ಬೀಜಿಂಗ್: ಸ್ವಯಂ ಆಡಳಿತದ ದ್ವೀಪ ರಾಷ್ಟ್ರ ತೈವಾನ್ ತನ್ನ ಸುಪರ್ದಿಗೆ ಬರುವುದು ಅನಿವಾರ್ಯ. ಆದರೆ ಶಾಂತಿಯ ಮಾರ್ಗದ ಮೂಲಕ ಇದನ್ನು ಸಾಧಿಸುತ್ತೇವೆ ಎಂದು ಚೀನಾ ಬುಧವಾರ ಹೇಳಿದೆ.
ಚೀನಾ ಅತಿಕ್ರಮಣಕ್ಕೆ ಮುಂದಾದರೆ ಅಮೆರಿಕವು ತೈವಾನ್ ಪರ ನಿಲ್ಲಲಿದೆ ಎಂದು ಅಮೆರಿಕ ಅಧ್ಯಕ್ಷ ಜೋ ಬೈಡನ್ ಹೇಳಿದ ಹಾಗೂ ಅಮೆರಿಕ ಮತ್ತು ಕೆನಡಾ ಯುದ್ಧನೌಕೆಗಳು ತೈವಾನ್ ಜಲಸಂಧಿಯಲ್ಲಿ ಸಂಚರಿಸಿದ ಬೆನ್ನಲ್ಲೇ ಚೀನಾ ಈ ಹೇಳಿಕೆ ನೀಡಿದೆ.
ಕಳೆದ ತಿಂಗಳು ತೈವಾನ್ ಸಮೀಪದ ಚೀನಾ ಕ್ಷಿಪಣಿ ಉಡಾವಣೆ ಮಾಡಿದ ನಂತರ ಉಭಯ ದೇಶಗಳ ನಡುವಿನ ಬಿಕ್ಕಟ್ಟು ತೀವ್ರಗೊಂಡಿದ್ದು, ಸಂಘರ್ಷಮಯ ವಾತಾವರಣ ನಿರ್ಮಾಣವಾಗಿದೆ.
