ಸೊರಬ: ಬಿಳಾಗಿ ಕೆರೆಯಲ್ಲಿ ಈಗ ಹಕ್ಕಿಗಳ ನಿನಾದ

ಪ್ರಸಿದ್ಧ ಗುಡವಿ ಪಕ್ಷಿಧಾಮ ವೀಕ್ಷಣೆಗೆ ಬರುವ ಪಕ್ಷಿ ಪ್ರಿಯರು ಇಲ್ಲಿಗೂ ಭೇಟಿ ನೀಡುವಷ್ಟು ಪಕ್ಷಿಗಳ ಸಂಖ್ಯೆ ವರ್ಷದಿಂದ ವರ್ಷಕ್ಕೆ ಹೆಚ್ಚಾಗುತ್ತಿದೆ. ತಾಲ್ಲೂಕು ಕೇಂದ್ರದಿಂದ ಕೇವಲ 5 ಕಿ.ಮೀ. ದೂರದಲ್ಲಿರುವ ಬಿಳಾಗಿ ಕೆರೆ ಪಕ್ಷಿ ಪ್ರಿಯರನ್ನು ಕೈಬೀಸಿ ಕರೆಯುತ್ತಿದೆ.

ಕೆರೆಯ ಸುತ್ತಲೂ ದಟ್ಟ ಅರಣ್ಯ. ಸಮೀಪದಲ್ಲಿರುವ ಸಾಲು ಮರದ ತಿಮ್ಮಕ್ಕ ಉದ್ಯಾನ, ಕೆರೆಯ ಕೆಳಭಾಗದಲ್ಲಿ ರೈತರ ಜಮೀನಿನಲ್ಲಿ ಸಿಗುವ ಆಹಾರದಿಂದಾಗಿ ಪಕ್ಷಿಗಳಿಗೆ ಕೆರೆ ಸ್ವರ್ಗವಾಗಿ‌ ಪರಿಣಮಿಸಿದೆ.

ಪಕ್ಷಿಗಳ ಸ್ವರ– ನಿನಾದ ಕೆರೆ ಅಂಗಳದಿಂದ ಕೇಳಿ ಬರುತ್ತಿದ್ದಂತೆ ರಸ್ತೆಯಲ್ಲಿ ಹಾದು ಹೋಗುವ ಪಕ್ಷಿ ಪ್ರಿಯರು ದಡದಲ್ಲಿ ನಿಂತು ಅವುಗಳ ಕಲರವ, ಬಾನಂಗಳದಲ್ಲಿನ ಹಾರಾಟ ನೋಡಿ ಖುಷಿಪಡುತ್ತಾರೆ.

ರಾಷ್ಟ್ರಮಟ್ಟದಲ್ಲಿ ಹೆಸರು ಮಾಡಿರುವ ಗುಡವಿ ಪಕ್ಷಿಧಾಮ ಇಲ್ಲಿಂದ ಕೆಲವೇ ಕಿ.ಮೀ ಅಂತರದಲ್ಲಿದೆ. ಗುಡವಿ ಪಕ್ಷಿಧಾಮದಲ್ಲಿ ಕಂಡು ಬರುವ ವಲಸೆ ಹಕ್ಕಿಗಳು ಇಲ್ಲಿನ ಕೆರೆಯ ತನ್ಮಯತೆ ಮತ್ತು ಮೋಹಕತೆಗೆ ಮನಸೋತು ಬರುತ್ತಿವೆ ಎಂಬುದು ಕೆಲ ಪಕ್ಷಿಪ್ರೇಮಿಗಳ ಅಭಿಮತ.

‘ಮುಂದಿನ ದಿನಗಳಲ್ಲಿ ಕೆರೆ ಅಭಿವೃದ್ಧಿಗೆ ಒತ್ತು ನೀಡಿದರೆ ಮಲೆನಾಡ ಸೆರಗಿನ ಊರಲ್ಲಿ ಹಕ್ಕಿಗಳ ಕಲರವ ಕಂಡು ಬರುವುದು ನಿಶ್ಚಿತ. ಆ ಮೂಲಕ ತಾಲ್ಲೂಕಿನಲ್ಲಿ ಗುಡವಿ ಪಕ್ಷಿಧಾಮದಂತೆ ಬಿಳಾಗಿ ಪಕ್ಷಿಧಾಮವಾಗಿ ರಾಜ್ಯದಲ್ಲಿ ಪ್ರಸಿದ್ಧ ಪ್ರವಾಸಿ ತಾಣವಾಗಿಯೂ ಗುರುತಿಸಿಕೊಳ್ಳುವ ಸಾಧ್ಯತೆಗಳು ಹೆಚ್ಚಿವೆ’ ಎಂದು ಸ್ಥಳೀಯರು ಹೇಳುತ್ತಾರೆ.

ಅಂದಾಜು 20 ಎಕರೆ ವಿಶಾಲ ಪ್ರದೇಶದಲ್ಲಿರುವ ಕೆರೆಯಲ್ಲಿ ನೀರು ಹಕ್ಕಿಗಳ ಕಲರವ ಕಣ್ಮನ ತಣಿಸುತ್ತಿದೆ. ಕೆಲ ಸಮಯವಷ್ಟೇ ದಡದಲ್ಲಿ ಕುಳಿತುಕೊಳ್ಳುವ ಪಕ್ಷಿಗಳು ಬಹುತೇಕ ಸಮಯವನ್ನು ಕೆರೆ ಮಧ್ಯ ಭಾಗದಲ್ಲಿ ಕಳೆಯುತ್ತಿವೆ. ವರ್ಷದುದ್ದಕ್ಕೂ ನೀರಿನಿಂದ ತುಂಬಿರುವ ಈ ಕೆರೆಯಲ್ಲಿ ಪಕ್ಷಿಗಳಿಗೆ ಸಂತಾನೋತ್ಪತ್ತಿಗೆ ಬೇಕಾಗಿರುವ ಪೂರಕ ವಾತಾವರಣ ಹಾಗೂ ಗೂಡು ಕಟ್ಟಲು ಪೊದೆಗಳು ಹೆಚ್ಚಾಗಿರುವುದರಿಂದ ನಿಧಾನವಾಗಿ ಇದು ಪಕ್ಷಿಗಳ ತವರಾಗಿ ಮಾರ್ಪಾಡಾಗುತ್ತಿದೆ.

ಪಟ್ಟೆ ತಲೆ ಹೆಬ್ಬಾತು (ಬಾರ್ ಹೆಡೆಡ್ ಗೀಸ್‌), ನೀರುಕಾಗೆ (ಕಾರ್ಮೊರಾಂಟ್), ಬೂದಬಕ (ಗ್ರೇ ಹೆರಾನ್), ಕೊಳದ ಬಕ (ಪಾಂಡ್ ಹೆರಾನ್), ಕೊಕ್ಕರೆ (ಓಪನ್ ಬಿಲ್), ಚುಕ್ಕೆ ಬಾತು (ಸ್ಪಾಟ್ ಬಿಲ್ ಡಕ್), ಸೂಜಿಬಾಲ ಬಾತು (ಪಿನ್‌ಟೆಲ್‌) ಇಲ್ಲಿ ಹೆಚ್ಚು ಕಾಣಸಿಗುತ್ತಿವೆ.