ಬೆಂಗಳೂರು | ತರಕಾರಿ ಜೊತೆ ತಂಬಾಕು ಉತ್ಪನ್ನ ಮಾರಾಟ: ಇಬ್ಬರ ಬಂಧನ

‘ಜ್ಞಾನಭಾರತಿಯ ತಿಪ್ಪೇಸ್ವಾಮಿ (35) ಹಾಗೂ ಫಾರೂಕ್ (40) ಬಂಧಿತರು. ಆರೋಪಿಗಳಿಂದ ₹10 ಲಕ್ಷ ಮೌಲ್ಯದ ತಂಬಾಕು ಉತ್ಪನ್ನ ಪೊಟ್ಟಣಗಳು ಹಾಗೂ ಲಾರಿ ಜಪ್ತಿ ಮಾಡಲಾಗಿದೆ. ಆದರೆ, ಈ ತಂಬಾಕು ಉತ್ಪನ್ನ ನಕಲಿ ಎಂಬುದು ಪರಿಶೀಲನೆಯಿಂದ ಗೊತ್ತಾಗಿದೆ’ ಎಂದು ಪೊಲೀಸರು ಹೇಳಿದರು.

‘ತರಕಾರಿ ಮೂಟೆಗಳಲ್ಲಿ ತಂಬಾಕು ಉತ್ಪನ್ನ ಸಾಗಿಸುತ್ತಿದ್ದ ಬಗ್ಗೆ ಮಾಹಿತಿ ಬಂದಿತ್ತು. ಫೆ. 23ರಂದು ರಾತ್ರಿ ಜ್ಞಾನಭಾರತಿ ಠಾಣೆ ವ್ಯಾಪ್ತಿಯಲ್ಲಿ ಹೊರಟಿದ್ದ ಲಾರಿ ತಡೆದು ಪರಿಶೀಲಿಸಲಾಯಿತು. ಲಾರಿಯಲ್ಲಿ ತರಕಾರಿ ಮೂಟೆಗಳಿದ್ದವು. ಅವುಗಳನ್ನು ಬಿಚ್ಚಿ ನೋಡಿದಾಗ, ತರಕಾರಿಗಳ ನಡುವೆ ತಂಬಾಕು ಉತ್ಪನ್ನದ ಪೊಟ್ಟಣಗಳಿದ್ದವು.’

‘ಮೂಟೆಗಳಲ್ಲಿ ಪೊಟ್ಟಣಗಳನ್ನು ಸಾಗಿಸಿ ಅಂಗಡಿಗಳಿಗೆ ತಲುಪಿಸಲಾಗುತ್ತಿತ್ತು. ಅದೇ ತಂಬಾಕು ಉತ್ಪನ್ನವನ್ನು ಅಂಗಡಿಯವರು ಗ್ರಾಹಕರಿಗೆ ಮಾರುತ್ತಿದ್ದರು’ ಎಂದು ತಿಳಿಸಿದರು.