ಸಮ್ಮಿಶ್ರ ಸರ್ಕಾರದ ಸಾಲ ಋಣಮುಕ್ತ ಕಾಯ್ದೆಯಡಿ ಉಡಪಿಯಲ್ಲಿ 20,971 ಅರ್ಜಿ ಸಲ್ಲಿಕೆ

ಒಂದೆಡೆ, ಪಡೆದ ಸಾಲ ಮನ್ನಾ ಆಗುವುದೇ, ಅಡವಿಟ್ಟ ಚಿನ್ನಾಭರಣ, ಆಸ್ತಿಯ ಪತ್ರ ಮರಳಿ ಕೈಸೇರುವುದೇ ಎಂಬ ಚಿಂತೆಯಲ್ಲಿ ಸಾಲಗಾರರು ಇದ್ದರೆ, ಮತ್ತೊಂದೆಡೆ, ಹೈಕೋರ್ಟ್‌ ತೀರ್ಪು ವಿರುದ್ಧವಾಗಿ ಬಂದರೆ ಮುಂದೇನು ಎಂಬ ಆತಂಕದಲ್ಲಿ ಲೇವಾದೇವಿದಾರರು ಹಾಗೂ ಗಿರವಿದಾರರು ಇದ್ದಾರೆ.‌

ಪ್ರಕರಣ ನ್ಯಾಯಾಲಯದಲ್ಲಿರುವುದರಿಂದ ಸಾಲ ಪಡೆದ ಹೆಚ್ಚಿನವರು ಮರುಪಾವತಿ ನಿಲ್ಲಿಸಿದ್ದಾರೆ. ಪರಿಣಾಮ ಅಸಲು ಹಾಗೂ ಬಡ್ಡಿ ಬೆಳೆಯುತ್ತಲೇ ಇದೆ. ಒಂದು ವೇಳೆ ಕಾಯ್ದೆಯ ವಿರುದ್ಧ ತೀರ್ಪು ಬಂದರೆ ಸಾಲದ ಹೊರೆ ಒಮ್ಮೆಲೆ ಮೈಮೇಲೆ ಬೀಳುತ್ತದೆ ಎಂದು ಆತಂಕ ವ್ಯಕ್ತಪಡಿಸುತ್ತಾರೆ ಸಾಲ ಪಡೆದವರು.

ಹೈಕೋರ್ಟ್ ನಿರ್ದೇಶನದಂತೆ ಕ್ರಮ: ಕಾಯ್ದೆ ವಿರುದ್ಧ ಹೈಕೋರ್ಟ್‌ನಲ್ಲಿ ರಿಟ್ ಅರ್ಜಿ ಸಲ್ಲಿಕೆಯಾಗಿರುವುದರಿಂದ ಸದ್ಯ ಯಾವನಿರ್ಧಾರ ತೆಗೆದುಕೊಳ್ಳದಂತೆ ಸರ್ಕಾರ ಸೂಚಿಸಿದೆ. ನ್ಯಾಯಾಲಯದ ಆದೇಶ ಹಾಗೂ ಸರ್ಕಾರದ ಸೂಚನೆ ಬಂದ ನಂತರ ಅರ್ಜಿಗಳ ವಿಲೇವಾರಿ ನಡೆಯಲಿದೆ ಎಂದು ಕುಂದಾಪುರ ಉಪ ವಿಭಾಗಾಧಿಕಾರಿ ರಾಜು ತಿಳಿಸಿದರು.

ಜುಲೈ 23ರಂದು ಋಣಮುಕ್ತ ಕಾಯ್ದೆ ಜಾರಿಯಾಯಿತು. ಸೆಪ್ಟೆಂಬರ್‌ನಿಂದ ಅಕ್ಟೋಬರ್‌ 22ರವರೆಗೂ ಅರ್ಜಿ ಸ್ವೀಕರಿಸಲಾಗಿದೆ. ಸಲ್ಲಿಕೆಯಾದ 20,971 ಅರ್ಜಿಗಳ ಪರಿಶೀಲನೆ ಶೀಘ್ರನಡೆಯಲಿದೆ. ಈ ಪ್ರಕ್ರಿಯೆಯಲ್ಲಿ ಸಾಲಮನ್ನಾ ಯೋಜನೆ ವ್ಯಾಪ್ತಿಗೊಳಪಡುವ ಅರ್ಹ ಅರ್ಜಿಗಳನ್ನು ಗುರುತಿಸಲಾಗುವುದು ಎಂದು ಎಸಿ ವಿವರಿಸಿದರು.

ಮಾಹಿತಿ ಕೊರತೆ: ಅನರ್ಹ ಅರ್ಜಿಗಳೇ ಹೆಚ್ಚು: ಸರ್ಕಾರದ ‘ಋಣ ಮುಕ್ತ ಕಾಯ್ದೆ’ಯ ಕುರಿತು ಸಾರ್ವಜನಿಕರು ಸರಿಯಾದ ಮಾಹಿತಿ ಪಡೆಯದ ಪರಿಣಾಮ ಅನರ್ಹ ಅರ್ಜಿಗಳು ಹೆಚ್ಚಾಗಿ ಸಲ್ಲಿಕೆಯಾಗಿವೆ. ಎಲ್ಲ ಸಾಲವೂ ಮನ್ನಾ ಆಗಲಿದೆ ಎಂದು ಹೆಚ್ಚಿನವರು ಅರ್ಜಿ ಸಲ್ಲಿಸಿದ್ದಾರೆ ಎಂದು ಮಾಹಿತಿ ನೀಡಿದರು.

ಖಾಸಗಿ, ರಾಷ್ಟ್ರೀಕೃತ ಬ್ಯಾಂಕ್‌ಗಳು ಹಾಗೂ ಸಹಕಾರ ಸಂಘಗಳಲ್ಲಿ ಸಾಲ ಮಾಡಿರುವವರೂ ಅರ್ಜಿ ಸಲ್ಲಿಸಿದ್ದಾರೆ. ಈ ಅರ್ಜಿಗಳು ಅನರ್ಹವಾಗಲಿವೆ. ಕೇವಲ ಖಾಸಗಿ ಲೇವಾದೇವಿದಾರರು ಹಾಗೂ ಗಿರವಿದಾರರಿಂದ ಪಡೆದ ಸಾಲ ಮಾತ್ರ ಋಣಮುಕ್ತ ಕಾಯ್ದೆಯಡಿ ಮನ್ನಾ ಆಗಲಿದೆ ಎಂದು ಉಪ ವಿಭಾಗಾಧಿಕಾರಿ ರಾಜು ತಿಳಿಸಿದರು.