ಸೂರ್ಯನ ಬಿಸಿಲು ಬಿದ್ದರೆ ಕೊರೊನಾ ವೈರಸ್‌ ನಾಶ: ಅಮೆರಿಕ ಸಂಶೋಧನೆ
ವಾಷಿಂಗ್ಟನ್‌: ಬಿಸಿಯಾದ ವಾತಾವರಣದಲ್ಲಿ ಕೊರೊನಾ ವೈರಸ್‌ ಬದುಕುಳಿಯುವ ಅವಕಾಶ ಕಡಿಮೆ ಇರುತ್ತದೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಗುರುವಾರ ಹೇಳಿದ್ದಾರೆ.
ಶ್ವೇತ ಭವನದಲ್ಲಿ ಮಾತನಾಡಿವ ಅವರು, 'ಕೊರೊನಾ ವೈರಸ್‌ ಭಿನ್ನ ಉಷ್ಣಾಂಶ, ವಾತಾವರಣ ಹಾಗೂ ಮೇಲ್ಮೈ ಪ್ರದೇಶಗಳಲ್ಲಿ ವರ್ತಿಸುವ ಬಗ್ಗೆ ಹೋಮ್‌ಲ್ಯಾಂಡ್‌ ಸೆಕ್ಯುರಿಟಿ ಇಲಾಖೆ ವರದಿ ಪ್ರಕಟಿಸಿದೆ. ವೈರಸ್‌ ತಣ್ಣನೆಯ (ಕಡಿಮೆ ಉಷ್ಣಾಂಶ) ಹಾಗೂ ಒಣ ವಾತಾವರಣಗಳಲ್ಲಿ ಸುಲಭವಾಗಿ ಬದುಕುಳಿಯುತ್ತವೆ ಹಾಗೂ ಬಿಸಿ ವಾತಾವರಣದಲ್ಲಿ ಉಳಿಯುವ ಪ್ರಮಾಣ ಕಡಿಮೆ ಇರುತ್ತದೆ ಎಂದು ಸಂಶೋಧನೆಗಳಿಂದ ಕಂಡುಕೊಳ್ಳಲಾಗಿದೆ' ಎಂದು ಟ್ರಂಪ್‌ ಹೇಳಿರುವುದಾಗಿ ಎಎನ್‌ಐ ವರದಿ ಮಾಡಿದೆ.
ವಿಜ್ಞಾನ ಮತ್ತು ತಂತ್ರಜ್ಞಾನ ನಿರ್ದೇಶನಾಲಯದ ಮುಖ್ಯಸ್ಥರಾದ ಬಿಲ್‌ ಬ್ರಯಾನ್‌ ಸಂಶೋಧನೆಯ ಕುರಿತು ವಿವರಿಸುತ್ತ, 'ಸೂರ್ಯನ ಬೆಳಕು ಹಾಗೂ ತೇವಾಂಶವಿರುವ ವಾತಾವರಣದಲ್ಲಿ ಕೊರೊನಾ ವೈರಸ್‌ ಕ್ಷಿಪ್ರಗತಿಯಲ್ಲಿ ನಶಿಸಿ ಹೋಗುತ್ತವೆ' ಎಂದಿದ್ದಾರೆ.
(1) Findings from S&T’s Nat’l Biodefense Analysis and Countermeasures Ctr: #COVID19 virus is inactivated quickest with direct sunlight both on surfaces and in air. There are still unknowns about transmission + more work needs to be done before it’s safe to return normal life.
— DHS S&T (@dhsscitech) April 24, 2020
'ಐಸೊಪ್ರೊಪೈಲ್‌ ಆಲ್ಕೊಹಾಲ್‌ 30 ಸೆಕೆಂಡ್‌ಗಳಲ್ಲಿ ವೈರಸ್‌ ಸೋಂಕು ಮುಕ್ತಗೊಳಿಸುತ್ತದೆ. ನೇರವಾದ ಸೂರ್ಯನ ಬೆಳಕಿನಲ್ಲಿ ವೈರಸ್‌ ಬಹುಬೇಗ ನಾಶವಾಗುತ್ತದೆ. ಗಾಳಿಯಲ್ಲಿ ಹಾಗೂ ಯಾವುದೇ ವಸ್ತುಗಳ ಮೇಲ್ಪದರಲ್ಲಿರುವ ವೈರಸ್‌ ಸೂರ್ಯನ ಬೆಳಕಿನಿಂದಾಗಿ ಪ್ರಭಾವ ಕಳೆದುಕೊಳ್ಳುತ್ತದೆ. ಇದರೊಂದಿಗೆ ಉಷ್ಣಾಂಶ ಮತ್ತು ತೇವಾಂಶಯುತ ವಾತಾವರಣದಲ್ಲೂ ಇಂಥದ್ದೇ ಪ್ರಭಾವವನ್ನು ಗಮನಿಸಲಾಗಿದೆ. ವಾತಾವರಣದಲ್ಲಿ ಉಷ್ಣಾಂಶ ಹೆಚ್ಚುತ್ತಿದ್ದಂತೆ ವೈರಸ್‌ ಉಳಿಯುವಿಕೆ ಕಷ್ಟವಾಗುತ್ತದೆ' ಎಂದು ವಿವರಿಸಿದ್ದಾರೆ.
ಹೋಮ್‌ಲ್ಯಾಂಡ್‌ ಸೆಕ್ಯುರಿಟಿ ಇಲಾಖೆಯ ಅಧ್ಯಯನ ಫಲಿತಾಂಶಗಳು ಇನ್ನೂ ಆರಂಭಿಕ ಹಂತದ್ದು ಎಂದೂ ಬ್ರಯಾನ್‌ ಹೇಳಿದ್ದಾರೆ.
ಜಾನ್ಸ್‌ ಹಾಪ್‌ಕಿನ್ಸ್‌ ಯೂನಿವರ್ಸಿಟಿ ಮಾಹಿತಿ ಪ್ರಕಾರ, ಜಗತ್ತಿನಾದ್ಯಂತ ಕೋವಿಡ್‌–19 ದೃಢಪಟ್ಟ ಒಟ್ಟು 26 ಲಕ್ಷಕ್ಕೂ ಹೆಚ್ಚು ಪ್ರಕರಣಗಳು ದಾಖಲಾಗಿವೆ. ಅಮೆರಿಕದಲ್ಲೇ 8,60,000 ಪ್ರಕರಣಗಳು ವರದಿಯಾಗಿದ್ದು, ಸೋಂಕಿನಿಂದ 49,759 ಮಂದಿ ಮೃತಪಟ್ಟಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.