ಶುಕ್ರವಾರ, ಫೆಬ್ರವರಿ 21, 2020
17 °C

ಬಾವಲಿ–ಮನುಷ್ಯನ ನಡುವೆ ಕೊರೊನಾವೈರಸ್‌ ಕೊಂಡಿ 'ಪ್ಯಾಂಗೋಲಿನ್‌'!

ರಾಯಿಟರ್ಸ್‌ Updated:

ಅಕ್ಷರ ಗಾತ್ರ : | |

ಕೀಟಭಕ್ಷಕ ಸ್ತನಿ ಪ್ಯಾಂಗೋಲಿನ್‌

ಬೀಜಿಂಗ್‌: ಮಾರಾಣಾಂತಿಕ ಕೊರೊನಾವೈರಸ್‌ ಚೀನಾದಿಂದ ಆಚೆಗೂ ಹರಡಿರುವುದು ದೃಢಪಟ್ಟಿದೆ. ಇದರ ನಿಯಂತ್ರಣ ಮತ್ತು ಚಿಕಿತ್ಸೆಗೆ ವಿಜ್ಞಾನಿಗಳು, ವೈದ್ಯರು ಶ್ರಮಿಸುತ್ತಿದ್ದಾರೆ. ಮತ್ತೊಂದು ಕಡೆ ಈ ವೈರಸ್ ವ್ಯಾಪಿಸಲು ಕಾರಣವಾಗಿರುವ ಜೀವಿಯ ಹುಡುಕಾಟದಲ್ಲಿರುವ ಸಂಶೋಧಕರಿಗೆ 'ಪ್ಯಾಂಗೋಲಿನ್‌' ಸುಳಿವು ನೀಡಿದೆ. 

ಏಷ್ಯಾದಲ್ಲಿ ಆಹಾರ ಮತ್ತು ಔಷಧಿಗಾಗಿ ಕೀಟಭಕ್ಷಕ ಸ್ತನಿ ಪ್ಯಾಂಗೋಲಿನ್‌ಗೆ ಬೇಡಿಕೆ ಇದೆ. ಕಳ್ಳಸಾಗಣೆಯಾಗುತ್ತಿರುವ ಪ್ಯಾಂಗೋಲಿನ್‌ಗಳ ಮೂಲಕವೇ ಬಾವಲಿಯಿಂದ ಮನುಷ್ಯರಿಗೆ ಕೊರೊನಾ ವೈರಸ್‌ ಹರಡುತ್ತಿರಬಹುದು ಎಂದು ಚೀನಾ ಸಂಶೋಧಕರು ಅಭಿಪ್ರಾಯ ಪಟ್ಟಿದ್ದಾರೆ. 

ಚೀನಾ ಸೇರಿದಂತೆ ಕೆಲವು ರಾಷ್ಟ್ರಗಳಲ್ಲಿ ಪ್ಯಾಂಗೋಲಿನ್‌ ಮಾಂಸವನ್ನು ರಸಭಕ್ಷವಾಗಿ ಪರಿಗಣಿಸಲಾಗಿದೆ ಹಾಗೂ ಅದರ ಮೈಮೇಲಿನ ಚಿಪ್ಪುಗಳನ್ನು ಸಾಂಪ್ರದಾಯಿಕ ಔಷಧಿಗಳಲ್ಲಿ ಬಳಸಲಾಗುತ್ತಿದೆ. ಇದೇ ಕಾರಣಗಳಿಂದಾಗಿ ಪ್ಯಾಂಗೋಲಿನ್‌ ಅತಿ ಹೆಚ್ಚು ಕಳ್ಳಸಾಗಣೆಯಾಗುವ ಏಷ್ಯಾದ ಸ್ತನಿ ಎಂದು ವಿಶ್ವ ವನ್ಯಜೀವಿ ನಿಧಿ (wwf) ಹೇಳಿದೆ. 

ವೈರಸ್‌ ಉತ್ಪತ್ತಿ ತಡೆ ಮತ್ತು ನಿಯಂತ್ರಿಸುವ ನಿಟ್ಟಿನಲ್ಲಿ ಈ ಸಂಶೋಧನೆಯ ಅಂಶಗಳು ಪ್ರಮುಖ ಪಾತ್ರವಹಿಸಲಿವೆ ಎಂದು ಸಂಶೋಧನೆ ನೇತೃತ್ವ ವಹಿಸಿರುವ ಸೌತ್‌ ಚೀನಾ ಅಗ್ರಿಕಲ್ಚರ್‌ ಯೂನಿವರ್ಸಿಟಿ ಹೇಳಿದೆ. 

ವುಹಾನ್‌ನ ಜೀವಂತ ಪ್ರಾಣಿಗಳ ಮಾರಾಟ ಮಾಡುವ ಮಾರುಕಟ್ಟೆ ಪ್ರದೇಶದಿಂದ ಕೊರೊನಾವೈರಸ್‌ ಪರಿಣಾಮ ವ್ಯಾಪಿಸಿದೆ. ಚೀನಾದಲ್ಲಿ ಕೊರೊನಾವೈರಸ್‌ ಸೋಂಕಿನಿಂದ 636 ಜನರು ಸಾವಿಗೀಡಾಗಿದ್ದಾರೆ. 

ವೈರಸ್‌ ಕುರಿತ ಅಧ್ಯಯ: ಕೊರೊನಾವೈರಸ್‌ ಬಾವಲಿಗಳಲ್ಲಿ ಸೃಷ್ಟಿಯಾಗಿ ಮನುಷ್ಯರಿಗೆ ಹರಡುತ್ತಿದೆ, ಆದರೆ ಬಾವಲಿಗಳಿಂದ ಮನುಷ್ಯರಿಗೆ ತಲುಪುತ್ತಿರುವುದು ಮತ್ತೊಂದು ಪ್ರಾಣಿಯಿಂದ ಎಂದು ಸಂಶೋಧಕರು ಕಂಡುಕೊಂಡರು. ಪ್ಯಾಂಗೋಲಿನ್‌ಗಳಿಂದ ಸಂಗ್ರಹಿಸಲಾದ ಕೊರೊನಾವೈರಸ್‌ ಗುಣಲಕ್ಷಗಳಿಗೂ ವೈರಸ್‌ ಸೋಂಕಿಗೆ ಒಳಗಗಾಗಿರುವ ವ್ಯಕ್ತಿಯ ಜೀನೋಮ್‌ ಸೀಕ್ವೆನ್ಸ್‌ ಶೇ 99ರಷ್ಟು ಹೊಂದಾಣಿಕೆಯಾಗಿದೆ ಎಂದು ಚೀನಾದ ಸರ್ಕಾರಿ ಸ್ವಾಮ್ಯದ ಮಾಧ್ಯಮ ವರದಿ ಮಾಡಿದೆ. 

ಪ್ಯಾಂಗೋಲಿನ್‌ಗಳಿಂದಲೇ ಮನುಷ್ಯರಿಗೆ ವೈರಸ್‌ ಹರಡಿದೆ ಎಂಬುದು ದೃಢಪಡಲು ಇನ್ನಷ್ಟು ಸಂಶೋಧನೆಗಳ ಅಗತ್ಯವಿದೆ ಎಂದು ಹಾಂಕಾಂಗ್‌ನ ಸಿಟಿ ಯೂನಿವರ್ಸಿಟಿ ಎಚ್ಚರಿಕೆ ನೀಡಿದೆ. 

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಪ್ರತಿಕ್ರಿಯಿಸಿ (+)

ಈ ವಿಭಾಗದಿಂದ ಇನ್ನಷ್ಟು