ಗುರುವಾರ , ಮಾರ್ಚ್ 4, 2021
30 °C

ಕಲಬುರ್ಗಿ: ವೃದ್ಧ ದಂಪತಿ ನಿರ್ಲಕ್ಷಿಸಿದ ಜಿಮ್ಸ್ ಸಿಬ್ಬಂದಿ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಕಲಬುರ್ಗಿ: ಚಿಕಿತ್ಸೆ ಪಡೆಯಲು ಜಿಮ್ಸ್‌ಗೆ ದಾಖಲಾಗಿದ್ದ ವೃದ್ಧ ದಂಪತಿಯನ್ನು ಅಲ್ಲಿನ ಸಿಬ್ಬಂದಿ ಸಂಪೂರ್ಣ ನಿರ್ಲಕ್ಷ್ಯ ಮಾಡಿದ ಘಟನೆ ಶುಕ್ರವಾರ ಬೆಳಕಿಗೆ ಬಂದಿದೆ.‌

ಅಜ್ಜಿಯೊಬ್ಬರು ಜಿಮ್ಸ್‌ನಲ್ಲಿ ಸ್ಟ್ರೆಚರ್‌ ಮೇಲೆ ನಿತ್ರಾಣವಾಗಿ ಮಲಗಿದ್ದರು. ಸುತ್ತ ಹಲವು ಸಿಬ್ಬಂದಿ ಓಡಾಡುತ್ತಿದ್ದರೂ ಅವರನ್ನು ವಾರ್ಡ್‌ಗೆ ಕರೆದೊಯ್ಯಲು ಯಾರೂ ಸಹಾಯಕ್ಕೆ ಬರಲಿಲ್ಲ. ಕೊನೆಗೆ, ಅವರೊಂದಿಗೆ ಬಂದಿದ್ದ ವೃದ್ಧ ಪತಿಯೇ ಕುಂಟುತ್ತ ಸ್ಟ್ರೆಚರ್‌ ಎಳೆದುಕೊಂಡು ಹೋಗಬೇಕಾಯಿತು. ಈ ವೃದ್ಧ ದಂಪತಿ ಕಷ್ಟ ನೋಡಿದ ವ್ಯಕ್ತಿಯೊಬ್ಬರು ಮೊಬೈಲ್‌ನಲ್ಲಿ ವಿಡಿಯೊ ಮಾಡಿ ಸಾಮಾಜಿಕ ಜಾಲತಾಣದಲ್ಲಿ ಹರಿಬಿಟ್ಟಿದ್ದಾರೆ.

ಅಫಜಲಪುರ ತಾಲ್ಲೂಕಿನ ಚಿಂಚೋಳಿ ಗ್ರಾಮದ ಮಲ್ಲಮ್ಮ ಅವರನ್ನು ಪತಿ ಚಂಪನ್ನ ಅವರು ಮೈ–ಕೈ ನೋವಿನ ಚಿಕಿತ್ಸೆಗಾಗಿ ಜಿಮ್ಸ್‌ಗೆ ಕರೆದುಕೊಂಡು ಬಂದಿದ್ದರು.‌ ಒಪಿಡಿ ಕಾರ್ಡ್‌ ಮಾಡಿಸಿದ ನಂತರ, ಎಕ್ಸ್‌–ರೇ ತೆಗೆಯಲು ಸಿಬ್ಬಂದಿ ವಾರ್ಡ್‌ಗೆ ಕರೆದೊಯ್ದರು. ಎಕ್ಸ್‌–ರೇ ತೆಗೆದ ಬಳಿಕ ಸಿಬ್ಬಂದಿ ಅಜ್ಜಿಯನ್ನು ಅಲ್ಲೇ ಬಿಟ್ಟುಹೋದರು.

ತುಂಬ ಹೊತ್ತು ಕಾದು ಕುಳಿತ ಚಂಪನ್ನ ಅವರು ಅಜ್ಜಿ ಮಲಗಿದ್ದ ಸ್ಟ್ರೆಚರ್‌ನ್ನು ತಾವೇ ಎಳೆದುಕೊಂಡು ಒಪಿಡಿ ಕಡೆಗೆ ಹೊರಟರು. ಚಂಪನ್ನ ಅವರಿಗೂ 78 ವರ್ಷ ವಯಸ್ಸಾಗಿದ್ದು ನಡೆದಾಡಲು ಆಗದ ಸ್ಥಿತಿಯಲ್ಲಿದ್ದಾರೆ. ಆದರೂ, ಪತ್ನಿಯನ್ನು ಸ್ಟ್ರೆಚರ್‌ ಮೇಲೆ ಮಲಗಿಸಿಕೊಂಡು ಕುಂಟುತ್ತ ಹೊರಟಿದ್ದ ಅವರ ಸ್ಥಿತಿ ಕಂಡು ಸುತ್ತಲಿನ ಜನ ಮಮ್ಮಲ ಮರುಗಿದರು. ಆದರೆ, ಯಾರೂ ಸಹಾಯಕ್ಕೆ ಬರಲಿಲ್ಲ.‌‌ ವಾರ್ಡ್‌ ತಲುಪಿದ ನಂತರ ವೈದ್ಯರು ಚಿಕಿತ್ಸೆ ನೀಡಿದ್ದಾರೆ.

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು