ಹುಬ್ಬಳ್ಳಿ: ಸಾವಯವ ಕ್ರಾಂತಿಗೆ ಬೇಕಿದೆ ಉತ್ಸಾಹ, ಪ್ರೋತ್ಸಾಹ

‘ಮೊದಲು ನಾನೂ ಯತೇಚ್ಛವಾಗಿ ರಾಸಾಯನಿಕಗಳ ಬಳಕೆ ಮಾಡುತ್ತಿದ್ದೆ. ನಂತರ ಸಾವಯವ ಕೃಷಿ ಪದ್ಧತಿಯಲ್ಲೇ ಕೃಷಿ ಹಾಗೂ ತೋಟಗಾರಿಕಾ ಬೆಳೆಗಳನ್ನು ಬೆಳೆಯಲು ಆರಂಭಿಸಿದೆ. ಧಾರವಾಡ ಕೃಷಿ ವಿಶ್ವವಿದ್ಯಾಲಯ ಕಣ್ಣೇರಿ ಮಠ ಹಾಗೂ ಖಾಸಗಿ ಸಂಸ್ಥೆಗಳು ಸಾವಯವ ಕೃಷಿಕರಿಗೆ ನೆರವು ನೀಡುತ್ತಿದ್ದಾರೆ. ರೈತರೇ ಸೇರಿಕೊಂಡು ಸಾವಯವ ಸಿರಿಧಾನ್ಯ ಒಕ್ಕೂಟ ಹುಬ್ಬಳ್ಳಿ  ಎಪಿಎಂಸಿಯಲ್ಲಿ ಬಸವೇಶ್ವರ ಕೃಷಿಕರ ಸಂಘ ಗಾಮನಗಟ್ಟಿಯಲ್ಲಿ ಸಿದ್ಧೇಶ್ವರಪ್ಪ ರೈತರ ಉತ್ಪಾದಕರ ಸಂಘ ಸ್ಥಾಪಿಸಿಕೊಂಡು ಮಧ್ಯವರ್ತಿಗಳಿಲ್ಲದೆ ನೇರವಾಗಿ ಸಾವಯವ ಉತ್ಪನ್ನಗಳನ್ನು ಮಾರಾಟ ಮಾಡುತ್ತಿದ್ದೇವೆ’ ಎಂದು ಗಾಮನಗಟ್ಟಿಯ ರೈತ ಈಶ್ವರ ಮಾಳಣ್ಣವರ ತಿಳಿಸಿದರು.

‘ರಾಸಾಯನಿಕ ಬಳಕೆಯಿಂದ ನಿತ್ರಾಣಗೊಂಡ ಭೂಮಿ ಚೇತರಿಸಿಕೊಳ್ಳಲು ಸಮಯಬೇಕು. ಬೇಗ ಇಳುವರಿ ಸಿಗಲಿಲ್ಲ ಹೆಚ್ಚು ಫಸಲು ಬರಲಿಲ್ಲ ಎಂದು ಸಾವಯವ ಕೃಷಿಕರು ಮತ್ತೆ ರಾಸಾಯನಿಕ ಬಳಸಬಾರದು. ತಾಳ್ಮೆ ಇರಬೇಕು. ಸಾವಯವ ಕೃಷಿ ವಿಧಾನದಿಂದ ನಾನು ಉತ್ತಮ ಆದಾಯ ಗಳಿಸುತ್ತಿರುವೆ. ಇತರರಿಗೂ ಮಾರ್ಗದರ್ಶನ ನೀಡುತ್ತಿದ್ದೇನೆ’ ಎಂದು ಅಗಡಿ ರೈತ ಬಸಯ್ಯ ಮಂಟೆಯ್ಯನವರ ಹೇಳಿದರು.

ಸಾವಯವ ಕೃಷಿ ಮಾಡುವ ರೈತರಿಗೆ ಕರ್ನಾಟಕ ರಾಜ್ಯ ಸಾವಯವ ಕೃಷಿ ಪ್ರಮಾಣೀಕರಣ ಸಂಸ್ಥೆಯಿಂದ ಪ್ರಮಾಣ ಪತ್ರ ನೀಡಲಾಗುತ್ತಿದೆ. ಮೂರು ವರ್ಷ ಕೃಷಿಭೂಮಿಗೆ ಅಧಿಕಾರಿಗಳು ಭೇಟಿ ನೀಡಿ ಮಣ್ಣು ಬೆಳೆ ಪರಿಶೀಲಿಸುವರು. ಮೂರು ವರ್ಷದ ನಂತರ ಭೂಮಿ ಸಾವಯವ ಪದ್ಧತಿಗೆ ಹೊಂದಿಕೊಳ್ಳುವುದರಿಂದ ಪ್ರಮಾಣ ಪತ್ರ ನೀಡಲಾಗುತ್ತದೆ.

