ಸಂಪಾದಕೀಯ| ಚಿಂತನೆ, ಸಮಾಲೋಚನೆ ಇಲ್ಲದೆ‘ಅಗ್ನಿಪಥ’ ಯೋಜನೆ ಘೋಷಣೆ

ಅಗ್ನಿಪಥ ಯೋಜನೆಗೆ ಮಾಜಿ ಸೈನಿಕರು ಮತ್ತು ರಕ್ಷಣಾ ತಜ್ಞರಿಂದ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ದೇಶದ ಯುವ ಜನರಿಗೆ ಈ ಯೋಜನೆಯು ಇಷ್ಟವಾಗಿಲ್ಲ ಎಂಬುದನ್ನು ಪ‍್ರತಿಭಟನೆಗಳೇ ಹೇಳುತ್ತವೆ. ಸರ್ಕಾರಕ್ಕೆ ಉಳಿತಾಯ ಆಗಲಿದೆ ಎಂಬುದುಈ ಯೋಜನೆಯ ದೊಡ್ಡ ಪ್ರಯೋಜನ. ಸೈನಿಕರಿಗೆ ನೀಡುವ ಪಿಂಚಣಿ ಮತ್ತು ಇತರ ನಿವೃತ್ತಿ ಸೌಲಭ್ಯಗಳಿಗೆ ಆಗುವ ವೆಚ್ಚ ತಗ್ಗುತ್ತದೆ. ಅಲ್ಪಾವಧಿ ಕರ್ತವ್ಯ ಆಧಾರಿತ ನೇಮಕ ಪದ್ಧತಿಯು ಇತರ ಕೆಲವು ದೇಶಗಳಲ್ಲಿ ಇದೆ. ಆದರೆ, ರಕ್ಷಣಾ ಪಡೆಗಳಲ್ಲಿ ಕಾಯಂ ಉದ್ಯೋಗಕ್ಕೆ ನೇಮಕಗೊಳ್ಳಲು ಜನರ ಕೊರತೆ ಇಲ್ಲದ ಭಾರತದಂತಹ ದೇಶಕ್ಕೆ ಇಂತಹ ನೀತಿ ಅಗತ್ಯವೇ ಎಂಬುದು ಚರ್ಚಾರ್ಹ.

ಅಗ್ನಿವೀರರನ್ನು ಸಮರ್ಥ ಸೈನಿಕರನ್ನಾಗಿ ರೂಪಿಸಲು ಈಗ ನಿಗದಿ ಮಾಡಿರುವ ತರಬೇತಿ ಅವಧಿಯು ಸಾಕೇ ಎಂಬ ಪ್ರಶ್ನೆ ಇದೆ. ಕಾಯಂ ಆಗಿ ಸೇನೆಗೆ ಸೇರಿದವರಷ್ಟು ಸ್ಫೂರ್ತಿಯುತವಾಗಿ ಅಗ್ನಿವೀರರು ಇರಬಹುದೇ ಎಂಬ ಪ್ರಶ್ನೆಯೂ ಇದೆ. ಅಲ್ಪಾವಧಿ ಕರ್ತವ್ಯದ ಬಳಿಕ ಕೆಲಸ ಕಳೆದುಕೊಳ್ಳುವ ಮುಕ್ಕಾಲು ಪಾಲು ಯುವಜನರು ನಿರಾಶೆ ಮತ್ತು ಹತಾಶೆಗೆ ಒಳಗಾಗುವ ಸಾಧ್ಯತೆ ಇದೆ ಎಂಬ ಆತಂಕ ವ್ಯಕ್ತವಾಗಿದೆ. ಪಿಂಚಣಿ ಸೌಲಭ್ಯ ಇಲ್ಲದ ಅಲ್ಪಾವಧಿ ಉದ್ಯೋಗದತ್ತ ಅರ್ಹ ಯುವಜನರು ಆಕರ್ಷಿತರಾಗದೇ ಇರಬಹುದು. ಸೇನೆಯ ಉದ್ಯೋಗದ ಆಕಾಂಕ್ಷೆಯಲ್ಲಿದ್ದ ಯುವಜನರು ಈ ಕಾರಣಕ್ಕಾಗಿಯೇ ಹೆಚ್ಚು