ಆರೋಗ್ಯ | ಪರೀಕ್ಷೆ ಒತ್ತಡ ಬೇಡ: ಒತ್ತಾಸೆ ಇರಲಿ

ವಿದ್ಯಾರ್ಥಿಗಳು ಪರೀಕ್ಷೆಗೆ ತಯಾರಾಗುತ್ತಿರುವಾಗ ಮನೆಯ ವಾತಾವರಣ ಅವರ ಓದಿಗೆ ಪೂರಕವಾಗಿರತಕ್ಕದ್ದು. ಶಾಂತಿಯುತ, ಸಹಕಾರಪೂರ್ಣ ವಾತಾವರಣವು ವಿದ್ಯಾರ್ಥಿಯ ಆತ್ಮವಿಶ್ವಾಸವನ್ನು ಹೆಚ್ಚಿಸಿ, ಪರೀಕ್ಷಾ ಆತಂಕವನ್ನು ಕಡಿಮೆಗೊಳಿಸಿ, ಏಕಾಗ್ರತೆಯನ್ನು ವೃದ್ಧಿಸುತ್ತದೆ. ಮನೆಯೆಂಬುದು ಶಾಂತಿಧಾಮವಾಗಬೇಕು. ಪರೀಕ್ಷಾ ಸಮಯದಲ್ಲಿ ವಾತಾವರಣ ತಿಳಿಯಾಗಿರಬೇಕು. ವಿದ್ಯಾರ್ಥಿಗಳು ಬೇರೆ ಬೇರೆ ಕಾರಣಗಳಿಂದ ಅದಾಗಲೇ ಒತ್ತಡಕ್ಕೆ ಒಳಗಾಗಿರುತ್ತಾರೆ. ನಿರೀಕ್ಷೆಗಳು, ಸಹಪಾಠಿಗಳ ಸ್ಪರ್ಧೆ, ಸೋಲಿನ ಭಯ – ಇವೆಲ್ಲ ಅವರನ್ನು ಕಾಡುತ್ತಿರುತ್ತವೆ. ಈ ಸಂದರ್ಭದಲ್ಲಿ ಮನೆಯವರ ಮನೋಭಾವ ಈ ಒತ್ತಡಗಳನ್ನು ಹೆಚ್ಚಿಸಲೂಬಹುದು ಅಥವಾ ಕಡಿಮೆ ಮಾಡಲೂಬಹುದು. ವ್ಯವಸ್ಥಿತ ಕುಟುಂಬ ಮತ್ತು ಶಾಂತಿಯುತ ಮನೆಯ ವಾತಾವರಣ ವಿದ್ಯಾರ್ಥಿಯ ಏಕಾಗ್ರತೆಯನ್ನು ಹೆಚ್ಚಿಸುತ್ತದೆ ಮತ್ತು ಗ್ರಹಣ ಸಾಮರ್ಥ್ಯವನ್ನು ವೃದ್ಧಿಸುತ್ತದೆ. ಜೊತೆಗೆ ಪರೀಕ್ಷೆಯನ್ನು ಸಮಾಧಾನ ಚಿತ್ತದಿಂದ ಎದುರಿಸುವ ಧೈರ್ಯವನ್ನು ನೀಡುತ್ತದೆ. ಮನೆಯ ಗದ್ದಲಗಳು, ಅಶಾಂತಿಯ ವಾತಾವರಣ, ಕುಟುಂಬದ ಅತಿ ಹೆಚ್ಚಿನ ನಿರೀಕ್ಷೆಗಳು ವಿದ್ಯಾರ್ಥಿಯಲ್ಲಿ ಬೇಸರವನ್ನು ಮತ್ತು ಅಸಹಾಯಕತೆಯನ್ನು ಮೂಡಿಸಿ ಅಧ್ಯಯನದಲ್ಲಿ ಅವನು/ಅವಳು ಏಕಾಗ್ರತೆಯನ್ನು ಕಳೆದುಕೊಳ್ಳುವ ಸಾಧ್ಯತೆಗಳಿವೆ.