ಶ್ರೀನಿವಾಸಪುರ: ಶತಮಾನದ ಶಾಲೆಗೆ ಬೇಕು ಮೂಲಸೌಕರ್ಯ

ಈ ಸರ್ಕಾರಿ ಶಾಲೆ ಉತ್ತಮ ಗುಣಮಟ್ಟದ ಶಿಕ್ಷಣ ನಿಡುವಲ್ಲಿ ತಾಲ್ಲೂಕಿನಲ್ಲೇ ಮುಂಚೂಣಿಯಲ್ಲಿದೆ. ಸರ್ಕಾರಿ ಶಾಲೆಗಳು ಮಕ್ಕಳ ಕೊರತೆಯಿಂದ ಬಣಗುಡುತ್ತಿರುವಾಗ, ಈ ಶಾಲೆಯಲ್ಲಿ 1ರಿಂದ 8ನೇ ತರಗತಿವರೆಗೆ 438 ಮಕ್ಕಳು ಕಲಿಯುತ್ತಿದ್ದಾರೆ. ವರ್ಷದಿಂದ ವರ್ಷಕ್ಕೆ ಶಾಲೆಗೆ ಸೇರುವ ಮಕ್ಕಳ ಸಂಖ್ಯೆ ಹೆಚ್ಚುತ್ತಲೇ ಇದೆ.

ಮೂಲಸೌಕರ್ಯದ ಕೊರತೆ ನಡುವೆಯೂ ಈ ಶಾಲೆ, ರಾಜ್ಯಮಟ್ಟದ ಸ್ವಚ್ಛ ವಿದ್ಯಾಲಯ ಪುರಸ್ಕಾರ ಹಾಗೂ ಸ್ವಾಭಿಮಾನಿ ಸಾರ್ವಜನಿಕ ಶಾಲಾ ಪ್ರಶಸ್ತಿ ಪಡೆದುಕೊಂಡಿದೆ. ಶಾಲಾವರಣದಲ್ಲಿ ಗಿಡ ಮರ ಬೆಳೆಸಲಾಗಿದ್ದು ಹಸಿರು ಪರಿಸರ ಕಂಗೊಳಿಸುತ್ತಿದೆ.

ಮೂಲಸೌಕರ್ಯದ ಕೊರತೆಯಿಂದಾಗಿ ಜನಪ್ರತಿನಿಧಿಗಳು ಶಿಫಾರಸು ಮಾಡಿದ ವಿದ್ಯಾರ್ಥಿಗಳನ್ನು ಶಾಲೆಗೆ ಸೇರಿಸಿಕೊಳ್ಳಲು ಸಾಧ್ಯವಾಗುತ್ತಿಲ್ಲ. ಹಾಗಾಗಿ ಪ್ರತಿ ವರ್ಷ ಶಾಲೆಯಲ್ಲಿ ದಾಖಲಾತಿ ಬಯಸಿ ಬರುವ ಹೆಚ್ಚಿನ ಸಂಖ್ಯೆಯ ವಿದ್ಯಾರ್ಥಿಗಳನ್ನು ವಾಪಸ್ ಕಳಿಸಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ ಎಂಬುದು ಶಾಲೆಯ ಮುಖ್ಯ ಶಿಕ್ಷಕ ಎಂ.ಬೈರೇಗೌಡ ಅವರ ಅಳಲು.

ಶಾಲೆಯಲ್ಲಿ ಒಟ್ಟು 17 ತರಗತಿ ಕೊಠಡಿಗಳಿವೆ. ಆಪೈಕಿ 6 ಕೊಠಡಿಗಳು ಶಿಥಿಲಗೊಂಡು ಹಾಳಾಗಿವೆ. ಈ ಕೊಠಡಿಗಳ ಗೋಡೆ ಕುಸಿಯುವ ಹಂತ ತಲುಪಿದೆ. ಶಾಲೆಯ ಬಹುತೇಕ ಕೊಠಡಿಗಳ ಮೇಲ್ಚಾವಣಿ ಸಿಮೆಂಟ್ ಉದುರಿ ನೆಲಕಚ್ಚಿದೆ. 1ರಿಂದ 8ನೇ ತರಗತಿ ವರೆಗೆ 8 ಇಂಗ್ಲೀಷ್ ಮಾಧ್ಯಮ ಹಾಗೂ 8 ಕನ್ನಡ ಮಾಧ್ಯಮ ಸೇರಿದಂತೆ ಒಟ್ಟು 16 ತರಗತಿಗಳಿವೆ. ಶಾಲೆಗೆ 14 ಶಿಕ್ಷಕ ಹುದ್ದೆಗಳು ಮಂಜೂರಾಗಿದ್ದರೂ, 11 ಶಿಕ್ಷಕರು ಮಾತ್ರ ಕಾರ್ಯನಿರ್ವಹಿಸುತ್ತಿದ್ದಾರೆ. ಆ ಪೈಕಿ 4 ಮಂದಿ ಅತಿಥಿ ಶಿಕ್ಷಕರು. ಇರುವ ಶಿಕ್ಷಕರಿಗೆ ಬಿಡುವಿಲ್ಲದ ಕೆಲಸ. ಶಿಕ್ಷಕರು ರಜೆ ಪಡೆದರೆ ಅವರ ತರಗತಿಗಳು ಖಾಲಿ ಬಿಡಬೇಕಾದ ಪರಿಸ್ಥಿತಿ ಸಾಮಾನ್ಯವಾಗಿದೆ.

