ಮಾಸ್ಕೋ: ಮಿಲಿಟರಿ ದಾಳಿಯನ್ನು ನಿಲ್ಲಿಸಿ, ನಮ್ಮ ಬೇಡಿಕೆಗಳನ್ನು ಉಕ್ರೇನ್ ಈಡೇರಿಸಿದರೆ ಮಾತ್ರ ನಮ್ಮ ಮಿಲಿಟರಿ ಕಾರ್ಯಾಚರಣೆಯನ್ನು ನಿಲ್ಲಿಸಲಾಗುತ್ತದೆ ಎಂದು ರಷ್ಯಾದ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರು ಟರ್ಕಿಯ ಅಧ್ಯಕ್ಷ ರೆಸೆಪ್ ತಯ್ಯಿಪ್ ಎರ್ಡೋಗನ್ ಅವರೊಂದಿಗಿನ ಸಮಾಲೋಚನೆ ವೇಳೆ ಹೇಳಿದ್ದಾರೆ.
ಇಬ್ಬರೂ ನಾಯಕರು ಇಂದು ದೂರವಾಣಿ ಮೂಲಕ ಸದ್ಯದ ಪರಿಸ್ಥಿತಿಯ ಕುರಿತು ಮಾತುಕತೆ ನಡೆಸಿದರು. ಈ ವೇಳೆ ಪುಟಿನ್ ತಮ್ಮ ನಿಲುವು ಸ್ಪಷ್ಟಪಡಿಸಿದ್ದಾರೆ ಎಂದು ಸ್ಥಳೀಯ ಸುದ್ದಿ ಮಾಧ್ಯಮ ‘ಟಿಎಎಸ್ಎಸ್’ ವರದಿ ಮಾಡಿದೆ.
Russian President Vladimir Putin said that Russia’s military operation in Ukraine can be suspended only if Kiev ceases military actions and fulfills Moscow’s demands in a phone conversation with his Turkish counterpart Recep Tayyip Erdogan: Russian News Agency TASS
ಉಕ್ರೇನ್ ಬಂಡುಕೋರರ ಹಿಡಿತದಲ್ಲಿರುವ ಡಾನ್ಬಾಸ್ ಅನ್ನು ರಕ್ಷಿಸುವುದು ಮತ್ತು ಮುಖ್ಯ ಉದ್ದೇಶಗಳ ಈಡೇರಿಕೆಗಾಗಿ ನಡೆಯುತ್ತಿರುವ ಮಿಲಿಟರಿ ಕಾರ್ಯಾಚರಣೆ ಪ್ರಗತಿಯ ಬಗ್ಗೆ ಪುಟಿನ್ ವಿವರಿಸಿದರು ಎಂದು ವರದಿಯಲ್ಲಿ ಹೇಳಲಾಗಿದೆ.
ಇದಕ್ಕೂ ಮೊದಲು ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರು, ಫ್ರೆಂಚ್ ಅಧ್ಯಕ್ಷ ಇಮ್ಯಾನುಯೆಲ್ ಮ್ಯಾಕ್ರಾನ್ ಅವರೊಂದಿಗೆ ಒಂದೂವರೆ ಗಂಟೆಗಳ ಕಾಲ ದೂರವಾಣಿ ಸಂಭಾಷಣೆ ನಡೆಸಿದರು.
ಮಾರಿಯುಪೋಲ್ನಿಂದ ನಾಗರಿಕರನ್ನು ಸ್ಥಳಾಂತರ ಮಾಡಲು ಉಕ್ರೇನ್ ವಿಫಲವಾಗಿದೆ ಎಂದು ಪುಟಿನ್ ಆರೋಪಿಸಿದ್ದಾರೆ.
ಶನಿವಾರ ಮಾರಿಯುಪೋಲ್ ಅನ್ನು ಸುತ್ತುವರಿದಿದ್ದ ರಷ್ಯಾ ಪಡೆಗಳು ನಿರಂತರ ದಾಳಿ ನಡೆಸಿದ್ದವು. ಮಾನವೀಯ ಪರಿಹಾರ ಕಾರ್ಯಕ್ಕಾಗಿ, ಜನರ ಸ್ಥಳಾಂತರಕ್ಕಾಗಿ ಐದು ಗಂಟೆಗಳ ಕದನ ವಿರಾಮ ಘೋಷಿಸಿರುವುದಾಗಿ ರಷ್ಯಾ ಹೇಳಿತ್ತು. ಆದರೆ, ಕದನವಿರಾಮ ಉಲ್ಲಂಘಿಸಿ ರಷ್ಯಾ ದಾಳಿ ಮಾಡಿದೆ ಎಂದು ಉಕ್ರೇನ್ ಆರೋಪಿಸಿದೆ.