ಮಾರ್ಗ ಮಧ್ಯೆ ಕೆಟ್ಟು ನಿಲ್ಲುವ ಬಸ್‌: ಪ್ರಯಾಣಿಕರಿಗಿಲ್ಲ ಊರು ತಲುಪುವ ಖಾತ್ರಿ

ಹೊನ್ನಾವರ ತಾಲ್ಲೂಕಿಗೆ ಪ್ರತ್ಯೇಕ ಸಾರಿಗೆ ಘಟಕ ಸ್ಥಾಪಿಸಬೇಕು ಎಂಬ ಬೇಡಿಕೆ ಈವರೆಗೂ ಈಡೇರಿಲ್ಲ. ಸದ್ಯ ಕುಮಟಾ ಘಟಕದ 147 ಮತ್ತು ಹಾಗೂ ಭಟ್ಕಳ ಘಟಕದ 57 ಬಸ್‌ಗಳು ಗ್ರಾಮೀಣ ಭಾಗದ ಮಾರ್ಗಗಳಲ್ಲಿ ಸಂಚರಿಸುತ್ತಿವೆ. ಆರೋಳ್ಳಿ ಭಾಸ್ಕೇರಿ ಕವಲಕ್ಕಿ ಮುಂತಾದೆಡೆ ಬಸ್ಸಿಗಾಗಿ ಗಂಟೆಗಟ್ಟಲೆ ಕಾಯುವ ಪರಿಸ್ಥಿತಿ ಇದೆ. ಕಡತೋಕಾ ಜಡ್ಡಿಗದ್ದೆ ಕೆಕ್ಕಾರ ಭಾಗದ ಬಸ್ ಸಮಸ್ಯೆ ಬಗೆಹರಿದಿಲ್ಲ. ರಸ್ತೆ ಸಂಪರ್ಕ ಇಲ್ಲದ ಹಿರೇಬೈಲ್‌ಗೆ ತೆರಳಬೇಕಾದ ಬಸ್ ಹೊಸ್ಗೋಡ್ ತನಕ ಮಾತ್ರ ಹೋಗುತ್ತಿದೆ. ಮಹಿಮೆಗೆ ಬಸ್ ಸಂಚರಿಸದಿದ್ದರಿಂದ ಆ ಭಾಗದ ಜನರು ಬಸ್ ಹತ್ತಲು 7 ಕಿ.ಮೀ ಕ್ರಮಿಸಿ ಹೆದ್ದಾರಿಗೆ ಬರುತ್ತಿದ್ದಾರೆ. ‘ದೂರದಲ್ಲಿರುವ ಕುಮಟಾ ಅಥವಾ ಭಟ್ಕಳ ಘಟಕದ ಬಸ್‌ಗಳನ್ನು ಅವಲಂಭಿಸಿರುವುದರಿಂದ ಬಸ್ ಕೆಟ್ಟರೆ ತುರ್ತಾಗಿ ಬದಲಿ ವ್ಯವಸ್ಥೆ ಮಾಡುವುದು ತೊಂದರೆ’ ಎಂಬುದಾಗಿ ಸಾರಿಗೆ ಸಂಸ್ಥೆಯ ಅಧಿಕಾರಿಗಳು ಸಮಸ್ಯೆ ಹೇಳಿಕೊಳ್ಳುತ್ತಾರೆ.

ಶಿರಸಿ ತಾಲ್ಲೂಕಿನ ಒಂದಿಲ್ಲೊಂದು ಮಾರ್ಗದಲ್ಲಿ ನಿತ್ಯವೂ ಸಾರಿಗೆ ಸಂಸ್ಥೆಯ ಬಸ್ ಕೆಟ್ಟು ನಿಂತಿರುವುದು ಸಾಮಾನ್ಯವಾಗಿದೆ. ‘ಬಾಳೇಸರ ಜಡ್ಡಿಗದ್ದೆ ಮಂಜುಗುಣಿ ಕಕ್ಕಳ್ಳಿ ಗೋಣ್ಸರ ಗೋಳಿಮಕ್ಕಿ ಸೋಂದಾ ಸೇರಿ ದೂರದ ಊರಿನ ಬಸ್‍ಗಳು ನಿರ್ವಹಣೆ ಕೊರತೆಯಿಂದ ಹಾಳಾಗುತ್ತಿವೆ. ಘಟ್ಟದ ಪ್ರದೇಶದಲ್ಲಿ ಇವು ಹತ್ತಿ ಬರಲು ಕಷ್ಟಪಡುವ ಸ್ಥಿತಿಯಿದೆ’ ಎನ್ನುತ್ತಾರೆ ಹುಲೇಕಲ್ ನಿವಾಸಿ ಗುರುಪ್ರಸಾದ. ‘ಮೆಕ್ಯಾನಿಕ್‍ಗಳ ಕೊರತೆಯಿದೆ. ಟೈರ್ ಸೇರಿ ದುರಸ್ತಿ ಉಪಕರಣಗಳು ನಿಯಮಿತವಾಗಿ ಪೂರೈಕೆ ಇಲ್ಲ’ ಎನ್ನುತ್ತಾರೆ ಶಿರಸಿ ಸಾರಿಗೆ ಘಟಕದ ಸಿಬ್ಬಂದಿ.