‘ಪರಂಪರಾಗತ ಕೃಷಿ ವಿಕಾಸ ಯೋಜನೆಯಡಿ (ಪಿಕೆವಿವೈ) ಕಲಘಟಗಿ ತಾಲ್ಲೂಕಿನ ದುಮವಾಡ ಹೋಬಳಿಯ 500 ಹೆಕ್ಟೇರ್‌ ಮಾವು ಬೆಳೆಯುವ ಭೂಮಿಯಲ್ಲಿ ಸಾವಯವ ಪದ್ಧತಿ ಅಳವಡಿಸುವ ಕಾರ್ಯ ಜಾರಿಯಲ್ಲಿದೆ. ಮೂರು ವರ್ಷಗಳವರೆಗೆ ಜೈವಿಕ ಗೊಬ್ಬರ ಮತ್ತಿತರ ಸಾವಯವ ಚಟುವಟಿಕೆಗಳಿಗೆ ಶೇ 50ರಷ್ಟು ಸಬ್ಸಿಡಿಯಲ್ಲಿ ಹೆಕ್ಟೇರ್‌ಗೆ ₹31000 ನೀಡಲಾಗುತ್ತದೆ. ತರಬೇತಿ ನೆರವು ಪ್ರಮಾಣಪತ್ರಕ್ಕಾಗಿ ಹೆಕ್ಟೇರ್‌ಗೆ ₹19000 ಶುಲ್ಕ ಪಡೆಯಲಾಗುತ್ತದೆ’ ಎಂದು ಸಹಾಯಕ ತೋಟಗಾರಿಕಾ ನಿರ್ದೇಶಕ ಪ್ರಶಾಂತ್ ದೇವರಮನೆ ತಿಳಿಸಿದರು. ‘ಸದ್ಯಕ್ಕಿಲ್ಲ ಹೊಸ ಯೋಜನೆ’ ‘ಸಾವಯವ ಕೃಷಿಕರಿಗಾಗಿ ಕೃಷಿ ಇಲಾಖೆಯಿಂದ ಸದ್ಯ ಯಾವುದೇ ಹೊಸ ಯೋಜನೆ ಅನುಷ್ಠಾನಗೊಂಡಿಲ್ಲ. ಎರಡು ವರ್ಷದ ಹಿಂದೆ ಎರೆಹುಳು ಗೊಬ್ಬರ ಘಟಕ ಜೀವಾಮೃತ ತೊಟ್ಟಿ ನಿರ್ಮಾಣ ಡ್ರಂ ಖರೀದಿಗೆ ಆರ್ಥಿಕ ನೆರವು ನೀಡಲಾಗುತ್ತಿತ್ತು. ಈ ಯೋಜನೆಗಳು ಸದ್ಯ ಮುಂದುವರಿದಿಲ್ಲ. ಕೃಷಿ ತರಬೇತಿ ಕೇಂದ್ರದಲ್ಲಿ ರೈತರಿಗೆ ನೀಡುವ ತರಬೇತಿಯಲ್ಲಿ ಸಾವಯವ ವಿಧಾನದ ಬಗ್ಗೆಯೂ ಮಾಹಿತಿ ನೀಡಲಾಗುತ್ತದೆ. ಆಸಕ್ತ ರೈತರಿಗೆ ಈಗಾಗಲೇ ಸಾವಯವ ಕೃಷಿ ಮಾಡುತ್ತಿರುವ ರೈತರ ಮೂಲಕ ತಿಳಿವಳಿಕೆ ಮೂಡಿಸಲಾಗುತ್ತಿದೆ’ ಎಂದು ಧಾರವಾಡದ ಸಹಾಯಕ ಕೃಷಿ ನಿರ್ದೇಶಕಿ ಆಶಾ ಹೇಳಿದರು. ‘ರಿಯಾಯ್ತಿ ದರದಲ್ಲಿ ಹಸಿರೆಲೆ ಗೊಬ್ಬರ ವಿತರಿಸಿದ್ದೇವೆ. ಬೇಡಿಕೆ ಅನುಸಾರ ಎರೆಹುಳು ಗೊಬ್ಬರ ವಿತರಣೆ ಮಾಡಲಾಗುವುದು. ಪ್ರಮಾಣಪತ್ರ ಪಡೆದರೆ ಉತ್ಪನ್ನಗಳನ್ನು ಮಾರಾಟ ಮಾಡಲು ರೈತರಿಗೆ ಅನುಕೂಲವಾಗುತ್ತದೆ’ ಎಂದು ಕುಂದಗೋಳದ ಸಹಾಯಕ ಕೃಷಿ ನಿರ್ದೇಶಕಿ ಭಾರತಿ ಮೆಣಸಿನಕಾಯಿ ತಿಳಿಸಿದರು.

‘ಧಾರವಾಡ ಕೃಷಿ ವಿಶ್ವವಿದ್ಯಾಲಯದಲ್ಲಿರುವ ಸಾವಯವ ಕೃಷಿ ಸಂಸ್ಥೆ ಮೂಲಕ 2006ರಿಂದ ಸಾವಯವ ಕೃಷಿ ವಿಧಾನ ವಿಸ್ತರಣೆಗೆ ಸಂಶೋಧನೆ ನಡೆಸಲಾಗುತ್ತಿದೆ. 17 ಬಗೆಯ ಬೆಳೆಗಳನ್ನು ಬೆಳೆ ವಿಧಾನವನ್ನು ರೈತರಿಗೆ ಪ್ರಾತ್ಯಕ್ಷಿಕೆ ಮೂಲಕ ತಿಳಿಸುವ ಜೊತೆಗೆ ಜೈವಿಕ ಗೊಬ್ಬರ ಜೈವಿಕ ಕೀಟನಾಶಕ ಜೈವಿಕ ರೋಗನಾಶಕ ವಿತರಣೆ ಮಾಡಲಾಗುತ್ತಿದೆ. ಸುಮಾರು 50 ಎಕರೆಯಲ್ಲಿ ನಿರಂತರ ಸಂಶೋಧನೆ ನಡೆಸಿ ರೈತರಲ್ಲಿ ಭರವಸೆ ತುಂಬುತ್ತಿದ್ದೇವೆ. ರೈತರ ಸಮಸ್ಯೆ ಬಗೆಹರಿಸಲು ಆದ್ಯತೆ ನೀಡಲಾಗಿದೆ’ ಎಂದು ಸಂಸ್ಥೆಯ ಮುಖ್ಯಸ್ಥ ಶ್ರೀಪಾದ ಕುಲಕರ್ಣಿ ತಿಳಿಸಿದರು.