ಸುಂಕ ಹೆಚ್ಚಳದ ಕ್ರಮ ಬಾಂಧವ್ಯ ವೃದ್ಧಿಗೆ ಅಡ್ಡಿಯಾಗದಿರಲಿ

ಹಾರ್ಲಿ ಡೇವಿಡ್‌ಸನ್‌ ಬೈಕ್‌ ಮೇಲೆ ಭಾರತ ದುಬಾರಿ ಸುಂಕ ವಿಧಿಸಿದೆ ಎಂದು ಅವರು ಪದೇ ಪದೇ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ಹೀಗಿರುವಾಗ, ‘ನಾವೇಕೆ ಸುಂಕ ರಿಯಾಯಿತಿ ಕೊಟ್ಟು ಮೂರ್ಖರಾಗಬೇಕು’ ಎಂಬುದು ಅವರ ವಾದ.ಉಕ್ಕು ಮತ್ತು ಅಲ್ಯೂಮಿನಿಯಂನ ಕೆಲ ಉತ್ಪನ್ನಗಳ ಆಮದಿನ ಮೇಲೆ ಕ್ರಮವಾಗಿ ಶೇ 25 ಮತ್ತು ಶೇ 10ರಷ್ಟು ಸುಂಕ ವಿಧಿಸುವ ದೇಶಗಳ ಸಾಲಿಗೆ ಭಾರತವನ್ನೂ ಸೇರಿಸಿದ್ದಾರೆ. ಭಾರತದ ಜತೆಗಿನ ಆದ್ಯತಾ ವ್ಯಾಪಾರ ಒಪ್ಪಂದವನ್ನು (ಜಿಎಸ್‌ಪಿ) ರದ್ದುಗೊಳಿಸಿದ ಪರಿಣಾಮವಾಗಿ ಭಾರತದ ವಾಣಿಜ್ಯ ಹಿತಾಸಕ್ತಿಗೆ ಧಕ್ಕೆ ಒದಗಿದೆ. ಭಾರತದಿಂದ ಅಮೆರಿಕಕ್ಕೆ ರಫ್ತಾಗುವ ₹ 38,500 ಕೋಟಿ ಮೊತ್ತದ ಸರಕುಗಳಿಗೆ ಇದರ ಬಿಸಿ ತಟ್ಟಿದೆ.

ಟ್ರಂಪ್‌ ಆಡಳಿತದ ಇಚ್ಛೆಗೆ ಅನುಗುಣವಾಗಿ ದ್ವಿಪಕ್ಷೀಯ ವ್ಯಾಪಾರ ಒಪ್ಪಂದಕ್ಕೆ ಅಂಕಿತ ಹಾಕುವಂತೆ ಭಾರತದ ಮೇಲೆ ಅಮೆರಿಕ ಒತ್ತಡ ಹೇರುತ್ತಲೇ ಇದೆ. ಜಿಎಸ್‌ಪಿ ರದ್ದುಗೊಳಿಸಿದ ಕ್ರಮ ಕೂಡ ಈ ಕಾರ್ಯತಂತ್ರದ ಭಾಗವಾಗಿದೆ ಎಂಬ ಅನುಮಾನ ಇದೆ. ಅಮೆರಿಕವು ಭಾರತದಿಂದ ಬೇರೆ ಬೇರೆ ಬಗೆಯ ರಿಯಾಯಿತಿಗಳನ್ನೂ ಬಯಸುತ್ತಿದೆ. ಇ–ಕಾಮರ್ಸ್‌ಗೆ ಸಂಬಂಧಿಸಿದಂತೆ ಭಾರತ ಸಿದ್ಧಪಡಿಸಿರುವ ಕರಡು ನೀತಿಯ ಬಗ್ಗೆ ಅಮೆರಿಕ ತಕರಾರು ತೆಗೆದಿದೆ. ಭಾರತದಲ್ಲಿ ವಹಿವಾಟು ವಿಸ್ತರಣೆಗೆ ಮುಂದಾಗಿರುವ ಅಮೆರಿಕದ ದೈತ್ಯ ಸಂಸ್ಥೆಗಳಾದ ಅಮೆಜಾನ್‌ ಮತ್ತು ವಾಲ್‌ಮಾರ್ಟ್‌ನ ಹಿತಾಸಕ್ತಿಗೆ ಈ ನೀತಿಯು ತೊಡಕಾಗಲಿದೆ ಎಂದು ಅಮೆರಿಕ ಭಾವಿಸಿದೆ.

ದತ್ತಾಂಶಗಳನ್ನು ಸ್ಥಳೀಯವಾಗಿ ಕಾಯ್ದಿಡುವ, ಬೌದ್ಧಿಕ ಆಸ್ತಿ ಹಕ್ಕುಗಳ ವರ್ಗಾವಣೆ ಮೇಲೆ ನಿರ್ಬಂಧ ವಿಧಿಸುವ ಭಾರತದ ಧೋರಣೆ ಕೂಡ ಅದಕ್ಕೆ ಪಥ್ಯವಾಗಿಲ್ಲ. ಹೀಗಾಗಿ, ಭಾರತದ ವಿರುದ್ಧ ಕಠಿಣ ವಾಣಿಜ್ಯ ನೀತಿ ಅನುಸರಿಸುತ್ತಿದೆ. ತಮ್ಮ ದೇಶದ ಉದ್ದಿಮೆಗಳನ್ನು ರಕ್ಷಿಸಲು, ವಿದೇಶಗಳ ಸ್ಪರ್ಧೆ ಎದುರಿಸಲು ಟ್ರಂಪ್‌ ಅವರು ಸಂರಕ್ಷಣಾ ನೀತಿಗೆ ಮೊರೆ ಹೋಗಿದ್ದಾರೆ. ಇತರ ದೇಶಗಳ ಜತೆಗಿನ ವ್ಯಾಪಾರ ಅಸಮತೋಲನ ಸರಿಪಡಿಸಲೂ ಕಠಿಣ ಕ್ರಮಗಳನ್ನು ಕೈಗೊಂಡಿದ್ದಾರೆ.

ಇದು ಜಾಗತಿಕ ವಾಣಿಜ್ಯ ಕ್ಷೇತ್ರದಲ್ಲಿಯೂ ಕಂಪನ ಮೂಡಿಸಿದೆ. ವಿಶ್ವದಾದ್ಯಂತ ಗ್ರಾಹಕರಿಗೆ ಅಮೆರಿಕದ ಸರಕುಗಳು ತುಟ್ಟಿಯಾಗಲಿವೆ. ಭಾರತದ ಆಮದು– ರಫ್ತು ವಹಿವಾಟಿಗೂ ಧಕ್ಕೆ ಒದಗಲಿದೆ. ಇಡೀ ವಿಶ್ವ ಒಪ್ಪಿಕೊಂಡಿರುವ ಮುಕ್ತ ವ್ಯಾಪಾರ ನೀತಿಗೂ ಅಮೆರಿಕದ ನಿಲುವು ವಿರುದ್ಧವಾಗಿದೆ. ಪರಸ್ಪರ ಮಾತುಕತೆ ಮೂಲಕ ಹಾಗೂ ವಿಶ್ವ ವ್ಯಾಪಾರ ಸಂಘಟನೆಯ ವೇದಿಕೆಯಲ್ಲಿ ಈ ವಾಣಿಜ್ಯ ಸಂಘರ್ಷವನ್ನು ಬಗೆಹರಿಸಿಕೊಳ್ಳಲು ಎರಡೂ ದೇಶಗಳು ಮುಂದಾಗಬೇಕಾಗಿದೆ.