ಕಾರವಾರ: ಅಧ್ವಾನದ ಸ್ಥಿತಿಯಲ್ಲಿ ಮಕ್ಕಳ ಉದ್ಯಾನ

ಮುಂಡಗೋಡ ಪಟ್ಟಣ ಪಂಚಾಯಿತಿ ಆವರಣದಲ್ಲಿರುವ ಉದ್ಯಾನಕ್ಕೆ ಹೆಚ್ಚಿನ ಸಂಖ್ಯೆಯಲ್ಲಿ ಮಕ್ಕಳು ಬಂದು ಆಟವಾಡಿ ಖುಷಿಪಡುತ್ತಾರೆ. ಆದರೆ ಮಕ್ಕಳ ಜೊತೆ ಕೆಲವೊಮ್ಮೆ ವಯಸ್ಕರು ಜೋಕಾಲಿ ಇನ್ನಿತರ ಪರಿಕರಗಳನ್ನು ಬಳಸುವುದರಿಂದ ಪದೇ ಪದೇ ಪರಿಕರಗಳು ದುರಸ್ತಿಗೆ ಒಳಗಾಗುತ್ತಿವೆ ಎಂಬ ಆರೋಪ ಕೇಳಿಬರುತ್ತಿದೆ. ಅರಣ್ಯ ಇಲಾಖೆಯ ಸಾಲುಮರದ ಸಸ್ಯೋದ್ಯಾನದಲ್ಲಿ ಉತ್ತಮವಾದ ಉದ್ಯಾನ ಮಕ್ಕಳ ಪರಿಕರಗಳು ಇದ್ದರೂ ನಿರ್ವಹಣೆ ಕೊರತೆ ಎದ್ದು ಕಾಣುತ್ತಿದೆ. ಬಣ್ಣ ಮಾಸಿದ ತುಂಡರಿಸಿದ ಮಕ್ಕಳ ಆಟದ ಪರಿಕರಗಳು ಅಪಾಯಕ್ಕೆ ಆಹ್ವಾನ ನೀಡುವಂತಿವೆ. ‘ಸಾಲುಮರದ ತಿಮ್ಮಕ್ಕ ಉದ್ಯಾನದಲ್ಲಿ ದೊಡ್ಡವರಿಗೆ ವಾಕ್‌ ಮಾಡಲು ಅನುಕೂಲವಾಗಿದೆ. ಗಿಡಗಂಟಿಗಳ ಸ್ವಚ್ಛತೆಗೆ ತುಸು ಆದ್ಯತೆ ನೀಡಬೇಕಾಗಿದೆ. ಆದರೆ ಮಕ್ಕಳಿಗೆ ಆಟವಾಡಲು ಸಾಕಷ್ಟು ಸಂಖ್ಯೆಯಲ್ಲಿ ಪರಿಕರಗಳಿದ್ದರೂ ದುರಸ್ತಿಗೆ ಕಾದಿರುವುದು ಕಂಡುಬರುತ್ತವೆ’ ಎನ್ನುತ್ತಾರೆ ಸ್ಥಳೀಯ ನಿವಾಸಿ ಮಂಜುನಾಥ.

ಹೊನ್ನಾವರ ಪಟ್ಟಣದಲ್ಲಿ ಕೆಲ ಉದ್ಯಾನಗಳು ಜನರಿಗೆ ನೆಮ್ಮದಿ ನೀಡುವ ತಾಣಗಳಾಗಿಲ್ಲ ಎಂಬ ದೂರುಗಳು ಹೆಚ್ಚಿವೆ. ರಾಯಲ್‌ಕೇರಿಯ ಸಮೀಪ ಹಾಗೂ ಗಾಂಧಿನಗರದಲ್ಲಿ ಪಟ್ಟಣ ಪಂಚಾಯಿತಿ ಸುಪರ್ದಿಯಲ್ಲಿರುವ ಉದ್ಯಾನಗಳು ದುಸ್ಥಿತಿಯಲ್ಲಿವೆ. ‘ಗಾಂಧಿನಗರದ ಉದ್ಯಾನ ಅಕ್ರಮ ಚಟುವಟಿಕೆಗಳ ಅಡ್ಡೆಯಾಗಿದೆ’ ಎಂದು ಅಲ್ಲಿನ ನಿವಾಸಿಗಳು ದೂರುತ್ತಾರೆ. ಕರ್ನಲ್ ಹಿಲ್ ಸಮೀಪದ ರೋಟರಿ ಉದ್ಯಾನ ಕೇವಲ ಹೆಸರಿಗಷ್ಟೇ ಉದ್ಯಾನವಾಗಿ ಈಗ ಉಳಿದಿದೆ. ಪ್ರಭಾತನಗರದಲ್ಲಿರುವ ಅರಣ್ಯ ಇಲಾಖೆಯ ವನ ಕಿರಿದಾಗಿದ್ದು ಸೌಂದರ್ಯವಿಲ್ಲ. ‘ಪಟ್ಟಣದ ಉದ್ಯಾನಗಳ ಅಭಿವೃದ್ಧಿಗೆ ಪ್ರಸ್ತಾವನೆ ಸಲ್ಲಿಸಿ ಹಲವು ವರ್ಷಗಳು ಕಳೆದಿವೆ. ಅನುದಾನ ಬಿಡುಗಡೆಯಾಗಿಲ್ಲ’ ಎಂದು ಪಟ್ಟಣ ಪಂಚಾಯಿತಿ ಸಿಬ್ಬಂದಿ ತಿಳಿಸಿದರು.