ಕ್ಯಾಂಪ್ಕೊ: ₹1,878 ಕೋಟಿ ವ್ಯವಹಾರ

ಮಂಗಳೂರು: ‘ಕ್ಯಾಂಪ್ಕೊ ಸಂಸ್ಥೆ 2018-19 ನೇ ಸಾಲಿನಲ್ಲಿ ₹1,878 ಕೋಟಿ ವ್ಯವಹಾರ ನಡೆಸುವ ಮೂಲಕ 46 ವರ್ಷಗಳಲ್ಲಿ ಹೊಸ ದಾಖಲೆ ನಿರ್ಮಿಸಿದೆ. ಅಡಿಕೆಯ ಖರೀದಿಯ ಪ್ರಮಾಣದಲ್ಲಿ ಹೆಚ್ಚಳ ಸಾಧಿಸಿದೆ’ ಎಂದು ಅಧ್ಯಕ್ಷ ಎಸ್.ಆರ್. ಸತೀಶ್ಚಂದ್ರ ಹೇಳಿದ್ದಾರೆ.

ಗುರುವಾರ ಪತ್ರಿಕಾಗೋಷ್ಠಿಯಲ್ಲಿ ಈ ಮಾಹಿತಿ ನೀಡಿದ ಅವರು, ‘ಸಂಸ್ಥೆಯು ₹1,589.15 ಕೋಟಿ ಮೌಲ್ಯದ 57,209 ಟನ್ ಅಡಿಕೆ ಖರೀದಿಸಿದ್ದು, ಇದರಲ್ಲಿ ₹ 882.61 ಕೋಟಿ ಮೌಲ್ಯದ 27,362 ಟನ್ ಕೆಂಪಡಿಕೆ ಮತ್ತು ₹ 706.54 ಕೋಟಿ ಮೌಲ್ಯದ 29,846 ಟನ್ ಬಿಳಿ ಅಡಿಕೆ ಸೇರಿದೆ. ₹1,593.40 ಕೋಟಿ ಮೌಲ್ಯದ 54,767 ಟನ್ ಅಡಿಕೆಯನ್ನು ಮಾರಾಟ ಮಾಡಿದೆ’ ಎಂದರು.

‘ಚಾಕ್ಲೇಟ್‌ ತಯಾರಿಕಾ ಕಾರ್ಖಾನೆಯಲ್ಲಿ ಒಟ್ಟು 14,606 ಟನ್ ಉತ್ಪಾದನೆ ಮಾಡಲಾಗಿದ್ದು, ಅದರಲ್ಲಿ 10,042 ಟನ್ ಕ್ಯಾಂಪ್ಕೊ ಬ್ರಾಂಡಿನ ಚಾಕ್ಲೇಟ್‌ ತಯಾರಿಸಲಾಗಿದೆ. ₹193 ಕೋಟಿ ಮೌಲ್ಯದ ಚಾಕ್ಲೇಟ್‌ ಮತ್ತು ಕೊಕ್ಕೊ ಕೈಗಾರಿಕೋತ್ಪನ್ನಗಳು ಮಾರಾಟವಾಗಿದ್ದು, ಇದರಲ್ಲಿ ₹16.75 ಕೋಟಿ ಮೌಲ್ಯದ 1,106 ಟನ್ ರಫ್ತು ಮಾಡಲಾಗಿದೆ’ ಎಂದರು.

‘ಹೆಚ್ಚಿರುವ ಚೊಕೊಚಿಪ್ ಬೇಡಿಕೆಯನ್ನು ಪೂರೈಸಲು ₹3.5 ಕೋಟಿ ವೆಚ್ಚದಲ್ಲಿ ಹೊಸ ಡ್ರಾಪ್ ಚಾಕ್ಲೇಟ್‌ ಯಂತ್ರವನ್ನು ಅಳವಡಿಸಿಕೊಳ್ಳಲಾಗಿದೆ. ಟರ್ಕಿಯಿಂದ ಆಮದು ಮಾಡಿಕೊಂಡಿರುವ ಈ ಯಂತ್ರವು ನಿತ್ಯ 10 ಟನ್ ಉತ್ಪಾದನಾ ಸಾಮರ್ಥ್ಯ ಹೊಂದಿದೆ’ ಎಂದು ಹೇಳಿದರು.