ಇಂಡೊನೇಷ್ಯಾ: ಜೆಟ್ ಇಂಧನಕ್ಕೆ ತಾಳೆ ಎಣ್ಣೆ ಮಿಶ್ರಣ–ವಿಮಾನ ಹಾರಾಟ ಪರೀಕ್ಷೆ ಯಶಸ್ವಿ

ತಾಳೆ ಎಣ್ಣೆ ಮಿಶ್ರಣಮಾಡಿದ ಜೆಟ್‌ ಇಂಧನ ತುಂಬಿದ್ದವಿಮಾನವು ಬುಧವಾರ ರಾಜಧಾನಿ ಜಕಾರ್ತದಿಂದ 100 ಕಿ.ಮೀ.ದೂರದಬಾಂಡುಂಗ್‌ ನಗರಕ್ಕೆ ಯಶಸ್ವಿಯಾಗಿ ಪ್ರಯಾಣಿಸಿತು.

‘ದೇಶದಲ್ಲಿ ಇಂಧನವನ್ನು ವಾಣಿಜ್ಯೀಕರಣಗೊಳಿಸಲು ಯೋಚಿಸುತ್ತಿರುವ ಸಂದರ್ಭದಲ್ಲಿ ಖಾದ್ಯ ತೈಲವನ್ನು ದೇಶೀಯ ವಿಮಾನಗಳಿಗೆ ಇಂಧನವಾಗಿಸುವಂತಹ ಕ್ರಿಯಾಶೀಲ ದಾರಿಗಳನ್ನು ಹುಡುಕುವುದು ಅಗತ್ಯವಾಗಿದೆ‘ ಎಂದು ಹಣಕಾಸು ಸಚಿವ ಐರ್ಲಾಂಗ್ ಹರ್ತಾರೊತೊ ಪ್ರತಿಪಾದಿಸಿದರು.

‌ಇಂಡೋನೇಷ್ಯಾ ಪ್ರಸ್ತುತ ಜೈವಿಕ ಇಂಧನ ಬಳಕೆಯನ್ನು ಕಡ್ಡಾಯಗೊಳಿಸುತ್ತಿದೆ. ಇಂಧನದೊಂದಿಗೆ ಶೇ 30ರಷ್ಟು ತಾಳೆ ಎಣ್ಣೆ ಬಳಸುವುದನ್ನು ಕಡ್ಡಾಯಗೊಳಿಸಿದೆ. ಇದಕ್ಕೆ ‘ಬಿ30‘ ಎಂದು ಕರೆಯಲಾಗುತ್ತದೆ.

ಪ್ರಸ್ತುತ ಪರೀಕ್ಷಾರ್ಥ ಹಾರಾಟದ ವೇಳೆ ಜೈವಿಕ ಜೆಟ್‌ ಇಂಧನದಲ್ಲಿ ಶೇ 2.4ರಷ್ಟು ತಾಳೆ ಎಣ್ಣೆ ಅಂಶವನ್ನು ಸೇರಿಸಲಾಗಿದೆ. 2015ರ ನಿಯಮದ ಪ್ರಕಾರ ಇಂಡೋನೇಷ್ಯಾ ಈ ಪ್ರಮಾಣವನ್ನು 2025ರ ವೇಳೆ ಶೆ 5ರವರೆಗೆ ಕಡ್ಡಾಯವಾಗಿ ಹೆಚ್ಚಿಸಬೇಕಿದೆ.

ಪರಿಸರವಾದಿಗಳ ವಿರೋಧ: ಅಧಿಕ ಪ್ರಮಾಣದಲ್ಲಿ ತಾಳೆ ಎಣ್ಣೆ ಬೆಳೆಯುವುದರಿಂದ ಅರಣ್ಯ ಪ್ರದೇಶ ನಾಶವಾಗುತ್ತದೆ ಎಂದು ಪರಿಸರವಾದಿಗಳು ಆರೋಪಿಸಿದ್ದಾರೆ. ಇದೇ ಕಾರಣಕ್ಕೆ ತಾಳೆ ಎಣ್ಣೆ ಮಿಶ್ರಿತ ಡೀಸೆಲ್‌ ಅನ್ನು ನಿಷೇಧಿಸಲು ಐರೋಪ್ಯ ಸಮುದಾಯ ಚಿಂತನೆ ನಡೆಸುತ್ತಿದೆ.