ಸಂಗತಿ ಎಂದು ಬೇಸರ ವ್ಯಕ್ತಪಡಿಸಿ ಘಟನೆಯನ್ನು ತಿಳಿಗೊಳಿಸುವ ಯತ್ನ ನಡೆಸಿದ್ದಾರೆ.

ಆದರೆ, ಈ ಘಟನೆ ಕುರಿತು ಅಂತರರಾಷ್ಟ್ರೀಯ ಕ್ರಿಕೆಟ್ ಮಂಡಳಿ ಯಾವ ಕ್ರಮ ಕೈಗೊಳ್ಳುತ್ತದೆ ಎಂಬುದನ್ನು ಕಾದು ನೋಡಬೇಕಾಗಿದೆ.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಪ್ರತಿಕ್ರಿಯಿಸಿ (+)

ಈ ವಿಭಾಗದಿಂದ ಇನ್ನಷ್ಟು