ಗುರುವಾರ , ಅಕ್ಟೋಬರ್ 22, 2020
28 °C

ಉದ್ಧವ್‌ ವಿರುದ್ಧ ಕಂಗನಾ ಸಮರ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಮುಂಬೈ: ಮುಂಬೈನ ಬಾಂದ್ರಾದ ಪಾಲಿ ಹಿಲ್‌ನಲ್ಲಿರುವ ಬಾಲಿವುಡ್‌ ನಟಿ ಕಂಗನಾ ರನೋತ್‌‌ ಬಂಗಲೆಯ ಅನಧಿಕೃತ ಎಂದು ಹೇಳಲಾದ ಭಾಗವನ್ನು ಬೃಹನ್‌ ಮುಂಬೈ ಮಹಾನಗರ ಪಾಲಿಕೆ (ಬಿಎಂಸಿ) ಸಿಬ್ಬಂದಿ ಬುಧವಾರ ನೆಲಸಮಗೊಳಿಸಿದ್ದಾರೆ. 

ಬೃಹತ್‌ ಯಂತ್ರೋಪಕರಣಗಳೊಂದಿಗೆ ಬಂದ ಪಾಲಿಕೆಯ ಸಿಬ್ಬಂದಿ, ಕಂಗನಾ ಅವರ ಬಂಗಲೆಯಲ್ಲಿರುವ ‘ಮಣಿಕರ್ಣಿಕಾ ಫಿಲ್ಮ್ಸ್‌ ಪ್ರೈವೇಟ್‌ ಲಿಮಿಟೆಡ್’‌ ಕಚೇರಿಯ ಒಂದು ಭಾಗವನ್ನು ನೆಲಸಮಗೊಳಿಸಿದರು. 

ವೈ ಪ್ಲಸ್ ಶ್ರೇಣಿಯ ಭದ್ರತೆಯಲ್ಲಿ ಹಿಮಾಚಲ ಪ್ರದೇಶದಿಂದ ಬುಧವಾರ ಮುಂಬೈಗೆ ಬಂದಿಳಿದ ಕಂಗನಾ, ಡಜನ್‌ಗೂ ಹೆಚ್ಚು ಸರಣಿ ಟ್ವೀಟ್‌ ಮತ್ತು ವಿಡಿಯೊಗಳ ಮೂಲಕ ಮಹಾರಾಷ್ಟ್ರ ಸರ್ಕಾರ, ಮುಖ್ಯಮಂತ್ರಿ ಉದ್ಧವ್‌ ಠಾಕ್ರೆ ಮತ್ತು ಬೃಹನ್‌ ಮುಂಬೈ ಮಹಾನಗರ ಪಾಲಿಕೆಯ ವಿರುದ್ಧ ಏಕ ವಚನದಲ್ಲಿ ಸಮರ ಸಾರಿದರು.   

ಶಿವಸೇನಾ ಕಾರ್ಯಕರ್ತರ ಪ್ರತಿಭಟನೆಯ ನಡುವೆಯೇ ಕಂಗನಾ ಅವರಿಗೆ ಬೆಂಬಲ ಸೂಚಿಸಲು ರಿಪಬ್ಲಿಕನ್ ಪಾರ್ಟಿ ಆಫ್ ಇಂಡಿಯಾ (ಆರ್‌ಪಿಐ–ಎ) ಮತ್ತು ಕರ್ಣಿಸೇನಾ ಸಂಘಟನೆಯ ಕಾರ್ಯಕರ್ತರು ವಿಮಾನ ನಿಲ್ದಾಣದಲ್ಲಿ ಸೇರಿದ್ದರು.

