ಜಾತಿವಿಷಕ್ಕೆ ಮತ್ತೆ ಮತ್ತೆ ಬಲಿ ಮರ್ಯಾದೆಗೇಡು ಹತ್ಯೆಗಳಿಗೆ ಕೊನೆಯೆಲ್ಲಿ?

ಕರ್ನಾಟಕ ಮಾತ್ರವಲ್ಲದೆ, ದೇಶದ ವಿವಿಧ ಭಾಗಗಳಲ್ಲೂ ಜಾತಿಕುರುಡಿನ ಕಿಚ್ಚಿಗೆ ತರುಣ– ತರುಣಿಯರು ಬಲಿಯಾಗುತ್ತಲೇ ಇದ್ದಾರೆ. ಗ್ರಾಮೀಣ ಪ್ರದೇಶಗಳಲ್ಲಿ ನಡೆಯುವ ಕೆಲವು ಪ್ರಕರಣಗಳು ಆತ್ಮಹತ್ಯೆಯ ಹೆಸರಿನಲ್ಲಿ ಮುಚ್ಚಿಹೋಗಿರುವ ಸಾಧ್ಯತೆಗಳೂ ಇವೆ. ರಾಷ್ಟ್ರೀಯ ಅಪರಾಧ ದಾಖಲೆ ಬ್ಯೂರೊ ಅಂಕಿಅಂಶಗಳ ಪ್ರಕಾರ 2017–2018ರಲ್ಲಿ ಮರ್ಯಾದೆಗೇಡು ಹತ್ಯೆಯ ಒಂದು ಪ್ರಕರಣವಷ್ಟೇ ದೇಶದಲ್ಲಿ ದಾಖಲಾಗಿದ್ದು, 2019ರಲ್ಲಿ 25 ಪ್ರಕರಣಗಳು ವರದಿಯಾಗಿವೆ. ಆದರೆ, ಸ್ವಯಂ ಸೇವಾಸಂಸ್ಥೆಯೊಂದರ 2019ರ ವರದಿಯ ಪ್ರಕಾರ, ಐದು ವರ್ಷಗಳ ಅವಧಿಯಲ್ಲಿ 195 ಪ್ರಕರಣಗಳು ತಮಿಳುನಾಡೊಂದರಲ್ಲೇ ವರದಿಯಾಗಿವೆ. ಕರ್ನಾಟಕದಲ್ಲೂ ಮರ್ಯಾದೆಗೇಡು ಹತ್ಯೆಯ ಪ್ರಕರಣಗಳು ಆಗಾಗ ವರದಿಯಾಗುತ್ತಲೇ ಇವೆ. ನಾಯಕ ಸಮುದಾಯಕ್ಕೆ ಸೇರಿದ ವ್ಯಕ್ತಿಯೊಬ್ಬ ಅನ್ಯಜಾತಿಯ ಯುವಕನನ್ನು ಪ್ರೇಮಿಸಿದ ಮಗಳನ್ನು ಕೊಂದಿರುವ ಸುದ್ದಿ ತುಮಕೂರು ಜಿಲ್ಲೆಯ ಚಿಕ್ಕಹೆಡಿಗೆಹಳ್ಳಿಯಲ್ಲಿ ಇತ್ತೀಚೆಗೆ ನಡೆದಿತ್ತು. ಬಳ್ಳಾರಿಯಲ್ಲಿ ಯುವತಿಯೊಬ್ಬಳು ತನ್ನ ಪ್ರೇಮದ ಕಾರಣದಿಂದಾಗಿ ತಂದೆಯಿಂದಲೇ ಕೊಲೆಗೀಡಾಗಿದ ಘಟನೆ ಕಳೆದ ವರ್ಷ ನಡೆದಿತ್ತು. ಈಗ ಕೋಲಾರ ಜಿಲ್ಲೆಯಲ್ಲಿ ಎರಡು ತಿಂಗಳ ಅವಧಿಯಲ್ಲಿ ಎರಡು ಮಾರ್ಯದೆಗೇಡು ಹತ್ಯೆಗಳು ನಡೆದಿವೆ. ಈ ಹತ್ಯೆಗಳು ಸಮಾಜದಲ್ಲಿ ಆಳವಾಗಿ ಬೇರುಬಿಟ್ಟಿರುವ ಜಾತೀಯತೆಯ ಕ್ರೌರ್ಯವನ್ನು ಸೂಚಿಸುವಂತಿವೆ. ಜ್ವಾಲಾಮುಖಿಯಂತೆ ಆಗಾಗ ಸ್ಫೋಟಿಸುವ ಜಾತಿವಿಷಕ್ಕೆ ಯುವಜನ ಬಲಿಯಾಗುತ್ತಿದ್ದಾರೆ. ಈ ಹತ್ಯೆಗಳಿಂದ ದೇಶದ ಜಾತ್ಯತೀತ ಸ್ವರೂಪ ಗಾಸಿಗೊಳ್ಳುತ್ತಿದ್ದು, ಸಂವಿಧಾನದ ಆಶಯಗಳೂ ಮುಕ್ಕಾಗುತ್ತಿವೆ. ಚಂದ್ರಯಾನದಂತಹ ಅತ್ಯುನ್ನತ ವೈಜ್ಞಾನಿಕ ಸಾಧನೆಗಳ ಇನ್ನೊಂದು ತುದಿಯಲ್ಲಿ ಸಮಾಜದ ಅಂತಃಕರಣವೇ ಬರಡಾಗುತ್ತಿದೆಯೇನೊ ಎಂದು ಅನುಮಾನ ಮೂಡಿಸುವಂತಹ ಘಟನೆಗಳು ನಡೆಯುತ್ತಿವೆ. ಜಾತಿ ಹಾಗೂ ಧರ್ಮದ ಹೆಸರಿನಲ್ಲಿ ನಡೆಯುವ ದ್ವೇಷ–ಹಿಂಸೆಯನ್ನು ತಡೆಗಟ್ಟದೇ ಹೋದರೆ, ನಮ್ಮ ವೈಜ್ಞಾನಿಕ ಸಾಧನೆಗಳು ಹಾಗೂ ವೈಚಾರಿಕ ಚಿಂತನೆಗಳು ‘ಬರಡು ಹೆಮ್ಮೆ’ಯಾಗಿಯೇ ಉಳಿಯಲಿವೆ. ಸಮಾಜದ ಅಂತಃಕರಣವನ್ನು ನಿರಂತರವಾಗಿ ಜಾಗೃತವಾಗಿರಿಸುವ ಕೆಲಸವನ್ನು ಸರ್ಕಾರಗಳು ಪ್ರಜ್ಞಾಪೂರ್ವಕವಾಗಿ ಮಾಡಬೇಕು. ಆ ಕೆಲಸದಲ್ಲಿ ಜನಸಾಮಾನ್ಯರೂ ತೊಡಗಿಕೊಳ್ಳಬೇಕು.