ಹಳೇಬೀಡು: ಕಾರ್ಮಿಕರ ಮಕ್ಕಳ ಸುರಕ್ಷತೆಗೆ ಕೂಸಿನಮನೆ

ಆಕರ್ಷಕವಾದ ಚಿತ್ರಗಳಿಂದ ಕಂಗೊಳಿಸುತ್ತಿರುವ ಸ್ವಚ್ಛವಾದ ಕೂಸಿನ ಮನೆಗೆ 4 ಮಕ್ಕಳು ಪ್ರವೇಶ ಪಡೆದಿದ್ದಾರೆ. 15 ಮಕ್ಕಳು ಪ್ರವೇಶ ಪಡೆಯುವ ಸಾಧ್ಯತೆ ಇದೆ.

‘ರಸ್ತೆ, ಕಟ್ಟಡ ನಿರ್ಮಾಣ ಮೊದಲಾದ ಕೆಲಸದಲ್ಲಿ ತೊಡಗಿದ್ದಾಗ ಮಹಿಳಾ ಕಾರ್ಮಿಕರು ಪುಟ್ಟ ಮಕ್ಕಳನ್ನು ಜೊತೆಯಲ್ಲಿ ಇಟ್ಟುಕೊಂಡು ಕೆಲಸ ಮಾಡುತ್ತಾರೆ. ಮನೆ ಮಂದಿಯೆಲ್ಲರೂ ಕೂಲಿ ಕೆಲಸ ಮಾಡಿದರೆ ಮಾತ್ರ ಹೊಟ್ಟೆಪಾಡು ಸಾಧ್ಯ ಎನ್ನುವ ಪರಿಸ್ಥಿತಿಯಲ್ಲಿ ಸಾಕಷ್ಟು ಕುಟುಂಬಗಳಿವೆ. ವಯೋವೃದ್ದರು ಸಹ ಕೈಲಾದ ಕೆಲಸ ಮಾಡಿಕೊಂಡು ಜೀವನ ಸಾಗಿಸುವುದರಿಂದ, ಮನೆಯಲ್ಲಿ ಮಕ್ಕಳ ಲಾಲನೆ, ಪಾಲನೆಗೆ ಹಿರಿಯರು ಸಹ ಇರುವುದಿಲ್ಲ. ಹೀಗಾಗಿ ಮಕ್ಕಳ ಸರಕ್ಷತೆ ಕಾಪಾಡಲು ಸರ್ಕಾರ ಕೂಲಿ ಕಾರ್ಮಿಕರ ನೆರವಿಗೆ ಹೆಜ್ಜೆ ಇಟ್ಟಿದೆ. ಈ ನಿಟ್ಟಿನಲ್ಲಿ ಹಳೇಬೀಡು ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿಯೂ ಕೂಸಿನ ಮನೆ ಆರಂಭಿಸಲಾಗಿದೆ’ ಎನ್ನುತ್ತಾರೆ ಪಂಚಾಯಿತಿ ಅಭಿವೃದ್ದಿ ಅಧಿಕಾರಿ ಎಸ್.ಸಿ.ವಿರೂಪಾಕ್ಷ.

‘ಹೊಲ, ಗದ್ದೆಗಳಲ್ಲಿ ಒಂದು ಕಡೆ ಮಗುವನ್ನು ಮಲಗಿಸಿ ಕೆಲಸ ಮಾಡುವಾಗ ಕ್ರಿಮಿಕೀಟ ಮಾತ್ರವಲ್ಲದೇ ಹಾವು ಮೊದಲಾದ ವಿಷ ಜಂತುಗಳಿಂದ ಮಕ್ಕಳ ಪ್ರಾಣಕ್ಕೆ ಕುತ್ತು ಬರುವ ಸಾಧ್ಯತೆ ಇರುತ್ತದೆ. ಬಿಸಿಲು, ಮಳೆ, ಗಾಳಿ ಹಾಗೂ ದೂಳಿನಿಂದಲೂ ಮಕ್ಕಳ ಆರೋಗ್ಯದ ಮೇಲೆ ದುಷ್ಪರಿಣಾಮ ಸಾಧ್ಯತೆ ಇರುತ್ತದೆ ಎಂಬುದನ್ನು ಮನಗಂಡು ಸರ್ಕಾರ ಕೂಸಿನ ಮನೆಗೆ ಅನುದಾನ ನೀಡಿದೆ’ ಎನ್ನುತ್ತಾರೆ ವಿರೂಪಾಕ್ಷ.

