ಮಂಗಳವಾರ, ಜೂನ್ 15, 2021
20 °C
ಸಿಂಗಪುರದಲ್ಲಿ ನಡೆಸಿದ ಆನ್‌ಲೈನ್‌ ಸಮೀಕ್ಷೆಯಿಂದ ಬಹಿರಂಗ

ಕೊರೊನಾ: ಕಠಿಣ ಮಾರ್ಗಸೂಚಿಗೆ ಶೇ 44ರಷ್ಟು ಮಂದಿ ಬೇಸರ

ಪಿಟಿಐ Updated:

ಅಕ್ಷರ ಗಾತ್ರ : | |

Prajavani

ಸಿಂಗಪುರ: ಕೊರೊನಾ ಸೋಂಕು ನಿಯಂತ್ರಣಕ್ಕೆ ಸಂಬಂಧಿಸಿದಂತೆ ಸರ್ಕಾರ ರೂಪಿಸಿರುವ ಆರೋಗ್ಯ ಮಾರ್ಗಸೂಚಿಗಳನ್ನು ಪಾಲನೆ ಮಾಡುವಲ್ಲಿ ಸಿಂಗಪುರದ ಶೇ 44ರಷ್ಟು ಜನರು ರೋಸಿಹೋಗಿದ್ದಾರೆ ಎಂದು ಸಮೀಕ್ಷೆಯೊಂದು ತಿಳಿಸಿದೆ.

ಮಾಸ್ಕ್‌ ಧರಿಸುವುದು, ಅಂತರ ಕಾಪಾಡುವುದು ಸೇರಿದಂತೆ ವಿವಿಧ ಮಾರ್ಗಸೂಚಿಗಳನ್ನು ಪಾಲಿಸುವಂತೆ ಸರ್ಕಾರ ಸೂಚಿಸಿದೆ. ಆದರೆ, ಇಷ್ಟು ದಿನಗಳು ಕಳೆದರೂ ಕೋವಿಡ್‌ ಪ್ರಸರಣ ಇನ್ನೂ ನಿಯಂತ್ರಣಕ್ಕೆ ಬಂದಿಲ್ಲ. ಹೀಗಾಗಿ ಮಾಸ್ಕ್‌ ಧರಿಸುವುದು ಸೇರಿದಂತೆ ವಿವಿಧ ಮಾರ್ಗಸೂಚಿಗಳನ್ನು ಇನ್ನೂ ಕೆಲ ಕಾಲ ಮುಂದುವರಿಸಬೇಕಲ್ಲ ಎಂಬ ವಿಷಯಕ್ಕೆ ಜನರು ರೋಸಿ ಹೋಗಿದ್ದಾರೆ ಎಂದು ಆನ್‌ಲೈನ್‌ ಮೂಲಕ ನಡೆದ ಸಮೀಕ್ಷೆ ಹೇಳಿದೆ.

16 ವರ್ಷಕ್ಕಿಂತ ಮೇಲ್ಪಟ್ಟ ವಯೋಮಾನದ 1,000 ಜನರನ್ನು ಈ ಸಮೀಕ್ಷೆಗೆ ಒಳಪಡಿಸಲಾಗಿದೆ. ಈ ಪೈಕಿ ಶೇ 27ರಷ್ಟು ಜನರು ಮಾಸ್ಕ್ ಧರಿಸಬೇಕು ಎಂಬ ಕಟ್ಟಳೆ ಹತಾಶೆಯನ್ನುಂಟು ಮಾಡುತ್ತದೆ ಎಂದು ತಮ್ಮ ಅಸಮಾಧಾನ ಹೊರಹಾಕಿದ್ದಾರೆ.   

ಸಾರ್ವಜನಿಕ ಸ್ಥಳಗಳಲ್ಲಿ ಸುರಕ್ಷತೆಯನ್ನು ಖಾತರಿಪಡಿಸುವ ಸಲುವಾಗಿ ಸಿಂಗಪುರದಲ್ಲಿ ‘ಸೇಫ್‌ಎಂಟ್ರಿ’ ಎಂಬ ಆ್ಯಪ್‌ಅನ್ನು ಮೊಬೈಲ್‌ನಲ್ಲಿ ಅಳವಡಿಸಿಕೊಳ್ಳುವುದು ಕಡ್ಡಾಯ. ಆದರೆ, ಈ ಆ್ಯಪ್‌ ಬಳಕೆ ಉಪದ್ರವವೇ ಸರಿ ಎಂದು ಶೇ 5ರಷ್ಟು ಜನರ ಹೇಳಿದ್ದಾರೆ. 

ಗೆಳೆಯರು, ಸಂಬಂಧಿಕರು ಒಟ್ಟಿಗೇ ಸೇರುವ ಸಂದರ್ಭದಲ್ಲಿ ಜನರ ಸಂಖ್ಯೆಯನ್ನು ನಿಯಮಿತಗೊಳಿಸಿರುವ ಕುರಿತು ಶೇ 14ರಷ್ಟು ಜನರು ಅಸಮಾಧಾನ ಹೊರಹಾಕಿದ್ದಾರೆ. 

‘ಪ್ರತಿ ಬಾರಿ ನಾವು ಮನೆಯಿಂದ ಹೊರ ಹೋಗುವಾಗ ಮಾಸ್ಕ್‌ ಧರಿಸಬೇಕು ಎನ್ನುವುದು ನಮಗೆ ಕಿರಿಕಿರಿಯನ್ನುಂಟು ಮಾಡುತ್ತದೆ’ ಎಂದು ಎಂದು ನ್ಯಾಷನಲ್‌ ಯೂನಿವರ್ಸಿಟಿ ಆಫ್‌ ಸಿಂಗಪುರದ ಸಾ ಸ್ವೀ ಹಾಕ್‌ ಸ್ಕೂಲ್‌ ಆಫ್‌ ಪಬ್ಲಿಕ್‌ ಹೆಲ್ತ್‌ನ ಡೀನ್‌ ಟಿವೊ ಯಿಕ್‌ ಯಿಂಗ್‌ ಅಭಿಪ್ರಾಯಪಡುತ್ತಾರೆ.

‘ಆದರೆ, ಕೊರೊನಾ ವೈರಸ್‌ ದಾಳಿಯ ವಿರುದ್ಧ ರಕ್ಷಣೆ ಪಡೆಯುವ ಸಲುವಾಗಿ ಸರ್ಕಾರ ರೂಪಿಸಿರುವ ಈ ಮಾರ್ಗಸೂಚಿಗಳನ್ನು ನಾವು ಕಡೆಗಣಿಸಬಾರದಲ್ಲ’ ಎಂದೂ ಅವರು ಹೇಳುತ್ತಾರೆ.

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು