ಕನ್ನಡ ಚಿತ್ರರಂಗಕ್ಕಿದು ಕಹಿ–ಸಿಹಿಯ ವರ್ಷ

ಹಿಂದಿಯಲ್ಲಿ ಈ ವರ್ಷ ‘ಸ್ತ್ರೀ–2’ ‘ಭೂಲ್‌ ಬುಲ್ಲಯ್ಯ–3’ ‘ಸಿಂಗಮ್‌–3’ ಹಾಗೂ ‘ಫೈಟರ್‌’ ಸಿನಿಮಾ ಮಲಯಾಳದಲ್ಲಿ ‘ಮಂಜುಮಲ್‌ ಬಾಯ್ಸ್‌’ ‘ಆವೇಶಂ’ ‘ದಿ ಗೋಟ್‌ ಲೈಫ್‌’ ‘ಪ್ರೇಮಲು’ ‘ಎಆರ್‌ಎಂ’ ‘ಗುರುವಾಯುರು ಅಂಬಲನಡಯಿಲ್‌’ ‘ಭ್ರಮಯುಗಂ’ ಸಿನಿಮಾ ತೆಲುಗಿನಲ್ಲಿ ‘ಪುಷ್ಪ–2’ ‘ಕಲ್ಕಿ 2898 ಎಡಿ’ ‘ದೇವರ’ ‘ಹನುಮ್ಯಾನ್‌’ ಸಿನಿಮಾ ಹಾಗೂ ತಮಿಳಿನಲ್ಲಿ ‘ಗೋಟ್‌’ ‘ಅಮರನ್‌’ ‘ವೇಟ್ಟಯನ್‌’ ಹಾಗೂ ‘ಮಹಾರಾಜ’ ಸಿನಿಮಾಗಳು ಸದ್ದು ಮಾಡಿದವು.  

ಈ ವರ್ಷ ಭಿನ್ನ ಪ್ರಯೋಗವೊಂದರ ಮೂಲಕ ಜನರೆದುರಿಗೆ ಬಂದಿದ್ದು ‘ಕೋಸಿ ಎಸ್ರು’ ಹಾಗೂ ‘ಹದಿನೇಳೆಂಟು’ ಸಿನಿಮಾಗಳು. ನಿರ್ದೇಶಕರಾದ ಚಂಪಾ ಪಿ.ಶೆಟ್ಟಿ ಹಾಗೂ ಪೃಥ್ವಿ ಕೊಣನೂರು ಜೊತೆಯಾಗಿ ಎರಡೂ ಸಿನಿಮಾಗಳನ್ನು ಜನವರಿ 26ರಂದು ಬಿಡುಗಡೆ ಮಾಡಿದರು. ಬಿಡುಗಡೆಗೆ ಲಕ್ಷಾಂತರ ರೂಪಾಯಿ ಖರ್ಚು ಬೀಳುವ ಕಾರಣ ಹೊಸ ಮಾದರಿಯ ಪ್ರಯೋಗವೊಂದಕ್ಕೆ ಕೈಹಾಕಿ ₹400ಕ್ಕೆ ಈ ಎರಡೂ ಸಿನಿಮಾದ ಟಿಕೆಟ್‌ಗಳನ್ನು ಆಸಕ್ತರಿಗೆ ಮಾರಾಟ ಮಾಡಿದವು. ‘ಧೂಮಂ’ ಹಾಗೂ ‘ಹದಿನೇಳೆಂಟು’ ಸಿನಿಮಾಗಳು ಯುಟ್ಯೂಬ್‌ನಲ್ಲಿ ಬಿಡುಗಡೆಗೊಂಡು ಒಟಿಟಿಗೆ ಪರ್ಯಾಯ ವೇದಿಕೆ ಎಂಬಂತೆ ಹೊಸ ಭಾಷ್ಯ ಬರೆದವು.