ಹಳೇಬೀಡಿನ ಕೆಪಿಎಸ್ ಶಾಲೆಯ ಕೊಠಡಿಯೊಂದರಲ್ಲಿ ನಿರ್ಮಿಸಿರುವ ಕೂಸಿನ ಮನೆಯಲ್ಲಿ ಮಕ್ಕಳ ಮನಸ್ಸಿಗೆ ಹಿತ ನೀಡುವ ಕಾರ್ಟೂನ್ಗಳನ್ನು ಚಿತ್ರಿಸಲಾಗಿದೆ. ಚಿತ್ರದ ಮೂಲಕ ಅಕ್ಷರ ಪರಿಚಯ ಮಾಡಲಾಗಿದೆ. ಮಕ್ಕಳು ಆಡುವ ಆಟದ ಪರಿಚಯವನ್ನು ಸಹ ಗೋಡೆಗಳಲ್ಲಿ ಬರೆಸಲಾಗಿದೆ. ಕೂಸಿನಮನೆಯಲ್ಲಿ ಸ್ವಚ್ಛತೆ ಕಾಪಾಡಲಾಗಿತ್ತು. ಮಕ್ಕಳಿಗೆ ಅಗತ್ಯವಿರುವ ಆರೋಗ್ಯಕರ ಪರಿಸರ ನಿರ್ಮಿಸಲಾಗಿದೆ.

‘ಗ್ರಾಮೀಣ ಮಕ್ಕಳು ಬೌದ್ಧಿಕ ಬೆಳವಣಿಗೆ ಹೊಂದುವುದರೊಂದಿಗೆ ಶೈಕ್ಷಣಿಕವಾಗಿ ಪ್ರಗತಿಯಾಗಬೇಕು ಎಂಬ ಪರಿಕಲ್ಪನೆಯಿಂದ ಕೂಸಿನಮನೆ ಆರಂಭವಾಗಿದೆ. ಬೆಳಿಗ್ಗೆ 10 ಸಂಜೆ 5 ರವರೆಗೂ ಕೂಸಿನಮನೆಯ ಸಂರಕ್ಷಕರು ಹಾಗೂ ಸಹಾಯಕರು ಮಕ್ಕಳ ಸುರಕ್ಷತೆ ಕಾಪಾಡುವುದರೊಂದಿಗೆ ಮಕ್ಕಳ ಜೊತೆ ಆಟ –ಪಾಠದಲ್ಲಿ ತೊಡಗಿಕೊಂಡಿರುತ್ತಾರೆ. ಮಕ್ಕಳ ಮನಸ್ಸನ್ನು ಉತ್ತಮ ದಾರಿಗೆ ಕೊಂಡೊಯ್ಯವ ಕೆಲಸ ಕೂಸಿನ ಮನೆಯಲ್ಲಿ ನಡೆಯಲಿದೆ’ ಎನ್ನುತ್ತಾರೆ ಗ್ರಾಮ ಪಂಚಾಯಿತಿ ಅಧ್ಯಕ್ಷ ನಿತ್ಯಾನಂದ.

‘ಮಕ್ಕಳಿಗೆ ಹಾಲು, ಮೊಟ್ಟೆ, ಕಿಚಡಿಯನ್ನು ತಿನ್ನಿಸಲಾಗುವುದು. ಹಾಡು, ನೃತ್ಯ ಹಾಗೂ ಅಟದೊಂದಿಗೆ ಮಕ್ಕಳ ಸಂರಕ್ಷಣೆ ಕಾಪಾಡಲಾಗುವುದು. ವರ್ಣಮಾಲೆ, ದೇಹದ ಭಾಗಗಳನ್ನು ಪರಿಚಯ ಮಾಡುವುದರೊಂದಿಗೆ ಶಿಸ್ತು, ಸಂಯಮವನ್ನು ಕಲಿಸಲಾಗುವುದು’ ಎಂದು ಕೂಸಿನಮನೆ ಸಂರಕ್ಷಕಿ ಕಾವ್ಯಾ ಎನ್.ಎಚ್ ಹೇಳುತ್ತಾರೆ.

‘ಕಾರ್ಮಿಕರ ಮಕ್ಕಳ ಸುರಕ್ಷತೆಗೆ ಕೂಸಿನಮನೆಯ ಅಗತ್ಯವಿತ್ತು. ಪುಟ್ಟ ಮಕ್ಕಳಿರುವ ಕಾರ್ಮಿಕ ಕುಟುಂಬಕ್ಕೆ ಅನುಕೂಲ ಆಗಿದೆ’ ಎಂದರು ಕಾರ್ಮಿಕ ಮಹಿಳೆ ಸರೋಜ.

ಕುಟುಂಬದವರೆಲ್ಲ ಕೂಲಿ ಕೆಲಸ ಮಾಡುವ ಸಾಕಷ್ಟು ಮನೆಗಳಲ್ಲಿ ಪುಟ್ಟ ಮಕ್ಕಳಿವೆ. ಕಾರ್ಮಿಕರ ಕುಟುಂಬಗಳು ಕೂಸಿನ ಮನೆಯ ಸದುಪಯೋಗ ಮಾಡಿಕೊಳ್ಳಬೇಕಿದೆ. ಗ್ರಾಮ ಪಂಚಾಯಿತಿಯವರು ಕೂಸಿನಮನೆ ಸದ್ಬಳಕೆ ಮಾಡಿಕೊಳ್ಳುವಂತೆ ಕೂಲಿ ಕಾರ್ಮಿಕರಿಗೆ ಸಲಹೆ ಮಾಡುತ್ತಿದ್ದಾರೆ.