ಹುಬ್ಬಳ್ಳಿ: ಸಾವಯವ ಕ್ರಾಂತಿಗೆ ಬೇಕಿದೆ ಉತ್ಸಾಹ, ಪ್ರೋತ್ಸಾಹ

ಅತಿಯಾದ ರಸಗೊಬ್ಬರ, ಕೀಟನಾಶಕ ಮೊದಲಾದ ರಾಸಾಯನಿಕಗಳ ಬಳಕೆಯಿಂದ ಧಾರವಾಡ ಜಿಲ್ಲೆ ಸೇರಿದಂತೆ ದೇಶದಾದ್ಯಂತ ಕೃಷಿ ಭೂಮಿ ರೋಗಪೀಡಿತವಾಗಿದೆ. ಪರಿಣಾಮ ಭೂಮಿಯಲ್ಲಿ ಮೂಡುವ ಬೆಳೆಗಳು ವಿಷಮಯವಾಗಿದ್ದು, ಇಂತಹ ಆಹಾರ ಸೇವಿಸುವುದರಿಂದ ಸಾವಿರಾರು ರೋಗಗಳು ಬಾಧಿಸುತ್ತಿವೆ. ಚಿಕ್ಕ ವಯಸ್ಸಿನಲ್ಲೇ ಮಾರಣಾಂತಿಕ ಕಾಯಿಲೆಗಳಿಗೆ ತುತ್ತಾಗುವುದು, ಜೀವಿತಾವಧಿ ಕಡಿಮೆಯಾಗುತ್ತಿರುವುದು, ಪ್ರಾಣಿಗಳ ಮಾರಣಹೋಮ, ಪರಿಸರ ಮಾಲಿನ್ಯ ಮೊದಲಾದ ಜ್ವಲಂತ ಸಮಸ್ಯೆಗಳಿಗೆ ಇದೇ ಕಾರಣ ಎಂಬುದು ತಜ್ಞರ ಅಭಿಮತ. ಇದು ಎಚ್ಚರಿಕೆಯ ಕರೆಗಂಟೆಯೂ ಹೌದು.

ಇಂತಹ ವಿಷಮ ಪರಿಸ್ಥಿತಿಯಿಂದ ಹೊರಬರಲು ಇರುವ ದಾರಿಗಳಲ್ಲಿ ಸಾವಯವ ಕೃಷಿ ಪದ್ಧತಿ ಪ್ರಮುಖವಾದದ್ದು. ಸತ್ವ ಕಳೆದುಕೊಂಡು ರೋಗದಿಂದ ಬಳಲುತ್ತಿರುವ ಭೂಮಿಗೆ ‘ಸಾವಯವ’ ಚಿಕಿತ್ಸೆ ನೀಡಿ,  ಉಪಚಾರ ಮಾಡಬೇಕಿದೆ.

ನೈಸರ್ಗಿಕವಾಗಿ ಸಿಗುವ ವಸ್ತುಗಳನ್ನೇ ಬಳಸಿಕೊಂಡು, ಆರೋಗ್ಯಕರ ಕೃಷಿ ಚಟುವಟಿಕೆಗೆ ಪೂರವಾದ ಬೀಜೋಪಚಾರ, ಗೊಬ್ಬರ, ಕೀಟನಾಶಕ ತಯಾರಿಸಿ, ಅವುಗಳಿಂದ ಸತ್ವಯುತ ಬೆಳೆ ಬೆಳೆಯುವ ಕ್ರಮವಿದು. ಇದರಿಂದ ಭೂಮಿಯ ಫಲವತ್ತತೆ ಚಿರಕಾಲ ಉಳಿಯುತ್ತದೆ. ಇಲ್ಲಿ ಬೆಳೆದ ಉತ್ಪನ್ನಗಳ ಸೇವನೆಯಿಂದ ಉತ್ತಮ ಆರೋಗ್ಯ ಕಾಪಾಡಿಕೊಳ್ಳಬಹುದು. ನಮ್ಮ ಆರೋಗ್ಯದೊಂದಿಗೆ ಭೂಮಿಯ ಆರೋಗ್ಯವೂ ವೃದ್ಧಿಸುತ್ತದೆ.

ಭೂಮಿಯನ್ನು ರೋಗಮುಕ್ತವಾಗಿಸಲು ಇತ್ತೀಚಿನ ವರ್ಷಗಳಲ್ಲಿ ಹಲವು ರೈತರು ಸಾವಯವ  ಕೃಷಿಯ ಕಂಕಣ ತೊಟ್ಟಿದ್ದಾರೆ. ಆರಂಭದಲ್ಲಿ ಲಾಭ–ನಷ್ಟ ಲೆಕ್ಕಿಸದೆ, ದೀರ್ಘಕಾಲದ ಪ್ರಯೋಜನೆ ಪಡೆಯಲು ಇನ್ನೂ ಹೆಚ್ಚಿನ ರೈತರು ಉತ್ಸಾಹ ತೋರಬೇಕಿದೆ. ಅದಕ್ಕೆ ತಕ್ಕಂತೆ ಸರ್ಕಾರದಿಂದ ಹೆಚ್ಚಿನ ಸೌಲಭ್ಯಗಳೂ ಸಿಗಬೇಕಿದೆ. ಅಗತ್ಯ ಜಾಗೃತಿ, ಯೋಜನೆ, ಆರ್ಥಿಕ ನೆರವು, ಮಾರುಕಟ್ಟೆ ವ್ಯವಸ್ಥೆ ಮೊದಲಾದ ಸೌಕರ್ಯಗಳ ಬಗ್ಗೆ ಸರ್ಕಾರ ಯೋಚಿಸಬೇಕು, ಯೋಜಿಸಬೇಕು ಎಂದು ರೈತರು ಆಗ್ರಹಿಸುತ್ತಾರೆ.

‘ಹೆಚ್ಚು ಪ್ರಚಾರ ಅವಶ್ಯ’

ಅಳ್ನಾವರ: ‘ಹೆಚ್ಚಿನ ರೈತರು ಸಾವಯವ ಕೃಷಿ ಪದ್ಧತಿ ಅಳವಡಿಸಿಕೊಳ್ಳಲು ಕೃಷಿ ಇಲಾಖೆ ಮತ್ತಷ್ಟು ಪ್ರಚಾರ ಹಾಗೂ ತಿಳಿವಳಿಕೆ ಕಾರ್ಯಕ್ರಮ ಹಮ್ಮಿಕೊಳ್ಳಬೇಕು. ರೈತರಲ್ಲಿ ಆಸಕ್ತಿ ಇದ್ದರೂ ಮಾಹಿತಿ ಕೊರತೆಯಿಂದ ಮನೆಗೆ ಬೇಕಾದಷ್ಟು ಮಾತ್ರ ಬೆಳೆ ಬೆಳೆಯುತ್ತಿದ್ದಾರೆ’ ಎಂದು ಕುಂಬಾರಕೊಪ್ಪ ಗ್ರಾಮದ ರೈತ ಅಶೋಕ ಜೋಡಟ್ಟಿಯವರ ಹೇಳಿದರು.

ಪೂರಕ ಮಾಹಿತಿ: ರಾಜಶೇಖರ ಸುಣಗಾರ, ರಮೇಶ ಓರಣಕರ, ಬಸನಗೌಡ ಪಾಟೀಲ