ಬಹುರೂಪಿ ಅಡಿಕೆ! ಏನೆಲ್ಲಾ ಉಪಯೋಗ ಇಲ್ಲಿ ನೋಡಿ..

ಅಡಿಕೆಯ ಮತ್ತೊಂದು ಪ್ರಮುಖ ಉಪ ಉತ್ಪನ್ನ ಎಂದರೆ ಚೊಗರು. ಮಲೆನಾಡು ಭಾಗದಲ್ಲಿ ಹಸಿ ಅಡಿಕೆಯನ್ನು (ಕೆಂಪಡಿಕೆ) ಬೇಯಿಸುವಾಗ ಸಿಗುವ ಕೆಂಪು ಬಣ್ಣದ ದ್ರಾವಣವನ್ನು ಈಗ ಬಣ್ಣವಾಗಿ ಬಳಸುವ ಪ್ರಯೋಗಗಳು ನಡೆಯುತ್ತಿವೆ. ಮೊದಲೆಲ್ಲ ಈ ಚೊಗರನ್ನು ಎಸೆಯಲಾಗುತ್ತಿತ್ತು. ಆದರೆ ಕುಶಲಕರ್ಮಿಗಳು ಉಡುಪುಗಳನ್ನು ತಯಾರಿಸುವಾಗ ಈ ಚೊಗರನ್ನು ಈಗ ನೈಸರ್ಗಿಕ ಬಣ್ಣವಾಗಿ ಬಳಸುತ್ತಿದ್ದಾರೆ. ‘ಅಡಿಕೆಯ ಚೊಗರು ಸಾಮಾನ್ಯವಾಗಿ ಕಂದು ಕೆಂಪು ಗಾಢ ಕೆಂಪು ಮತ್ತು ಕಂದು ಬಣ್ಣಗಳಿಂದ ಕೂಡಿರುತ್ತದೆ. ಹತ್ತಿ ಉಣ್ಣೆ ಮತ್ತು ರೇಷ್ಮೆಯಿಂದ ಮಾಡಿದ ಬಟ್ಟೆಗಳಿಗೆ ಈ ಬಣ್ಣಗಳು ಅತ್ಯುತ್ತಮವಾಗಿ ಹೊಂದುತ್ತವೆ’ ಎಂದು ಹೇಳುತ್ತಾರೆ ಶಿವಮೊಗ್ಗದ ಸಹಕಾರ ಕೈಮಗ್ಗ ಸಂಘ ‘ಚರಕ’ದ ಟೆರೆನ್ಸ್‌ ಪೀಟರ್‌. ಈ ಸಂಘವು ಪ್ರತಿ ಲೀಟರ್‌ಗೆ ₹100 ನೀಡಿ ಅಡಿಕೆ ಬೆಳೆಗಾರರಿಂದ ಚೊಗರನ್ನು ಖರೀದಿಸುತ್ತಿದೆ. ಇದು ಬೆಳೆಗಾರರಿಗೆ ಹೆಚ್ಚುವರಿ ಆದಾಯವನ್ನು ತಂದುಕೊಡುತ್ತಿದೆ. ಚರ್ಮವನ್ನು ಹದಮಾಡುವ ಉದ್ದಿಮೆಯಲ್ಲೂ ಅಡಿಕೆ ಚೊಗರಿನ ಬಳಕೆ ಇದೆ.