ಮ್ಯಾನ್ಮಾರ್‌: ಅಮೆರಿಕದ ಪತ್ರಕರ್ತನಿಗೆ 11 ವರ್ಷ ಜೈಲು ಶಿಕ್ಷೆ

ಸುಳ್ಳು ಮತ್ತು ಪ್ರಚೋದಕನಕಾರಿ ಮಾಹಿತಿ ಹಂಚಿಕೆ ಸೇರಿದಂತೆ ಅವರ ವಿರುದ್ಧ ಹೊರಿಸಲಾಗಿದ್ದ ವಿವಿಧ ಆರೋಪಗಳು ಸಾಬೀತಾದ ಹಿನ್ನೆಲೆಯಲ್ಲಿ, ನ್ಯಾಯಾಲಯ ಫೆನ್‌ಸ್ಟರ್ ಅವರನ್ನು ಅಪರಾಧಿ ಎಂದು ಘೋಷಿಸಿತು.

ಇವರು ಫ್ರಂಟಿಯರ್ ಮ್ಯಾನ್ಮಾರ್ ಆನ್‌ಲೈನ್‌ ನಿಯತಕಾಲಿಕದ ವ್ಯವಸ್ಥಾಪಕ ಸಂಪಾದಕ. ‘ವೀಸಾ ನಿಯಮಗಳ ಉಲ್ಲಂಘನೆ, ಕಾನೂನುಬಾಹಿರ ಸಂಘಟನೆಗಳ ಜೊತೆಗೆ ಸಂಪರ್ಕ ಆರೋಪಗಳು ದೃಢಪಟ್ಟಿವೆ’ ಎಂದು ವಕೀಲ ಥಾನ್ ಜಾವ್ ಆಂಗ್‌ ತಿಳಿಸಿದರು.

ಮ್ಯಾನ್ಮಾರ್‌ ಸರ್ಕಾರ ಮೇ ತಿಂಗಳಲ್ಲಿ ಅವರನ್ನು ಬಂಧಿಸಿತ್ತು. ಅವರು ವಿರುದ್ಧ ದೇಶದ್ರೋಹ ಮತ್ತು ಭಯೋತ್ಪಾದನೆ ಕೃತ್ಯ ನಡೆಸಿದ ಇನ್ನೂ ಎರಡು ಆರೋಪಗಳು ಇದ್ದು, ವಿಚಾರಣೆ ನಡೆದಿದೆ.

ಕುಟುಂಬ ಸದಸ್ಯರ ಭೇಟಿಗೆ ಮೇ 24ರಂದು ಅಮೆರಿಕದ ಡೆಟ್ರಾಯಿಟ್‌ಗೆ ತೆರಳಲು ಸಜ್ಜಾಗುತ್ತಿದ್ದಾಗ ಯಾಂಗೂನ್‌ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಪೊಲೀಸರು ಅವರನ್ನು ಬಂಧಿಸಿದ್ದರು. ಸೇನೆಯು ಕಳೆದ ಫೆಬ್ರುವರಿ ತಿಂಗಳು ದೇಶದ ಆಡಳಿತವನ್ನು ತನ್ನ ವಶಕ್ಕೆ ತೆಗೆದುಕೊಂಡ ಬಳಿಕ ಗಂಭೀರ ಆರೋಪದಡಿ ಶಿಕ್ಷೆಗೆ ಗುರಿಯಾಗಿರುವ ಏಕೈಕ ವಿದೇಶಿ ಪತ್ರಕರ್ತ ಇವರಾಗಿದ್ದಾರೆ.