ನೀಲಕಂಠ ಗ್ರಾಮ: ಒಂದೇ ದಿನದಲ್ಲಿ ರಸ್ತೆ ಸುಧಾರಣೆ

ನೀಲಕಂಠ ಗ್ರಾಮವು ಎತ್ತರದ ದಿಬ್ಬದ ಮೇಲಿದೆ. ಹೀಗಾಗಿ ಊರಲ್ಲಿನ ಚರಂಡಿಗಳ ನೀರು ದಿಬ್ಬ ಏರಿ ಗ್ರಾಮ ಪ್ರವೇಶಿಸುವ ಸ್ಥಳದಲ್ಲಿ ಬಂದು ಸಂಗ್ರಹಗೊಳ್ಳುತ್ತಿತ್ತು. ಇದಲ್ಲದೆ ಇಲ್ಲಿಂದ ದಕ್ಷಿಣಕ್ಕೆ ಖಾನಾಪುರದ ಕಡೆಗೆ ಹಾಗೂ ಪೂರ್ವಕ್ಕೆ ಪ್ರತಾಪುರದ ಕಡೆಗೆ ಹೋಗುವ ರಸ್ತೆಗಳಲ್ಲಿ ನೀರು ಹರಿದು ಎಲ್ಲೆಡೆ ಕೆಸರು ಆಗುತ್ತಿತ್ತು. ರಸ್ತೆ ಪಕ್ಕದ ಜಮೀನಿನವರು ಚರಂಡಿ ನಿರ್ಮಿಸಲು ಜಾಗ ನೀಡದ ಕಾರಣ ಅನೇಕ ವರ್ಷಗಳಿಂದ ಈ ಸಮಸ್ಯೆ ಬಗೆಹರಿದಿರಲಿಲ್ಲ.

ಗ್ರಾಮದಿಂದ ಕೆರೆ ದಂಡೆಯ ಮೇಲಿನಿಂದ ಪ್ರತಾಪುರಕ್ಕೆ ಹೋಗುವ ರಸ್ತೆಯಂತೂ ಯಾವಾಗಲೂ ಕೆಸರಿನಿಂದ ಕೂಡಿರುತ್ತಿತ್ತು. ಇಕ್ಕಟ್ಟಾದ ಈ ಜಾಗದಲ್ಲಿ ಸಿಸಿ ರಸ್ತೆ ನಿರ್ಮಿಸಿದ್ದರೂ ಪಕ್ಕದಲ್ಲಿ ಚರಂಡಿ ಇಲ್ಲದ್ದರಿಂದ ನೀರು ಹರಿದು ಎಲ್ಲವೂ ಹಾಳಾಗಿತ್ತು. ಹೀಗಾಗಿ ಈ ಭಾಗದಲ್ಲಿನ ಸುಮಾರು 500 ಎಕರೆ ಜಮೀನಿನ ರೈತರಿಗೆ ಎತ್ತಿನ ಬಂಡಿ, ಬೈಕ್ ಮತ್ತು ಇತರೆ ವಾಹನ ತೆಗೆದುಕೊಂಡು ಹೋಗುವುದಕ್ಕೆ ತೊಂದರೆ ಆಗುತ್ತಿತ್ತು. ಆದ್ದರಿಂದ ಬಸವಕಲ್ಯಾಣ ನಗರಕ್ಕೆ ಬಂದು ಬೇರೆ ರಸ್ತೆಯಿಂದ ಸುಮಾರು 3 ಕಿ.ಮೀ ಅಧಿಕ ದೂರ ಕ್ರಮಿಸಿ ಹೋಗುವ ಪರಿಸ್ಥಿತಿ ಇತ್ತು.