ಕಂಗನಾ ಕಿಡಿ

‘ಉದ್ಧವ್‌ ಠಾಕ್ರೆ, ನಿನ್ನನ್ನು ನೀನು ಏನೆಂದುಕೊಂಡಿರುವೆ? ನಿರ್ದೇಶಕ ಕರಣ್‌ ಜೋಹರ್‌ ನೇತೃತ್ವದ ಫಿಲ್ಮ್‌ ಮಾಫಿಯಾ ಜತೆ ಶಾಮೀಲಾಗಿ ನನ್ನ ಮನೆ ಧ್ವಂಸಗೊಳಿಸಿ, ಸೇಡು ತೀರಿಸಿಕೊಂಡೆಯಾ? ಇಂದು ನನ್ನ ಮನೆ ನೆಲಸಮವಾಗಿರಬಹುದು. ನಾಳೆ ನಿನ್ನ ಅಹಂಕಾರ ಅಳಿಯಲಿದೆ. ನಾನು ಸತ್ತರೂ ಜಗತ್ತಿಗೆ ನಿನ್ನ ಕರಾಳ ಮುಖವನ್ನು ತೋರಿಸದೆ ಬಿಡಲಾರೆ’ ಎಂದು ಕಂಗನಾ ಕಿಡಿ ಕಾರಿದ್ದಾರೆ.

 ***

ಕಂಗನಾ ನಂಬಿಕೆ ಉಳಿಸಿಕೊಳ್ಳಿ. ಈ ಹೋರಾಟದಲ್ಲಿ ನಾವು ನಿಮ್ಮೊಂದಿಗೆ ಇದ್ದೇವೆ

–ಸುಬ್ರಮಣಿಯನ್ ಸ್ವಾಮಿ, ಬಿಜೆಪಿ ಸಂಸದ, ಟ್ವೀಟ್

 

ನಟಿ ಕಂಗನಾ ಮುಂಬೈಯಲ್ಲಿ ಇರುವ ತನಕ ಅವರಿಗೆ ನಮ್ಮ ಪಕ್ಷದ ಕಾರ್ಯಕರ್ತರು ರಕ್ಷಣೆ ನೀಡಲಿದ್ದಾರೆ

–ರಾಮದಾಸ್ ಅಠವಳೆ, ಕೇಂದ್ರ ಸಚಿವ ಮತ್ತು ಆರ್‌ಪಿಐ (ಎ) ನಾಯಕ

 

ಕಂಗನಾ ಹೇಳಿಕೆಗೆ ಅನಗತ್ಯ ಪ್ರಾಮುಖ್ಯತೆ ನೀಡಲಾಗುತ್ತಿದೆ.ಮುಂಬೈ ಪೊಲೀಸರ ಕಾರ್ಯದಕ್ಷತೆಯ ಬಗ್ಗೆ ಮಹಾರಾಷ್ಟ್ರದ ಜನರಿಗೆ ಅರಿವಿದೆ. ಮೂರನೆಯವರ ಮಾತಿಗೆ ಗಮನ ಹರಿಸುವ ಅಗತ್ಯವಿಲ್ಲ

–ಶರದ್ ಪವಾರ್,  ಎನ್‌ಸಿಪಿ ಮುಖ್ಯಸ್ಥ

 

ಕಂಗನಾ ಅವರ ಬಂಗಲೆಯನ್ನು ನೆಲಸಮಗೊಳಿಸುವುದು ಮಹಾರಾಷ್ಟ್ರ ಸರ್ಕಾರದ ಶಕ್ತಿ ಪ್ರದರ್ಶನವಾಗಿದೆ. ಬಾಂದ್ರಾ, ಖಾರ್ ಪ್ರದೇಶದಲ್ಲಿ ಪರಿಶೋಧಿಸಿದರೆ ಇದಕ್ಕಿಂತಲೂ ದೊಡ್ಡ ಮಟ್ಟದಲ್ಲಿ ಅನಧಿಕೃತ ನಿರ್ಮಾಣ ಪ್ರದೇಶಗಳು ಸಿಗುತ್ತವೆ

–ನೌಜರ್ ಭರೂಚಾ, ಹಿರಿಯ ಪತ್ರಕರ್ತ

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು