ಜಾಹೀರಾತಿಗಾಗಿ ತೆರೆ ಮೇಲೆ ಒಂದಾದ ಯಶ್ ಹಾಗೂ ರಾಧಿಕಾ!

ಕಳೆದೊಂದು ದಶಕದಿಂದ ಚಂದನವನದ ಸೂಪರ್‌ ಜೋಡಿ ಎನ್ನಿಸಿಕೊಂಡಿರುವ ಯಶ್ ಹಾಗೂ ರಾಧಿಕಾ ಪಂಡಿತ್ ಮತ್ತೆ ತೆರೆ ಮೇಲೆ ಒಂದಾಗಿ ಕಾಣಿಸಿಕೊಂಡಿದ್ದಾರೆ. ಈ ಜೋಡಿ ‘ಸಂತು straight forward’ ಸಿನಿಮಾದಲ್ಲಿ ಕೊನೆ ಬಾರಿ ತೆರೆ ಮೇಲೆ ಕಾಣಿಸಿದ್ದರು. ಬೆಳ್ಳಿತೆರೆಯಲ್ಲಿ ‘ರಾಕಿಂಗ್ ಕಪಲ್’ ಎನ್ನಿಸಿಕೊಂಡಿರುವ ಇವರು ಅನೇಕ ಹಿಟ್‌ ಸಿನಿಮಾಗಳನ್ನು ನೀಡಿ‌ದ್ದಾರೆ. ಎರಡು ಮಕ್ಕಳ ತಾಯಿಯಾಗಿರುವ ರಾಧಿಕಾ ಮಕ್ಕಳೊಂದಿಗೆ ಖುಷಿಯಿಂದ ದಿನ ಕಳೆಯುತ್ತಿದ್ದಾರೆ. ಯಶ್‌ ಕೆಜಿಎಫ್‌ ಭಾಗ–2ರ ಶೂಟಿಂಗ್‌ನಲ್ಲಿ ತೊಡಗಿದ್ದಾರೆ. ಯಶ್‌–ರಾಧಿಕಾ ಜೋಡಿಯನ್ನು ಮತ್ತೆ ತೆರೆ ಮೇಲೆ ಒಂದಾಗಿ ಕಾಣಬೇಕು ಎಂಬುದು ಅಭಿಮಾನಿಗಳ ಬಹುದಿನದ ಬಯಕೆಯಾಗಿತ್ತು. ಈಗ ಅಭಿಮಾನಿಗಳ ನಿರೀಕ್ಷೆಯನ್ನು ನಿಜಗೊಳಿಸಿದ್ದಾರೆ ಈ ದಂಪತಿ. ಅಡುಗೆಎಣ್ಣೆಯ ಜಾಹೀರಾತೊಂದರಲ್ಲಿ ಇವರು ಒಂದಾಗಿ ನಟಿಸಿದ್ದಾರೆ. ಈ ವಿಷಯವನ್ನು ಇಬ್ಬರೂ ತಮ್ಮ ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಳ್ಳುವ ಮೂಲಕ ಅಭಿಮಾನಿಗಳನ್ನು ಖುಷಿ ಪಡಿಸಿದ್ದಾರೆ.