ಲಾಕ್‌ಡೌನ್ ಸಡಿಲಿಕೆ: ಷೇರುಪೇಟೆಗಳಲ್ಲಿ ಉತ್ಸಾಹ, ಸೆನ್ಸೆಕ್ಸ್ 1,000 ಅಂಶ ಏರಿಕೆ

ಎಚ್‌ಡಿಎಫ್‌ಸಿ ಅವಳಿ ಷೇರುಗಳು, ಐಸಿಐಸಿಐ ಬ್ಯಾಂಕ್‌ ಹಾಗೂ ರಿಲಯನ್ಸ್‌ ಇಂಡಸ್ಟ್ರೀಸ್‌ ಷೇರುಗಳು ಉತ್ತಮ ಗಳಿಕೆ ದಾಖಲಿಸಿವೆ. ಸೆನ್ಸೆಕ್ಸ್‌ 1,021.29 ಅಂಶ (ಶೇ 3.15) ಹೆಚ್ಚಳವಾಗಿ 33,445.39 ಅಂಶ ತಲುಪಿದೆ. ರಾಷ್ಟ್ರೀಯ ಷೇರುಪೇಟೆ ಸಂವೇದಿ ಸೂಚ್ಯಂಕ ನಿಫ್ಟಿ 285.40 ಅಂಶ (ಶೇ 2.98) ಏರಿಕೆಯಾಗಿ 9,865.70 ಅಂಶಗಳಲ್ಲಿ ವಹಿವಾಟು ನಡೆದಿದೆ.

ಟಾಟಾ ಸ್ಟೀಲ್‌, ಎಸ್‌ಬಿಐ, ಆ್ಯಕ್ಸಿಸ್‌ ಬ್ಯಾಂಕ್‌, ಐಸಿಐಸಿಐ ಬ್ಯಾಂಕ್‌, ಎಚ್‌ಡಿಎಫ್‌ಸಿ, ಬಜಾಜ್‌ ಫೈನಾನ್ಸ್‌, ಇಂಡಸ್‌ಇಂಡ್‌ ಬ್ಯಾಂಕ್‌ ಷೇರುಗಳು ಶೇ 4ರಿಂದ ಶೇ 7ರ ವರೆಗೂ ಗಳಿಕೆ ಕಂಡಿವೆ. ಸನ್‌ ಫಾರ್ಮಾ ಷೇರು ಕುಸಿದಿದೆ.

ಕಳೆದ ವಾರ ವಹಿವಾಟು ಅಂತ್ಯಕ್ಕೆ ಸೆನ್ಸೆಕ್ಸ್‌ 32,424.10 ಹಾಗೂ ನಿಫ್ಟಿ 9,580.30 ಅಂಶ ಮುಟ್ಟಿತ್ತು. ಶುಕ್ರವಾರ ವಿದೇಶಿ ಹೂಡಿಕೆದಾರರು ₹1,460.71 ಕೋಟಿ ಮೌಲ್ಯದ ಷೇರುಗಳನ್ನು ಖರೀದಿಸಿದ್ದಾರೆ.

ಜೂನ್‌ 8ರಿಂದ ದೇಶದಾದ್ಯಂತ ಹಂತ ಹಂತವಾಗಿ ಲಾಕ್‌ಡೌನ್‌ ಸಡಿಲೆಕೆಗೆ ಕೇಂದ್ರ ಮಾರ್ಗಸೂಚಿಗಳನ್ನು ಪ್ರಕಟಿಸಿದ್ದು, ಆರ್ಥಿಕ ಚಟುವಟಿಕೆಗಳ ಪುನರಾರಂಭ ಸಾಧ್ಯವಾಗಲಿದೆ. ಇದರೊಂದಿಗೆ ಜಾಗತಿಕ ಮಾರುಕಟ್ಟೆಗಳಲ್ಲಿಯೂ ಸಕಾರಾತ್ಮಕ ವಹಿವಾಟು ದಾಖಲಾಗಿರುವುದಿಂದ ದೇಶದ ಷೇರುಪೇಟೆಗಳಲ್ಲಿ ಉತ್ಸಾಹ ಮೂಡಿದೆ.

ದೇಶದಲ್ಲಿ ಕೊರೊನಾ ವೈರಸ್‌ ಸೋಂಕು ಪ್ರಕರಣಗಳ ಸಂಖ್ಯೆ 1.90 ಲಕ್ಷ ದಾಟಿದ್ದು, 5,394 ಮಂದಿ ಸಾವಿಗೀಡಾಗಿದ್ದಾರೆ.