ನಿರಾಶರಾಗಿದ್ದಾರೆ. ದೇಶದಲ್ಲಿ ನಡೆಯುತ್ತಿರುವ ಪ್ರತಿಭಟನೆಯನ್ನು ಈ ಹಿನ್ನೆಲೆಯಲ್ಲಿ ನೋಡಬೇಕು. ಕೇಂದ್ರ ಗೃಹ ಸಚಿವಾಲಯದ ಪೊಲೀಸ್‌ ಪಡೆಗಳು ಮತ್ತು ರಕ್ಷಣಾ ಸಚಿವಾಲಯದ ಅರೆ ಸೇನಾ ಪಡೆಗಳಲ್ಲಿ ಅಗ್ನಿವೀರರಿಗೆ ಶೇ 10ರಷ್ಟು ಮೀಸಲಾಗಿ ಘೋಷಿಸುವ ಮೂಲಕ ಪ್ರತಿಭಟನೆಯನ್ನು ತಣ್ಣಗಾಗಿಸುವ ಯತ್ನವನ್ನು ಸರ್ಕಾರ ಮಾಡಿದೆ. ಈ ಘೋಷಣೆಯ ಬಳಿಕವೂ ಪ್ರತಿಭಟನೆ ಮುಂದುವರಿದಿದೆ. ಏಕೆಂದರೆ, ಈ ಪಡೆಗಳಲ್ಲಿ ವಾರ್ಷಿಕ ಲಭ್ಯವಿರುವ ಹುದ್ದೆಗಳ ಸಂಖ್ಯೆ ದೊಡ್ಡದೇನಲ್ಲ. ಹಾಗಾಗಿ ‘ಅಗ್ನಿವೀರ’ರಾಗಿ ಸೇನೆಯಿಂದ ಹೊರಬರುವವರಲ್ಲಿ ದೊಡ್ಡ ವರ್ಗವು ಬೇರೆಡೆಯೇ ಉದ್ಯೋಗ ಕಂಡುಕೊಳ್ಳಬೇಕಾಗುತ್ತದೆ. ನಮ್ಮ ದೇಶದಲ್ಲಿ ಉದ್ಯೋಗ ಪಡೆದುಕೊಳ್ಳುವುದು ಅಷ್ಟೊಂದು ಸುಲಭವೇನಲ್ಲ. ಅಗ್ನಿಪಥ ಯೋಜನೆಯು ಸಮಾಜದ ಮೇಲೆಯೂ ಪ್ರತಿಕೂಲ ಪರಿಣಾಮ ಬೀರಬಹುದು ಎಂಬ ಕಳವಳದಲ್ಲಿ ಹುರುಳಿಲ್ಲ ಎಂದು ಹೇಳಲಾಗದು. ಸೇನಾ ತರಬೇತಿ ಹೊಂದಿರುವ ಈ ಯುವಕರಲ್ಲಿ ಹಲವರಿಗೆ ಸೂಕ್ತ ಉದ್ಯೋಗ ಸಿಗದೆ, ಅವರು ಸಾಮಾಜಿಕವಾಗಿ ಮತ್ತು ರಾಜಕೀಯವಾಗಿ ದುರ್ಬಳಕೆ ಆಗಬಹುದು ಎಂಬ ಆತಂಕ ಕೆಲವರಲ್ಲಿದೆ. ಯೋಜನೆ ಘೋಷಣೆಗಿಂತ ಮೊದಲೇ ಸಂಬಂಧಪಟ್ಟ ಎಲ್ಲರ ಜೊತೆಗೆ ಸಮಾಲೋಚನೆಯನ್ನು ಸರ್ಕಾರ ನಡೆಸಬೇಕಿತ್ತು. ಹಾಗೆ ಸಮಾಲೋಚನೆ ನಡೆಸಿದ್ದರೆ, ಯೋಜನೆಯಲ್ಲಿ ಇದೆ ಎಂದು ಹೇಳಲಾಗುವ ಹಲವು ಲೋಪಗಳನ್ನು ಸರಿಪಡಿಸಬಹುದಾಗಿತ್ತು. ಯೋಜನೆ ಘೋಷಣೆಯ ಬಳಿಕ ಪದೇ ಪದೇ ಬದಲಾವಣೆಗಳನ್ನು ಮಾಡುವುದನ್ನು ತಪ್ಪಿಸಬಹುದಾಗಿತ್ತು.