ಅನ್ನದಾತನಿಗೆ ಆದಾಯ ತಂದ ಬಾಳೆ: ಅರ್ಧ ಎಕರೆ ಜಮೀನಿನಲ್ಲಿ 234 ಜವಾರಿ ಬಾಳೆ ನಾಟಿ

ಕೇವಲ ಅರ್ಧ ಎಕರೆ ಜಮೀನು ಹೊಂದಿರುವ ಇವರು 234 ಜವಾರಿ ಬಾಳೆ ಹಣ್ಣಿನ (ಬಾಳೆ ಬಡ್ಡಿ) ಗಿಡ ಹಚ್ಚಿ ಈಗಾಗಲೇ ₹ 1ಲಕ್ಷ ಆದಾಯ ಪಡೆದಿದ್ದಾರೆ.

‘ಬಾಳೆ ಗಿಡ ಹಚ್ಚಿ ಐದು ವರ್ಷವಾಗಿದೆ. ಕಡಮೆ ಖರ್ಚು, ಉತ್ತಮ ಆದಾಯ ನೀಡುವ ಬಾಳೆ ಇದಾಗಿದೆ. ನಿರಂತರ ಫಲ ನೀಡುವ ಬೆಳೆಯಾಗಿದೆ. 20 ದಿನಕ್ಕೆ ಒಮ್ಮೆ ಕಟಾವಿಗೆ ಬರುತ್ತದೆ. ಇದರಿಂದ ನನಗೆ ಉತ್ತಮ ಆದಾಯ ತಂದು ಕೊಡುತ್ತಿದೆ’ ಎನ್ನುತ್ತಾರೆ ಚಂದ್ರಾಮ ಬಬಲೇಶ್ವರ.

‘ಈ ವರ್ಷ ಹಿಂಗಾರು-ಮುಂಗಾರು ಮಳೆ ಕಡಿಮೆ ಆಗಿದೆ. ಹೀಗಾಗಿ ಇಳುವರಿ ಸ್ವಲ್ಪ ಕಡಿಮೆಯಾಗಿದೆ. ಎರಡು ಬಾವಿ ಇವೆ. ಈಗ ನೀರು ಇದೆ, ಆದರೆ, ಬೇಸಿಗೆಯಲ್ಲಿ ನೀರಿನ ಸಮಸ್ಯೆಯಾಗುವ ಸಾಧ್ಯತೆ ಇದೆ’ ಎಂದರು.

‘ಜವಾರಿ ಬಾಳೆ ಹಣ್ಣಿಗೆ ತುಂಬಾ ಬೇಡಿಕೆಯೂ ಬಂದಿದೆ. ವ್ಯಾಪಾರಿಗಳು ನಮ್ಮ ಹೊಲಕ್ಕೆ ಬಂದು ಈ ಬಾಳೆ ಖರೀದಿ ಮಾಡಿಕೊಂಡು ಹೋಗಿದ್ದಾರೆ. ಬಾಳೆ ಕಾಯಿಗೆ ವಿಜಯಪುರ, ರಾಯಭಾಗ, ಸಾಂಗ್ಲಿಯಿಂದ ಬೇಡಿಕೆ ಬಂದಿದೆ. ಪ್ರತಿ 20 ದಿನಕ್ಕೆ 1ರಿಂದ 2ಟನ್ ಇಳುವರಿ ಬಂದಿದೆ. ಟನ್‍ಗೆ ₹ 32 ಸಾವಿರ ದರದಲ್ಲಿ ಮಾರಾಟವಾಗಿದೆ. ಒಂದು ವರ್ಷಕ್ಕೆ ₹1 ಲಕ್ಷ ಹಣ ಬಂದಿದೆ’ ಎಂದು ಚಂದ್ರಾಮ ಹೇಳಿದರು.