ಕೋವಿಡ್–19 ಸಾಂಕ್ರಾಮಿಕ ಕಾಯಿಲೆ ಸಂದರ್ಭದಲ್ಲಿ ಜನರು ಕ್ಲಿನಿಕ್ಗಳಿಗೆ ಭೇಟಿ ನೀಡುವಾಗ ವಹಿಸಬೇಕಾದ ಮುನ್ನೆಚ್ಚರಿಕೆ ಕ್ರಮಗಳ ಬಗ್ಗೆ ಮಂಗಳೂರು ಎ.ಜೆ.ಆಸ್ಪತ್ರೆಯ ಶ್ವಾಸಕೋಶ ತಜ್ಞಡಾ. ಹರ್ಷ ಡಿ.ಎಸ್. ಕೆಲವು ಸಲಹೆಗಳನ್ನು ನೀಡಿದ್ದಾರೆ.
* ಟೆಲಿಮೆಡಿಸಿನ್ ಸೌಲಭ್ಯ ಬಳಸಿಕೊಂಡು ಕ್ಲಿನಿಕ್ಗಳಿಗೆ ಭೇಟಿ ನೀಡುವುದನ್ನು ತಪ್ಪಿಸಿದರೆ ಒಳಿತು. ಅನಿವಾರ್ಯವಾದರೆ, ಅಪಾಯಿಂಟ್ಮೆಂಟ್ ಪಡೆದೇ ಹೋಗಬೇಕು. ಈಗ ವೈದ್ಯರು ಕೂಡ ಭೇಟಿ ಸಮಯ ನಿಗದಿಪಡಿಸಿಕೊಂಡೇ ರೋಗಿಗಳನ್ನು ನೋಡುತ್ತಾರೆ.
* ನಿರ್ದಿಷ್ಟ ಕ್ಲಿನಿಕ್ನಲ್ಲಿ ಯಾವೆಲ್ಲ ನಿಯಮಗಳು ಜಾರಿಯಲ್ಲಿವೆ ಎಂಬುದನ್ನು ತಿಳಿದುಕೊಂಡು, ಎಷ್ಟೊತ್ತಿಗೆ ಅಲ್ಲಿ ತಲುಪಬೇಕು ಎಂಬುದನ್ನು ಖಚಿತಪಡಿಸಿಕೊಳ್ಳಬೇಕು.
* ಸ್ಯಾನಿಟೈಸರ್ ಬಾಟಲಿ ಜೊತೆಗಿರಲಿ. ರೋಗಿ ಮತ್ತು ಜೊತೆಗೆ ಬರುವವರು ಕಡ್ಡಾಯವಾಗಿ ಮಾಸ್ಕ್ ಧರಿಸಿರಬೇಕು. ವೈದ್ಯರ ಕೊಠಡಿಯ ಒಳಹೋದಾಕ್ಷಣ ಮಾಸ್ಕ್ ತೆಗೆಯುವ ಅಭ್ಯಾಸ ಹಲವರಲ್ಲಿದೆ. ಇದು ತಪ್ಪು. ಮನೆಯಿಂದ ಹೊರಡುವಾಗ ಧರಿಸುವ ಮಾಸ್ಕ್ ಅನ್ನು ಪುನಃ ಮನೆ ಸೇರುವ ತನಕ ತೆಗೆಯಬಾರದು.
* ರೋಗಿಯ ಜತೆಗೆ ಅವಶ್ಯವಿದ್ದರೆ ಒಬ್ಬರು ಮಾತ್ರ ಬರಬೇಕು. ರಕ್ತದೊತ್ತಡ, ಸಕ್ಕರೆ ಕಾಯಿಲೆಯಂತಹ ದೀರ್ಘಕಾಲೀನ ಕಾಯಿಲೆ ಇರುವವರು ರೋಗಿಗಳ ಜೊತೆಗಾರರಾಗಿ ಬರದಿದ್ದರೆ ಒಳಿತು.
* ಕೋವಿಡ್ ಪರೀಕ್ಷೆಗೆ ಒಳಗಾಗಬೇಕೆಂಬ ಭಯದಿಂದ ವೈದ್ಯರ ಬಳಿ ರೋಗ ಲಕ್ಷಣ ಹೇಳಲು ಹಿಂಜರಿಯಬಾರದು. ಆರಂಭದಲ್ಲೇ ಚಿಕಿತ್ಸೆ ನೀಡಿದರೆ ಕೋವಿಡ್ ಗುಣವಾಗುತ್ತದೆ.
* ಕ್ಲಿನಿಕ್ಗಳಲ್ಲಿ ಯಾವುದೇ ಸಾಮಗ್ರಿಗಳನ್ನು ಅನಗತ್ಯವಾಗಿ ಸ್ಪರ್ಶಿಸಬಾರದು. ಅಗತ್ಯವಿದ್ದಷ್ಟು ಚರ್ಚಿಸಿ, ಆದಷ್ಟು ಶೀಘ್ರ ವೈದ್ಯರ ಕೊಠಡಿಯಿಂದ ಹೊರಬೇಕು. ಮನೆಗೆ ಹೋದ ಮೇಲೆ ಸ್ನಾನ ಮಾಡಬೇಕು.
* ಕಾಯುವ ಸಂದರ್ಭವಿದ್ದರೆ, ಸ್ವಂತ ವಾಹನದಲ್ಲಿ ಕುಳಿತುಕೊಳ್ಳುವುದು ಒಳಿತು. ಜನದಟ್ಟಣಿ ಇರುವ ಪ್ರದೇಶಕ್ಕಿಂತ ತೆರೆದ ಪ್ರದೇಶದಲ್ಲಿ ನಿಂತು ಕಾಯುವುದು ಲೇಸು.