ಶಾಲೆಯಲ್ಲಿ 438 ವಿದ್ಯಾರ್ಥಿಗಳಿದ್ದರೂ ಆಟದ ಮೈದಾನವಿಲ್ಲ. ಶಾಲೆಯ ಪಕ್ಕದಲ್ಲಿ ಶಾಲೆಗೆ ಸೇರಿದ ಜಮೀನು ಇದ್ದರೂ, ಪ್ರಭಾವಿಗಳ ಕೈವಾಡದಿಂದ ಬಳಸಿಕೊಳ್ಳಲು ಸಾಧ್ಯವಾಗುತ್ತಿಲ್ಲ. ಶಾಲೆಗೆ ಪೂರ್ಣ ಪ್ರಮಾಣದ ಕಾಂಪೌಂಡ್ ಇಲ್ಲದ ಪರಿಣಾಮವಾಗಿ ಶಾಲಾವರಣ ರಾತ್ರಿ ಹೊತ್ತು ಕುಡುಕರ ಅಡ್ಡೆಯಾಗಿ ಮಾರ್ಪಡುತ್ತದೆ. ಶಾಲೆ ಪ್ರಾರಂಭಕ್ಕೆ ಮುನ್ನ ಖಾಲಿ ಮದ್ಯದ ಬಾಟಲಿ ಹಾಗೂ ತಿಂದೆಸೆದ ಪ್ಲಾಸ್ಟಿಕ್ ಪೇಪರ್ ತೆರವುಗೊಳಿಸುವುದು ಶಿಕ್ಷಕರಿಗೆ ಹೆಚ್ಚುವರಿ ಕೆಲಸವಾಗಿ ಪರಿಣಮಿಸಿದೆ.

ವಿದ್ಯಾರ್ಥಿಗಳು ಪಟ್ಟಣದ ಎಂ.ಜಿ. ರಸ್ತೆಯಿಂದ ಶಾಲೆಗೆ ಬರಲು ಅಗತ್ಯವಾದ ರಸ್ತೆ ಇಲ್ಲ. ಶಾಲೆ ಹಿಂದೆ ರಸ್ತೆಗಾಗಿ ಮೀಸಲಾದ ಜಾಗದಲ್ಲಿ ಖಾಸಗಿಯವರು ಪೆಟ್ಟಿಗೆ ಅಂಗಡಿ ಇಟ್ಟಿದ್ದಾರೆ. ಹಿಂಭಾಗದ ರಸ್ತೆಯನ್ನೂ ಬಿಡದೆ ಕೆಲವರು ಒತ್ತುವರಿ ಮಾಡಿಕೊಂಡಿದ್ದಾರೆ. ಚರಂಡಿಗಳು ಕೊಳೆತು ನಾರುತ್ತಿವೆ. ದುರ್ನಾತ ಬೀರುತ್ತಿರುವ ಚರಂಡಿಗಳಿಂದಾಗಿ ಅನಾರೋಗ್ಯಕರ ಪರಿಸರ ನಿರ್ಮಾಣವಾಗಿದೆ. ಸೊಳ್ಳೆ ಕಾಟ ಹೆಚ್ಚಿದೆ. ವಿದ್ಯಾರ್ಥಿಗಳು ಮೂಗು ಮುಚ್ಚಿಕೊಂಡು ಪಾಠ ಕೇಳಬೇಕಾಗಿ ಬಂದಿದೆ.

ಕ್ಷೇತ್ರದ ಶಾಸಕರೇ ಪೋಷಕರಾಗಿರುವ ಕರ್ನಾಟಕ ಸರ್ಕಾರಿ ಉನ್ನತೀಕರಿಸಿದ ಹಿರಿಯ ಪ್ರಾಥಮಿಕ ಶಾಲೆ ಪರಿಸ್ಥಿತಿಯೇ ಹೀಗಾದರೆ, ಉಳಿದ ಶಾಲೆಗಳ ಗತಿಯೇನು? ಯಾವುದೇ ಖಾಸಗಿ ಶಾಲೆಗಿಂತ ಕಡಿಮೆ ಇಲ್ಲದಂಥ ವ್ಯವಸ್ಥೆ ರೂಪಿಸಲು ಶಕ್ತಿಮೀರಿ ಶ್ರಮಿಸುತ್ತಿರುವ ಶಾಲೆಯ ಶಿಕ್ಷಕರು ಹಾಗೂ ಮುಖ್ಯ ಶಿಕ್ಷಕರಿಗೆ ಯಾರೊಬ್ಬರೂ ಬೆಂಬಲವಾಗಿ ನಿಲ್ಲದಿರುವುದು ನಾಚಿಕೆಗೇಡಿನ ಸಂಗತಿಯಾಗಿದೆ ಎಂಬುದು ಪೋಷಕರ ಅಭಿಪ್ರಾಯ.