ಮುಖ್ಯವೆಂದರೆ, ಶಾಸಕರು, ತಹಶೀಲ್ದಾರ್ ಹಾಗೂ ಇತರೆ ಅಧಿಕಾರಿಗಳು ಸಹ ಸ್ಥಳಕ್ಕೆ ಭೇಟಿ ನೀಡಿ ಇಲ್ಲಿನ ಸಮಸ್ಯೆ ಬಗೆಹರಿಸಲು ಪ್ರಯತ್ನಿಸಿದ್ದರು. ಪ್ರಜಾವಾಣಿಯ ಕುಂದು ಕೊರತೆ ಕಾಲಂನಲ್ಲಿಯೂ ಜುಲೈ 17 ರಂದು ಈ ಬಗ್ಗೆ ಸುದ್ದಿ ಪ್ರಕಟ ಆಗಿತ್ತು. ಇದೆಲ್ಲದರ ಪರಿಣಾಮವಾಗಿ ಗ್ರಾಮ ಪಂಚಾಯಿತಿ ಪಿಡಿಒ ಚಂದ್ರಾಮ ಧೂಳಖೇಡ ಅವರು ಈ ಸಮಸ್ಯೆ ಬಗೆಹರಿಸುವುದಕ್ಕಾಗಿ ಸತತವಾಗಿ ಪ್ರಯತ್ನಿಸಿದ್ದರು.

ಶನಿವಾರ ಬೆಳಿಗ್ಗೆಯಿಂದಲೇ ಪಿಡಿಒ ಅವರು ಗ್ರಾಮದಲ್ಲಿ ಠಿಕಾಣಿ ಹೂಡಿ ಪಂಚಾಯಿತಿ ಸದಸ್ಯರು, ಗ್ರಾಮದ ಪ್ರಮುಖರೊಂದಿಗೆ ಸಭೆ ಹಮ್ಮಿಕೊಂಡು ಚರ್ಚಿಸಿದರು. ತಕ್ಷಣವೇ ಕಾರ್ಯಪ್ರವೃತ್ತರಾಗಿ ಸಂಜೆಯವರೆಗೆ ಸುಧಾರಣಾ ಕಾರ್ಯ ಪೂರ್ಣಗೊಳಿಸಿದರು. ಗ್ರಾಮ ಪಂಚಾಯಿತಿ ಅಧ್ಯಕ್ಷೆ ಶೋಭಾ ಮೇತ್ರೆ, ಸದಸ್ಯರಾದ ನಾಗನಾಥ ಚವಾಣ್, ವಿಜಯಕುಮಾರ ಮೇತ್ರೆ, ನವನಾಥ ರಾಠೋಡ, ವಿದ್ಯಾಸಾಗರ ಉಡಚಣ, ಇಸ್ಮಾಯಿಲ್, ಸುಭಾಷ ಕುದರೆ ಮತ್ತಿತರರು ಸ್ಥಳದಲ್ಲಿದ್ದು ಸಹಕರಿಸಿದರು.

`ತುರ್ತು ಕೆಲಸ ಇರುವುದರಿಂದ ಗ್ರಾಮ ಪಂಚಾಯಿತಿಯ ತೆರಿಗೆ ಹಣದಿಂದ 2 ಜೆಸಿಬಿ ಯಂತ್ರಗಳನ್ನು ತರಿಸಿ 3 ಕಿ.ಮೀ ಅಂತರದ ರಸ್ತೆಯನ್ನು 15 ಅಡಿ  ಅಗಲದಷ್ಟು ವಿಸ್ತರಿಸಲಾಗಿದೆ. ಎರಡೂ ಕಡೆಗಳಲ್ಲಿ ಚರಂಡಿಗಳನ್ನು ಕೊರೆದು ನೀರು ಸರಾಗವಾಗಿ ಸಾಗುವುದಕ್ಕೆ ವ್ಯವಸ್ಥೆ ಕಲ್ಪಿಸಲಾಗಿದೆ. ಈ ಕಾರ್ಯಕ್ಕಾಗಿ ಕೆಲ ರೈತರು ಸಹಕರಿಸಿದ್ದಾರೆ’ ಎಂದು ಪಿಡಿಒ ಚಂದ್ರಾಮ ಧೂಳಖೇಡ ಹೇಳಿದ್ದಾರೆ.