ದೇವನಹಳ್ಳಿ: ಒಳ ಉಡುಪಿನಲ್ಲಿ ಚಿನ್ನವನ್ನು ಅಡಗಿಸಿಟ್ಟುಕೊಂಡು ತಂದಿದ್ದ ಮಹಿಳಾ ಪ್ರಯಾಣಿಕರೊಬ್ಬರು ಕಸ್ಟಮ್ಸ್ ಅಧಿಕಾರಿಗಳ ಕೈಗೆ ಸಿಕ್ಕಿ ಬಿದ್ದಿದ್ದಾರೆ.
ದುಬೈನಿಂದ ಸೋಮವಾರ (ಏ.29) ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಬಂದಿಳಿದ ಮಹಿಳಾ ಪ್ರಯಾಣಿಕರನ್ನು ತಪಾಸಣೆ ಮಾಡಿದಾಗ 717 ಗ್ರಾಂ ಚಿನ್ನ ಪತ್ತೆಯಾಗಿದೆ. ಇದರ ಅಂದಾಜು ಮೌಲ್ಯ ₹ 49.52 ಲಕ್ಷ ಎಂದು ಕಸ್ಟಮ್ಸ್ ಅಧಿಕಾರಿಗಳು ತಿಳಿಸಿದ್ದಾರೆ.
ಚಿನ್ನ ಕಳ್ಳ ಸಾಗಣೆ ಮಾಡುವ ಉದ್ದೇಶದಿಂದಲೇ ಆರೋಪಿ ಮಹಿಳೆ ವಿಶೇಷವಾಗಿ ಒಳ ಉಡುಪು ಸಿದ್ಧಪಡಿಸಿಕೊಂಡಿರುವ ವಿಷಯ ತನಿಖೆಯಲ್ಲಿ ತಿಳಿದು ಬಂದಿದೆ.
ಚಿನ್ನವನ್ನು ಪುಡಿ ಮಾಡಿ ಅದರಿಂದ ಪೇಸ್ಟ್‌ ತಯಾರಿಸಿ ಒಳ ಉಡುಪಿನಲ್ಲಿ ಲೇಪಿಸಲಾಗಿತ್ತು. ಅದು ಗೋಚರಿಸದಂತೆ ಮಹಿಳೆ ಕಪ್ಪು ಬಣ್ಣದ ಉಡುಪು ಧರಿಸಿದ್ದರು.
ಎರಡು ಚಿನ್ನದ ಬಿಸ್ಕೆಟ್‌ ಪ್ರಮಾಣದ ಚಿನ್ನದ ಪೇಸ್ಟ್‌ ಒಳ ಉಡುಪಿನಲ್ಲಿತ್ತು. ಪ್ರಕರಣ ದಾಖಲಿಸಿಕೊಂಡು, ತನಿಖೆ ಕೈಗೊಳ್ಳಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
