ಕಣ ಸ್ವಾರಸ್ಯ: ಮಹಿಳಾ ಅಭ್ಯರ್ಥಿಗಳಿಗೆ ಪ್ರಭಾವಿ ಅಪ್ಪ, ಗಂಡ ಸಾಥ್

ಬೆಂಗಳೂರು: ಕರ್ನಾಟಕದ 28 ಲೋಕಸಭಾ ಕ್ಷೇತ್ರಗಳ ಪೈಕಿ ಕಾಂಗ್ರೆಸ್‌ ಆರು ಕ್ಷೇತ್ರಗಳಲ್ಲಿ, ಬಿಜೆಪಿ ಎರಡು ಕ್ಷೇತ್ರಗಳಲ್ಲಿ ಮಹಿಳೆಯರಿಗೆ ಟಿಕೆಟ್‌ ನೀಡಿವೆ. ಅವರಲ್ಲಿ ಶೋಭಾ ಕರಂದ್ಲಾಜೆ ಹಾಲಿ ಕೇಂದ್ರ ಸಚಿವೆ. ಅವರು ಬೆಂಗಳೂರು ಉತ್ತರ ಕ್ಷೇತ್ರದಿಂದ ಕಣಕ್ಕೆ ಇಳಿದಿದ್ದಾರೆ. ಬೆಂಗಳೂರು ದಕ್ಷಿಣದ ಸೌಮ್ಯಾ ರೆಡ್ಡಿ, ಚಿಕ್ಕೋಡಿಯ ಪ್ರಿಯಾಂಕಾ ಅವರು ಹೆತ್ತವರ ಒತ್ತಾಸೆಯಿಂದ ಸ್ಪರ್ಧೆಗೆ ಇಳಿದಿದ್ದಾರೆ. ಇವರಿಬ್ಬರೂ ಸಚಿವರ  ಮಕ್ಕಳು. ಉಳಿದ ಐವರ ಗೆಲುವಿಗಾಗಿ ಅವರ ಪತಿಯಂದಿರು ಸಾಥ್‌ ನೀಡುತ್ತಿದ್ದಾರೆ. ಎಂಟು ಕ್ಷೇತ್ರಗಳಲ್ಲಿ ದಾವಣಗೆರೆ ಕ್ಷೇತ್ರ ಮಾತ್ರ ಇಬ್ಬರು ಮಹಿಳೆಯರ ನಡುವಿನ ಸ್ಪರ್ಧೆಯ ಕಣವಾಗಿದೆ. ಉಳಿದ ಏಳು ಕ್ಷೇತ್ರಗಳಲ್ಲಿ ಪುರುಷ ಅಭ್ಯರ್ಥಿಗಳನ್ನು ಎದುರಿಸುತ್ತಿದ್ದಾರೆ.