ಮೈಸೂರಿನಲ್ಲಿ ಕಲಿತ ವೈದ್ಯರಿಂದ ಸೇನೆಯಲ್ಲಿ ಸೇವೆ

ಮೈಸೂರು ವೈದ್ಯಕೀಯ ಕಾಲೇಜಿನ 1965ನೇ ಬ್ಯಾಚ್‌ನಲ್ಲಿ ವ್ಯಾಸಂಗ ಮಾಡಿದ ಫರಿದಾ ರೆಹನಾ ಸೇನೆಯ ಮೊದಲ ಮಹಿಳಾ ಪ್ಯಾರಾಟ್ರೂಪರ್‌ ಆಗಿದ್ದರು. ಅವರು 1971ರಲ್ಲಿ ಸೇನೆಗೆ ಪ್ರಥಮ ಮಹಿಳಾ ಶಸ್ತ್ರ ಚಿಕಿತ್ಸಕಿಯಾಗಿ ಸೇರ್ಪಡೆಗೊಂಡಿದ್ದರು. ಮುಖ್ಯವಾಗಿ ಬಾಂಗ್ಲಾದೇಶದ ವಿರುದ್ಧದ ಯುದ್ಧದಲ್ಲಿ ಭಾಗವಹಿಸಿದ್ದಾರೆ. ಸೇನೆಯಲ್ಲಿ ಮಹಿಳಾ ಪ್ಯಾರಾಟ್ರೂಪರ್‌ಳು ಹೋಗದೇ ಇದ್ದ ಕಾಲದಲ್ಲಿ ತರಬೇತಿಯಲ್ಲಿ ಅಸಾಧಾರಣ ಸಾಹಸ ತೋರಿ ಆಯ್ಕೆಯಾಗಿದ್ದರು. ಸಾವಿರಕ್ಕಿಂತಲೂ ಅಧಿಕ ಬಾರಿ ಪ್ಯಾರಾಟ್ರೂಪ್‌ ಮೂಲಕ ಶತ್ರುಗಳ ನೆಲಕ್ಕೆ ತೆರಳಿ ಅಲ್ಲಿನ ಮಾಹಿತಿ ಪಡೆದಿದ್ದರು. ನಂತರ ಶಾಂತಾ ಎಂಬುವವರೂ ಇದೇ ಕಾರ್ಯಕ್ಕೆ ತೆರಳಿದ್ದರು.

1978–79ರಲ್ಲಿ ಕಾರ್ಗಿಲ್‌ನಲ್ಲಿ ಫೀಲ್ಡ್‌ ಆಂಬುಲೆನ್ಸ್ ಹಾಗೂ ಎಂಐ ಕೊಠಡಿಯಲ್ಲಿ ಕೆಲಸ ಮಾಡಿದ್ದರು. ಅವರು ಕಾರ್ಗಿಲ್‌ನ ತೆರಾಜ್‌ನ ಶೀತಲ ಪ್ರದೇಶದಲ್ಲಿದ್ದಾಗ ಹಿಮಪಾತವಾಗಿತ್ತು. ಅದರಲ್ಲಿ ಇವರು ಮುನ್ನುಗ್ಗಿ 10 ಜನ ಸಿಕ್ಕಿಹಾಕಿಕೊಂಡಿದ್ದರು. ಹವಾಮಾನ ವೈಪರೀತ್ಯದಿಂದಾಗಿ ಗಾಯಾಳುಗಳನ್ನು ಕರೆದೊಯ್ಯಲು ಚಾಪರ್‌ (ಸೇನಾ ಹೆಲಿಕಾಪ್ಟರ್‌) ಬರಲೂ ಸಾಧ್ಯವಾಗಿರಲಿಲ್ಲ. ಈ ಸಂಕಷ್ಟದ ಸಮಯದಲ್ಲೂ ಎರಡು ದಿನ ಅಲ್ಲಿಯೇ ಚಿಕಿತ್ಸೆ ನೀಡಿ ವಾತಾವರಣ ಸರಿಯಾದ ಬಳಿಕ ಬೇರೆಡೆ ಸ್ಥಳಾಂತರ ಮಾಡಿ 7 ಜನರನ್ನು ಬದುಕಿಸಿದ್ದರು. ಇದಕ್ಕಾಗಿ ಅವರಿಗೆ ಸೇನೆಯು ಶೌರ್ಯ ಪ್ರಶಸ್ತಿ ನೀಡಿ ಗೌರವಿಸಿತ್ತು.

ಬಿ.ಎನ್‌.ರಾಜೀವ್‌ ಹಾಗೂ ಕಲಾ ಆರ್‌. ಸ್ವಾಮಿ ದಂಪತಿ ಭಾರತೀಯ ಸೇನೆಯಲ್ಲಿ ಸೇವೆ ಸಲ್ಲಿಸಿದ್ದಾರೆ. ಇವರಿಬ್ಬರೂ ಕ್ರಮವಾಗಿ ಮೈಸೂರು ವೈದ್ಯಕೀಯ ಕಾಲೇಜಿನ 1980 ಹಾಗೂ 1982 ಬ್ಯಾಚ್‌ನ ವಿದ್ಯಾರ್ಥಿಗಳಾಗಿದ್ದರು. ರಾಜೀವ್ ನೌಕಾಪಡೆಯಲ್ಲಿ 1986ರಿಂದ 2008ರವರೆಗೆ ವಿಂಗ್‌ ಕಮಾಂಡರ್‌ ಆಗಿ ಕರ್ತವ್ಯ ನಿರ್ವಹಿಸಿದ್ದರು. ಕಲಾ ಅವರು ಶಾರ್ಟ್‌ ಸರ್ವೀಸ್‌ ಕಮಿಷನ್‌ ಮೂಲಕ 6 ವರ್ಷ ಸೇವೆ ಸಲ್ಲಿಸಿದ್ದರು. ‘ಯುದ್ಧ ಭೂಮಿಯಲ್ಲಿ ಸೈನಿಕರಿಗೆ ಚಿಕಿತ್ಸೆ ನೀಡಿದಾಗ ಅವರಿಗಾಗುವ ಆನಂದ ವಿಶಿಷ್ಟವಾದುದು. ಲಡಾಕ್‌ನಂಥ ಕಡೆ ಕೆಲಸ ಮಾಡುವಾಗ ಸಂಪರ್ಕವೇ ಸಾಧ್ಯವಿರಲಿಲ್ಲ. ಕಾರ್ಗಿಲ್‌ ಯುದ್ಧದ ಸಮಯದಲ್ಲಿ ಸೈನಿಕರಲ್ಲಿದ್ದ ಜೋಶ್‌ ವಿಶೇಷ ಅನುಭವ ಮಾಡಿದೆ. ಈ ಅನುಭವವನ್ನು ಎಲ್ಲರೂ ಪಡೆಯಬೇಕು’ ಎಂದು ರಾಜೀವ್ ತಿಳಿಸಿದರು.