ಸ್ಯಾನ್‌ ಫ್ರಾನ್ಸಿಸ್ಕೊ:ಭಾರತೀಯ–ಅಮೆರಿಕನ್‌ ಸುಂದರ್‌ ಪಿಚೈ ನೇತೃತ್ವ ವಹಿಸಿರುವ ಗೂಗಲ್‌ನ ಮಾತೃ ಸಂಸ್ಥೆ ಆಲ್ಫಾಬೆಟ್ 1 ಟ್ರಿಲಿಯನ್‌ ಡಾಲರ್‌ (₹ 71.05 ಲಕ್ಷ ಕೋಟಿ) ಮೌಲ್ಯ ಹೊಂದಿರುವ ಅಮೆರಿಕದ ಕಂಪನಿಗಳ ಸಾಲಿಗೆ ಸೇರ್ಪಡೆಯಾಗಿದೆ. ಅತಿ ಹೆಚ್ಚು ಮಾರುಕಟ್ಟೆ ಮೌಲ್ಯ ಹೊಂದಿರುವ ನಾಲ್ಕನೇ ಕಂಪನಿಯಾಗಿದೆ.
ಗುರುವಾರ ಆಲ್ಫಾಬೆಟ್ ಕಂಪನಿ ಷೇರು 1,451.70 ಡಾಲರ್‌ಗಳಲ್ಲಿ ವಹಿವಾಟು ಮುಕ್ತಾಯವಾಗುವ ಮೂಲಕ ಕಂಪನಿಯ ಮಾರುಕಟ್ಟೆ ಮೌಲ್ಯ 1 ಟ್ರಿಲಿಯನ್‌ ಡಾಲರ್‌ (₹ 71.05 ಲಕ್ಷ ಕೋಟಿ) ತಲುಪಿತು.
ಆ್ಯಪಲ್‌, ಮೈಕ್ರೊಸಾಫ್ಟ್‌ ಹಾಗೂ ಅಮೆಜಾನ್‌ ಸಾಲಿಗೆ ಆಲ್ಫಾಬೆಟ್ ಸೇರ್ಪಡೆಯಾಗಿದೆ. ಐಫೋನ್‌ ತಯಾರಿಸುವ ಆ್ಯಪಲ್‌ ಕಂಪನಿ 2018ರಲ್ಲಿ ಮೊದಲ ಬಾರಿಗೆ 1 ಟ್ರಿಲಿಯನ್‌ ಡಾಲರ್‌ ಮಾರುಕಟ್ಟೆ ಮೌಲ್ಯದ ಗಡಿ ದಾಟಿತು.
