ನವದೆಹಲಿ: ಮ್ಯಾನ್ಮಾರ್ ಮೂಲಕ ಚೀನಾಗೆ ದೇಶದಿಂದ ಹವಾಲ ಜಾಲದ ಮೂಲದ ಮಾನವ ಕೂದಲು ಕಳ್ಳಸಾಗಣೆ ಹಾಗೂ ಅಕ್ರಮ ಹಣಕಾಸು ವರ್ಗಾವಣೆ ಮಾಡಿರುವ ಭಾರಿ ಪ್ರಕರಣವೊಂದನ್ನು ಜಾರಿ ನಿರ್ದೇಶನಾಲಯ (ಇಡಿ) ಪತ್ತೆ ಮಾಡಿದೆ.
ಈ ಸಂಬಂಧ ದೇಶದಾದ್ಯಂತ ಹಲವು ಕಡೆ ದಾಳಿ ನಡೆಸಿರುವ ಇಡಿ, 139 ಬ್ಯಾಂಕ್ ಖಾತೆಗಳನ್ನು ಸ್ಥಗಿತಗೊಳಿಸಿದೆ.
ಚೀನಾ ಮೂಲದ ಆನ್‌ಲೈನ್ ಬೆಟ್ಟಿಂಗ್ ಮೊಬೈಲ್ ಅಪ್ಲಿಕೇಶನ್‌ ಒಂದರ ಮೂಲಕ ಹಣ ವರ್ಗಾವಣೆ ಪ್ರಕರಣದ ತನಿಖೆ ನಡೆಸುವ ಸಂದರ್ಭದಲ್ಲಿ ಈ ಜಾಲ ಪತ್ತೆಯಾಗಿದೆ. ದಾಳಿ ಸಂದರ್ಭ ₹1.20 ಕೋಟಿ ನಗದು ವಶಪಡಿಸಿಕೊಳ್ಳಲಾಗಿದೆ ಎಂದು ಇಡಿ ಹೇಳಿದೆ.
ಮ್ಯಾನ್ಮಾರ್ ಮೂಲಕ ಅಕ್ರಮವಾಗಿ, ಚೀನಾಗೆ ಭಾರತದಿಂದ ಮಾನವ ಕೂದಲು ಕಳ್ಳಸಾಗಣೆಯಾಗಿದೆ. ಅದಕ್ಕೆ ಪಾವತಿಯಾಗಿ ಭಾರಿ ಮೊತ್ತದ ನಗದನ್ನು ಹವಾಲ ಜಾಲದ ಮೂಲಕ ತಲುಪಿಸಲಾಗಿದೆ ಎಂದು ಇಡಿ ಹೇಳಿದೆ.
